SALMO.
61.
A, Tata Dios, sukaman llakishpayni kaparikuptini uyariway. Roygaptini uyariwashpa yanapaway. 
Kay allpapi kuchun mañanpi kashpaynipish manana yachashpa imatami rurasha nishpa kanta roygayki. Roygaptini manllayba rumi sawanpishina churawashpayki chikniwak runakunamanta salvaway. 
A, Tata Dios, kanmi amachawanki. Amachawashpayki allima pirkashina chay chikniwak runakunamanta arkawanki. 
Tukuy tiempu wasikipi kawsanayani wallpa wawankunata rikran sikipi amachakshina kuydawanaykipa. 
A, Tata Dios, kanmi tukuy promesakushkaynita uyarishkanki. Chayrayku yanapawashkanki. Kanka tukuy kuyashushpa kawsak runakunata yanapankisapa. 
A, Tata Dios, kamachikuk kaptini yanapaway sukaman unayta kawsanaynipa. 
Yanapaway allita kamachikunaynipa. Kuyawashpayki ama shaykushpa kuydaway. 
Chashna yanapawaptiki tukuy tiempu kanllata alabashpayni kawsasha. Tukuy diya promesakushkaynita rurasha.