SALMO.
119.
A, Tata Dios ¿imashnatí wayna runa atipanman mana uchallikushpa kawsayta? Waynaka rimanaykita kasushpa mana uchallikushpa kawsanka. 
Ñuka tukuy shunku yanapawanaykipa munani. Yanapaway kamachikunaykikunata kasushpa kawsanaynipa. 
Tukuy rimanaykitami tukuy shunku allita kasushkani ama uchallikushpa kanta rabyachinaynipa. 
A, Tata Dios, kanta sukaman alabayki. Kamachikunaykikunata yachachiway. 
Tukuy yachachiwanaykita ñukapish runamasinikunata parlachisha. 
Aypa imakuna tiyapaptin kushikunaynimanta rimanaykita kasushpayni ashwanta kushikusha. 
Tukuy rimanaykita yuyashpa kawsasha. Chayta yuyashpa allita rurashpa kawsashpayni ñannikipi purisha. 
Rimanaykita yachashpayni sukaman kushikusha. Mana kutin kunkashachu. 
A, Tata Dios, sukaman yachachiwashkaykita kuyani. Tukuy diya chayta yuyashpa chishyani. 
Tukuy kamachikunaykikunata ñami yachanina. Rimanaykika chikniwak runakunamanta ashwan alli yachaktami rurawashka. 
Kamachikunaykikunata yuyashpa kawsashpayni rimanaykita yachachiwak runakunamanta ashwan allita entiendini. 
Rimanaykita kasushpa kawsashpayni kamachikuk ansianukunamanta ashwan allita entiendini. 
Tukuy mana alli ruranakunatami sakishkani rimanaykita kasushpa kawsanaynipa. 
Rimanaykita kan yachachiwaptiki mana chaykunata sakishkanichu. 
Rimanaykipi willawanki yanapawanaykipa. Rimanayki ñukñushina allimami. Chayrayku ñukñumanta ashwanta rimanaykita munani. 
Rimanaykimi tukuy alli ruranakunata yachachiwashka. Chayrayku chay mana alli ruranakunata manana munaninachu rurayta. 
Rimanaykika allima lamparashinami purinayni ñanpi allima lusshina.