4. