SALMO.
19.
Kawananchi sielu yachachiwanchisapa Tata Dios tukuy laya atipak kananta. Sieluta kawashpanchikuna yachanchisapa Tata Dios tukuy layata rurashkanta. 
Diyan diyan sieluka yachachiwanchisapa Tata Dioslla tukuy layata rurashkanta. Tutapipish sieluka yachachiwanchisapa Tata Dios alli yachak kananta. 
Sielu mana rimakuptin uyarishpanchikunapish allita yachanchisapa Tata Dios tukuy layata rurashkanta. 
Tukuy allpa kuchun mañanpi kawsak runakuna sieluta kawashpa yachanchisapa Tata Dios tukuy layata rurashkanta. Payka intita sielupi wasinpishina churashka. 
Intika suk novioshina kasaranan diya kushikushpa wasinmanta kallpan. Premyunta chaskinanpa kallpak runashina kushikushpa llukshin. 
Intika llukshimunan ladumanta yaykunan ladukaman purin. Mana ni pi rupayninmanta kishpinchu. 
Tata Diospa kamachikunankuna sukaman allimami. Sampayaptinchi animuchiwanchi. Paypa rimananka mana llullachiwanchisapachu. Mana yachaptinchikuna yachachiwanchisapa alli yachak kananchikunapa. 
Tata Diospa rimanan allima kashpa kushichiwanchisapa. Paypa kamachikunankuna sukaman allima kashpa lampara llipyakshina lusichiwanchi yachananchikunapa allita rurashpa kawsayta. 
Tata Diosta kuyashpanchikuna mana tukuyniyukta allita rurashpa kawsanchisapa. Tata Dios kuskanpi mana llullakushpa kamachiwanchisapa. 
Paypa rimananka kurimanta ashwan allimami. Amu mishkinta munananchikunamanta Tata Diospa rimananta ashwanta munanchisapa. 
A, Tata Dios, kamachikunaykikuna yachachiwan ama uchallikushpa kawsanaynipa. Chaykunata kasuptini sukaman yanapawanki. 
Mana ni pi kikinmanta yachanchu uchallikushkanta. A, Tata Dios, mana yuyashpa uchallikuptini perdonaway. 
Yanapaway ama kikinilla kreyinakunaynipa. Ama munaychu kreyinakushpa kawsanaynipa. Yanapawaptiki mana uchayuk runa kasha amana uchallikunaynipa. 
A, Tata Dios, kanmi amachawashpa uchaynimanta salvawanki. Chayrayku munani tukuy rimanayni tukuy yuyanayni kushichishunaykipa.