4
Satanas Sesus isapybara humo ziakzobyriki.
1 Iwaze Deus hyrikoso Sesus jerukbara bo zioktyhyryk. Iwaze hyrikoso sapybara pehakatsa myzokwy Diabo inarokota ibo izumu. Sesus bo zumuze atahi Sesus Deus harere bo ka yhỹ byitykta nizihikik.
2 Sesus jerukbara eze niapykyryk, estuba byzoje zirahaze nawa kuarẽta zuruze niapykyryk. Anaeze hauk ahabyitatu zikzuruku iwatahi tsiaraparẽta nikara. 3 Iwaze Diabo ibo zumu Sesus tsiaraparẽta nikara ipe niy:
— Ikia Deus tse babata zeka haraharetsa pe “Atsikara tuziktykta tsimy” — niy.
4 Batu Sesus niy.
Tubabatu taparaktsa Deus harere papeu humo ziwatahakanaha:
— Mybarawy ezektsa disahawy humo zuba ba zikzurukunaha sidisahawy ty hauk mahaze sispitu zuba mykaranaha.
Mybarawy ezektsa Deus harere bo hyỹ maha zeka sakurẽtsa moziknaha. Sakurẽtsa hỹ — niaha.
Iwa taparaktsa ziwatahakanaha.
5 Kyze Diabo Serusarẽhe bo Sesus zioktyhyryk. Anaeze Deus wahoro zubata hara bete ziriktohohikare. Jobonikia bo zioktyhyryk niy. 6 Niytahi ipe niy:
— Ikia Deus tse babata zeka tykbo tukutyny. Tykbo tynapurukta! Taparaktsa Deus harere ziwatahakanaha:
“Bijoikpe iknyktsa Deus tsumuẽhĩtsitsa ikia bo nasiakzo.
Paperykynaha. Ikia humo simypokzitsiukrẽtsa.
Haraharetsa bete tsimynaraha zeka tahatsyhyrypetsa ty paik paik maha.
Iwatahi ba zik kahyrikywy” niaha — niy.
7 — Batu ba — Sesus niy.
— Tubabatu taparaktsa Deus harere ziwatahakanahazo:
“Deus ta ba ziakzobyrinaha Deus batu imyiwyky.
Hawa ha tsimyzihikik Deus ty batu typeha” niaha.
Iwa taparaktsa ziwatahakanaha — niy.
8 Kyze Diabo Sesus hara joboni tabo zioktyhyrykzo ipe niy:
— Nanabyi bo iktsa tykta — niy. Atsoko mybarawy tsizubarẽna bo iktsa niy. Sityryktsa kino niwatihi natakaha. Iwaze Diabo tihi:
— Uta anaty hi abo nynybaik my. Ikia hi sipehatsa tsimozik. Sityryktsa ikia pe abazubata maha. 9 Estuba zuba kaokeryk puruk puruk tsimy zeka kabo tsimytsaso zeka: “ikia tsamysapyrẽta aharere bo hyỹ my” tsimy. Ana tyhi tsimy zeka sityryktsa ty ikia bo nynybaik my — Diabo niy.
10 — Batu ba. Nabo pãoty Satanas! — Sesus niy. — Tubabatu taparaktsa Deus harere papeu humo ziwatahakanaha hi:
“Deus bo zuba tynapamykysokonaha ‘Ikia tsamysapyrẽta’
atabo hi ‘Ikia zuba tsimysapyrẽnikita’ tsimy,
iharere bo zuba hyỹ tynakaranaha.” Deus watahaha, iwa taparaktsa ziwatahakanaha — niy.
11 Iwaze Diabo Sesus zerekekspyk. Iwaze bijoikpe iknyktsa Deus tsumuẽhĩtsitsa Sesus humo simypokzitsiarẽtsa nikaranaha iwatsahi ipokzitsiwy tuk inasiknaha. Nawa de.
Sesus tahyriziktsokzawy humo ziakbata Karireja eze tu niy.
12 Kyze kytsa tihi:
— O kytsa Suão Batista sakyriukrẽnikitsa hurukwy bo zioktyhyryknaha — niaha.
