3
Moises Deus tsumuẽhĩtsa. Sesus Deus tse babata.
1 Iwatsahi Sesus soho humo mytsatyziutaha katukytsa! Deus nimywatawy ityryktsa tsimoziknaha. Sesus hi mybo nitsasoko Deus zipehata my mywata niyzik. Atakta ziknapamykysokota taparakta myhyrizikwani. Ustsa bo tihi zeka:
— O katsaktsa Sesus mymyoktyhyrykta humo myspirikporẽtsa tsimoziknaha iwatahi mymytsumuẽhĩkĩ hỹ — tsimaha. Iwatsahi Sesus soho humo mytsatyziutaha! my. 2 Ata kino Deus harere humo hyỹ ziknakara, iharere humo pykyhytu hyỹ ziknakara. Moises Deus harere bo yhỹ ziknakara. Atahi Deus tyryktsa nisihyrinymyryky. Sesus kino niwatihi Deus harere humo pykyhytu hyỹ ziknakara. 3 Atakta abazubata. Sesus abazuba tahi Moisesta jokboata tu iwatahi Sesus harere bo hyỹ tsimykaranahaze wasani tsimykaranaha. Kytsa wahoro mozoknikinahaze katsaktsa:
— O awahoro tisapyrẽta ikia asopykziurẽta — tsikaha. Maku tsihyrinymyrẽta iwahoro nizukniki naha humo. Moisesta jokboata tu zuba myhyrizikwani my. Deus Sesus soho:
— Ikia abazubata — my. Iharere abazubata my. 4 Kytsa wahoro zuba nizuknikinaha. Deusta mybarawy tsizubarẽna nizukni.
5 Moises Deus hyriziktsokzawy wasani ziknakara. Deus tyryktsa nisihyrinymyryky iwa tarabaja ziknakara. Hawa Deus mykara nisihyrinymyryky. Deus tyryktsa humo tsimypokzitsiukrẽta atakta Deus tsumuẽhĩtsa zuba.
6 Sesus Kiristu hi Deus isopyk katse babata my. Atahi Deus hyrytsa humo tsimypokzitsiukrẽta hỹ. Katsaktsa Deus hyrytsa tsimaha, atakta myperytsa zubata. Mypunihikrẽtsa zeka katsa tihi:
— O Sesus humo mysapyrẽtsa tsimoziknaha, mywahi Deus tuk tsimynapykyryknaha ana humo ka mykurẽtsa hỹ — tsimaha.
Deus tyryktsa iziuha bo tsimypupunaha.
7 Iwatsahi Sudeutsa siakbatsa ba siwa zikaha! Tubabatu Deus hyrikoso sisoho ziwatahaka:
— Abaka kaharere tsiwabynahaktsa!
8 Kaharere tsipiwabynahaze batu hỹ tsimaha iwaze batu tyso.
Taparaktsa ahadiritsa kaharere bo batu hỹ ziknakaranaha sioktsiokanikitsa.
Jerukbara eze tuze kaharere bo batu ma zikaha.
Tahapetu sisopyk:
9 “O katsaktsa mysapybyitsa tsimykaranaha zeka Deus myhumo batu iakyri” nikaranaha.
Sitsyhyryze kazikwy iwatawy iwatsa tu kaharere bo batu hỹ ziknakaranaha.
10 Kuarẽta nityktseheze ziknasitsumuẽhĩkĩ iwatsa tu kaharere bo batu hỹ ziknakaranaha.
Iwaze sihumo takyriki.
Kapetu kasopyk: “O simysapybyitsa soho humo mytsaty ziknakaranaha.
Kasopyk humo batu sihyrinymyry iwatsahi zikmyikinaha” iky.
11 Iwatahi ikykubyrisorokbyize
batu aty tohi katuk zikapykyryk iky — Deus hyrikoso niy.
Deus harere hi papeu humo botu ziwataha.
12 O katukytsa pykyhytutaha! Hawa mytsaty tsimykaranaha pykyhytutaha! Deus koikny bakta tu tawahi my atahi zinymyrybata. Hawa ja isapybara bo mytsaty tsimykaranaha zeka tamyikik tsimaha. Iwaze Deus harere humo batu hỹ tsimykaranaha iwatsahi pykyhytutaha! Ahamyspihikbata byihuja! 13 Pibyituhukutu tyharape kusuknikinahaktsa! Iwaze tsimahaze ba ahamyiwy. Deus mydiritsa siakbatsa pe:
— Aba kaharere humo hyỹ tahaktsa — niy. Deus kino myhumo niwatihi — Abaka kaharere humo hyỹ tahaktsa! — my, iwaze tyharape punihikwynahaktsa kytsa! Sesus Kiristu humo tsikaha spirikpotohinaha.
14 Tapara Sesus humo ahaspirikporẽtsa ihumo ahakurẽtsa tsikyziknaha. Iharere wasani tsimaha. Ihumo tyspirikponaha! Kyze mywahi ituk tsinapykyryknaha. Tsimyhyrikosokdanahaze Kiristu watsa tsimoziknaha. 15 Deus harere papeu humo:
— Abaka kaharere bo wabytaha!
Kaharere tsipiwabynahaze batu hỹ iwa batu tyso.
Taparaktsa ahadiritsa kaharere bo batu ma ziknakaranaha
Ba siwa zikaha! — niy.
16 Mydiritsa Deus harere ziwabynaha. Mydiritsa Deus harere humo batu hỹ ziknakaranaha. Asaktsa Moises Esito ekze nisioktyhyryk nahatsa. 17 Asaktsa jerukbara buruk niukurunaha. Isapybara ty nikaranaha ana humo hi Deus takyriki, iwatsahi jerukbara buruk niukurunaha. Kuarẽta nityktseheze ziharamuze. Anaeze sizubarẽtsa niakbanaha. 18 Asa kino Deus harere bo batu hỹ ziknakaranaha. Iwatahi Deus hi:
— Iziuha botu nikymy ba zikapykyryknaha — niy.
Iwa hỹ niy.
19 Iwatahi ziuha Deus botu nikymyze ba zikpupunaha. Iharere humo batu hỹ ziknakaranaha, iwatsahi iziuha bo ba zikpupunaha.