Ebraaio.
3.
A kum tateng liklik baa God i pilak pa muaat kupi muaat anuna taara, muaat a nuknuk paa Iesu. Ia baa Aapostolo ma a mukmuga na tena wetabaar karom God baa daat nurnur uni ma daat wewapua uni. 
God ia pilak taai kup a pinapaam mi, ma i lingtatuna uni, welaar ma Moses kaai baa i lingtatuna u ra nuna pinapaam naliwan taa ra taara anun God. 
Di taar a ngaala na urur karom a muaana baa i paam a ruma, ma pa di taar a ngaala na urur karom a ruma baa i paami. I lenkaai maa, a urur baa di taari karom Iesu i ngaala aakit taa ra urur baa di taari karom Moses. 
A kum ruma raap, raaraa muaana i paami, iaku God i paam a kum utnaa raap. 
Moses, ia a tultul anun God, ma i lingtatuna u ra nuna pinapaam naliwan taa ra taara anun God. I wewapua muga taau u ra kum utnaa baa God in wewapua uni namur. 
Iaku Kaarisito, ia Natun God ma i lingtatuna u ra nuna pinapaam baa i baboura a ruma anun God. Baa daat tur dekdek u ra nurnur, ma pa daat burut, baa daat ki walaang kup a kum utnaa baa God in paami, io, daat a ruma anun God. 
Io, baa daat a taara anun God, daat a murmur a pirpir anu ra Takado na Nion baa i piri lenbi, “Umari baa muaat walangoro in ingaana, 
koku muaat wadekdek a balaamuaat welaar ma ra kum taptabumuaat namuga diat paami, baa pa diat taraam karom iaau, u ra kum kilakilaala baa diat ki u ra bil na wanua ma diat walaar iaau. 
Diat walaar iaau, ma diat babo ut anung kum pinapaam un 40 kilaala. 
Io, bi ia kabina baa iaau kaankaan karom a taaun taara maa, ma iaau piri lenbi, ‘A nuknukindiat i waan raara a bungbung raap, ma pa diat murmur anung aakapi.’ 
Io, iaau kaankaan ma iaau weweliman lenbi, ‘Pain diat a ruk u ra nung taamaan na ningo.’” 
A kum tateng liklik, muaat a baboura muaat, kupi koku te kon muaat a nuknukina in murmur aakaina mangamangaan ma pa in nurnur, ma in waan ingen kon God, baa a lalaaunina. 
Muaat a pirpir na wewaraaut wetwetalaai karom muaat, u ra bungbung raap baa di waatungi naa “umari.” Muaat a paami lenmaa, kupi koku aakaina mangamangaan in waruga paa te kon muaat, ma in wadekdek baat in balaana. 
Daat tepaana ma Kaarisito, baa daat tur dekdek u ra nurnur tuk u ra tintinipina, welaar ma daat turpaai mai namuga. 
Welaar ma di aa pir taai u ra Buk Taabu lenbi, “Umari baa muaat walangoro in ingaana, koku muaat wadekdek a balaamuaat, welaar ma ra kum taptabumuaat namuga diat paami, baa pa diat taraam karom iaau.” 
Woi diat maa diat walangoro in ingaan God, iaku pa diat taraam uni? Diat raap baa Moses i ben apari pa diat taangirong Aaigipto, naka? 
Woi diat maa God i kaankaan karom diat 40 kilaala? Diat baa diat paam aakaina mangamangaan ma diat maat u ra bil na wanua, naka? 
Woi diat maa God i weweliman naa pa diat a ruk u ra nuna taamaan na ningo? Diat baa pa diat taraam karomi, naka? 
Io, daat baboi baa pa diat pet laar paai kupi diat a ruk u ra nuna taamaan na ningo, kabina maa pa diat nurnur.