1 Авелас пашедер Маріклєнґєро ійнепос, саво вічінеласпес Патраді. 2 Єкг баредер рашая те танітова Законоскєре роденас, сар те мурдарен ле Ісус, та даранас ле нийпостар.

3 Акор о сатана заґейля андро Іудас, саво вічінеласпес Іскаріот, ов есас єкг ле дешудуєндар. 4 Ов ґейля ко єкг баредер рашая а те ко храмоскєре сторожа і довакєрдяпес ленца, сар те преден аврі ленґє ле Ісус. 5 Оне радисаліле і дине лав те ден лескє лове. 6 Іуда диня ленґє лав і кєздиндя те роден овра, сар те ден ленґє аврі ле Ісус, кана Лега на ейла ле нийпос.

7 Ачіля о дівес Маріклєнґєро, андро саво кампіля те дочінен патрадякєре бакрорес. 8 Акор Ов бічадя ле Петрос те ле Іоанн і пгендя ленґє:

— Джян і кійсітинен аменґє патрадякєро хавібе.

9 Та оне Лестар пгучле:

— Кай Ту камес, гой амен те кійсітинас?

10 Ов ленґє отпгендя:

— Кана тумен заджяна андро фоврос, тумен одя аракгєна ле манушес, саво ліджяла пані андро канчовс. Джян пал лесте андро ода кгєр, андро саво ов заджяла, 11 і пгенен ле кгєрескєре хулаєскє авка: «Танітов пгучел тутар: "Кай соба, андре саві Ме те мійре сікаде хага Патраді?"» 12 Ов сікавела туменґє опре барі соба, андре саві іма саворо прікєрдо. Одя і кійсітинен.

13 Оне ґейле і аракгле саворо авка, сар ленґє пгендя Ісус, і кійсітинде патрадякєро хавібе.

14 Кана авля овра, Ісус і Лескєре апостоли іскіндепес пажо скамін. 15 Ов ленґє пгендя:

— Ме іґєн камльом те хан кади Патраді туменца анґлал Мійро мучішаґос. 16 Пгенав туменґє, со Ме іма на хава ла джі ко ода, адик ой на обачелапес андро Краліпе ле Девлескєро.

17 Акор Ов іля е кувчі, палікєрдя важ лате ле Девлес і пгендя:

— Лен і розулавен ла машкар туменде. 18 Пгенав туменґє, со Ме бутер на піява андал дракгєнґєро плодос, адик на авела о Краліпе ле Девлескєро.

19 Паліш іля маро, палікєрдя важ лесте ле Девлескє, препгаґля лес і диня ленґє ле лавенца:

— Када Мійро тєлос, кай важ туменґє отделпес. Кєрен ада, кана леперена пал Манде.

20 Авка те пало ода, сар отхале, іля е кувчі і пгендя:

— Кади кувчі — нейво заветос, спганло Мійре ратега, саво важ туменде чордьолпес. 21 Та о васт одалескєро, ко предел Ман, про єкг скамін Мійрега. 22 Та о Ча ле Манушенґєро джял авка, сар пал Лесте пісіме, та війґос одале манушескє, саво Лес предел.

23 Акор сікаде кєздинде єкг аврестар те пгучен, ко машкар аменде шай айсо кєрел.

24 Паліш оне кєздинде те споріненпес, ко лендар маїнел тейн єкг баредер. 25 Ісус акор ленґє пгендя:

— О краля нийпоскєре гіне хулая про мануша, а нийпоскєре рая вакєрен, со оне кєрен лачіпе. 26 А тумен на кєрен авка, сар оне. Та єкг баредер машкар туменде мі ачел єкг цікнедер, а ко тумендар начальнікос — мієл айсо, сар совґас. 27 Бо ко баредер: ода, ко бешел пажо скамін, вай ода, ко совґалінел? На ода, саво бешел? Та Ме машкар туменде, сар совґас. 28 Тумен санас Манца міндик, кана сомас пробаліме аврі. 29 Сар Мійро Дад диня Манґє Краліпе, авка Ме канакє дав лес туменґє, 30 гой тумен те бійрінен те хан і те пієн пажо Мійро скамін андро Мійро Краліпе. Тумен бешена про трона і судзінена дешудуй роди Ізраєльоскєре.

31 І пгендя о Рай:

— Сімон, Сімон! Акєс о сатана манґля Ман те прешіїнен тумен, сар дів. 32 Та Ме ман модліндьом пал туте, гой ту те на нашавес патябе. Ту коркоро, кана вісарегатут кє Манде, зорісалю пескєре пгрален.

33 Петро Лескє отпгендя:

— Раєя! Та ме Туга кійсітиме сом те джян те андре тюрма, те про мерібе!

34 Та Ісус лескє пгендя:

— Пгенав тукє, Петро, минґ дадіве на заґілявела кугутос, сар ту трівал пгенега, со на джянес Ман.

35 Ісус пгучля лендар:

— Кана Ме тумен бічававас бі е тарца, бі е ташка і бі е камашлі, чі хібінелас туменґє варесо?

А оне Лескє отпгенде:

— Наа.