Ana hi Sesus ziwabyze Karireja bo niukuru. Nasare bo ziksizo anaeze taypykyryk. 13 Anabo zumuze Nasare eze batu are aha, Kaparanaũ bo niy. Kaparanaũ Karireja pihikzotsabyri sak eze niapykyryk. Anaeze Napatari Seburõ niwatihi parakbaha niaha. 14 Iwa niy. Iwatahi hawa haty Deus sohokotsa Isaijas tubabatu ziwataha atsatu niy. Isaijas tihi:
15-16 — O Seburõ ezektsa, Napatari ezektsa myzubaha pihikzotsabyri ezektsa Karireja ezektsa,
buburu Sorodão sak ezektsa asaktsa Sudeutsabyitsa iwa sizubarẽtsa tapara simysapybyitsa humo batu siaku.
Kytsa watsa miwa eze pyik pyik nikaranaha asahi niwatihi sihyrinymyrybyitsa tu abaka Deus sibo zumu.
Atahi situk mynapykyryk iwatsahi sakurẽtsa mykaranaha.
Kytsa okoro hyritywaha moziknaha sihyrinymyrẽtsa — niy.
Iwa Isaijas tubabatu ziwataha. Sesus Karireja boze anaharere atsatu niy.
17 Sesus Karireja zumuze kytsa nisihyrinymyryky. Tahi:
— O kytsa ahamysapybara ty tsimoewynaha! Abaka Deus zipehata mozumu iwatsahi ityryktsa tsimoziknaha nawa zuruze botu izumu — niy.
Sesus tuk zinymyrykynahatsa nisihuahua.
18 Kyze Sesus Karireja pihikzotsabyri sak taba zitabaka. Anaburuk ziknaukuruze Peduru, Ãdere ahatsa bo nikozo. Ãdere Peduru tsy. Tõhõryk pihik bo zioktsoktsokoknaha. 19 Sesus ispe niy:
— Uta kapik tynaunaha! Tapara piknutsa ziknasidokonaha. Abaka, uta katuk, mektsa tu tysitsumuẽhĩnaha. Kytsa bo Deus soho tsimytsasonaha. Ahaharere humo ka aparakbaha Deus harere bo hyỹ maha — niy.
20 Iwaze atsoko tahatõhõryk zerekbaiknaha. Sesus hapik niukurunaha, ituk pinymyrynaha.
21 Ana puẽtsik Sesus zitabakaze mektsa botu nikozo. Tsiaku, Suão ahatsa bo niwatihi nikozozo. Suão Tsiaku tsy. Tsaraha eze tahazo tuk tahatõhõryk zizozikiknaha. Iwaze Sesus nisihuahuaka. 22 Iwaze atsoko tahazo zerekeknaha tsaraha niwatihi. Sesus hapik niukurunaha atahi nisihyrinymyryky.
Sesus nisihyrinymyryky iwatatu nisizororowyky.
23 Kyze nanabyitaba Karireja bo Sesus niukuru. Deus wahoro bo nikaraze kytsa nisihyrinymyryky. Deus wasania ty sizubarẽtsa bo nipamykysoko. Hawa kytsa Deus tyryktsa moziknaha nitsasoko. Kytsa simyitsapyritsa nisizororowy, ustsa batu siaku nisipunihikwyky.
24 Hawa haty nikara kytsa sizubarẽtsa ziwabynaha. Nanabyitaba Sirija bo niwatihi kytsa isoho ziwabykynaha. Iwatsahi simyitsapyritsa, asaktsa hyrikoso sapybara sibo pororo ziknakaranaha kuanare zikybyikitsa asaktsa sityrykmyitsa iwatsa sizubarẽtsa ibo nisioktyhyryknaha. Sizubarẽtsa nisizororowy. 25 Sizubarẽtsa Sesus hapik niukurunaha. Karireja ezektsa, Dekaporis ezektsa, Serusarẽhe ezektsa, Sudeja ezektsa, buburu Sorodão koiknyktsa iwatsa sizubarẽtsa Sesus hapik niukurunaha.