36 Акор Ов ленґє пгендя:

— А канакє, те кє туменде гін е тарца, мі лел ла пега. Лен те е ташка. Те кє туменде нане шабля, мі бікєнел пескєро голмос і мі цінел е шабля. 37 Ме вакєрав туменґє, со ода, со гіно пісіме, маїнелпес те ачен Манца: «Ко жівана Лес зарахінде». Бо ода, со пал Манде пісіме, сіґ обачелапес.

38 Оне пгенде:

— Раєя! Дикг, акєс дуй шаблі.

Ов ленґє пгендя:

— Дос іма.

39 Пал Пескєро обичай, Ісус ґейля про Олівково партос, і Лескєре сікаде ґейле Лега. 40 Сар авля про тган, Ов ленґє пгендя:

— Модліненпес, гой тумен те на авен пробаліме аврі.

41 А коркоро отґейля лендар варекай пре айці, пре кєці шай те чівен о бар, терділя про коча і кєздиндяпес те модлінен. 42 І вакєрелас:

— Даде, те Ту камес, кади кувчі мі обджял Ман! Но мієл на авка, сар Ме камав, а авка, сар Ту камес!

43 Акор сікадяпес Лескє анґєлос пало нєбос і додиня Лескє зор. 44 Ісус минґ бутер модлінеласпес андро мучішаґос. Ачіля Лескєро кгамліпе, сар краплі ратескєре, саве перенас пре пгув. 45 Кана Ов ушіля опре ле молітватар і подґейля ко сікаде, Ов аракгля лен, со оне совен, бо оне сас мучіме ле жалятар. 46 Ісус пгучля лендар:

— Со тумен совен? Ушен і модліненпес, гой те на авен пробаліме аврі.

47 Ов минґ вакєрелас, кана авля бут нийпос, а ленца Іуда, єкг дешудуєндар. Ов джялас анґлал ленде і подавля ко Ісус, гой те чуміден Лес. 48 Та Ісус лескє пгендя:

— Іуда, ту ле чумібнага бікєнес ле Час Манушенґєрес?

49 Кана одала, ко есас ле Ісусога, дикгле, со одя кєрелпес, пгучле Лестар:

— Раєя, а со, те амен демага шабляга?

50 Єкг лендар демадя єкг баредере рашаєскєрес совґас і отчіндя лескє о чачо кган. 51 Та Ісус ленґє отпгендя:

— Доста! Преачен!

Ов дотгодя паліш Пескєро васт кє лескєро кган і сасардя лес. 52 Паліш Ісус пгендя ко єкг баредер рашая те ко храмоскєре сторожа а те пгуредеренґє, саве авле пал Лесте:

— Сар про жіванос тумен авлян пре Манде ле шабленца те ле паценца. 53 Сако дівес, кана Ме сомас машкар туменде андро храмос, тумен на тговенас пре Манде тумаре васта; но канакє тумарі овра і цмакєрі влада.

54 Акор оне хунде ле Ісус і анде Лес ко єкг баредер рашай андро кгєр. А Петро дуралестар джялас пал ленде. 55 Кана розракінде яґ машкар е двовра, о Петро авер манушенца бешля пажо яґ. 56 Єкг совґалкіня дикгля ле Петро андре яґакєро шветлос, міште предикгляпес пре лесте і пгендя:

— Те ов есас Лега!

57 Но Петро отпгендя:

— Ромніє, ме Лес на джянав!

58 Паліш минґ єкг лес дикгля і пгендя:

— Те ту сал лендар.

Та Петро лескє отпгендя:

— Наа, манушея!

59 Преґейля варекай єкг овра, кана минґ єкг патябнага пгендя:

— Чачес, те када есас Лега, бо ов гіно галілєянос.

60 Та о Петро лескє пгендя:

— Манушея, ме на джянав, пал состе ту вакєрес!

І єкгваресте, кана ов минґ вакєрелас, о кугутос заґілядя. 61 Акор о Рай вісаліля і задикгля про Петрос. Акор Петро лепердя Раєскєре лава, саве Ов лескє вакєрелас: «Анґлал ода, сар дадіве заґілявела о кугутос, ту трівал пгенега, со на джянес Ман».

62 Акор Петро ґейля аврі одарік і хундя андре барі жаля те ровен.

63 Мануша, саве лікєренас ле Ісус, бандяркєренаспес пре Лесте і маренас Лес. 64 Оне запганле Лескє о якга і пгученас:

— Пророкін, ко Тут демадя?

65 І бут джюнґ лава вакєренас пре Лесте.

66 Кана ачіля дівес, іскіндепес пгуредера ле нийпоскєре, єкг баредер рашая і танітова Законоскєре, одліґєнде Лес андро Сінєдріон 67 і пгенде:

— Те Ту сал о Хрістос, пген аменґє.

Ов ленґє отпгендя:

— Те Ме туменґє пгенава, тумен на патяна. 68 А те Ме тумендар пгучава, на отпгенена Манґє. 69 Ада дівесестар о Ча ле Манушенґєро бешела чачо сийратар ле Девлескєра зоратар.

70 Акор саворе кєздинде те пгучкєрен:

— Та Ту сал о Ча ле Девлескєро?

Ов ленґє отпгендя:

— Тумен міште пгенен, со ода Ме сом.

71 Акор оне пгенде:

— Со аменґє минґ кампел? Амен коркоре саворо шундям Лескєре муєстар, со Ов пгендя!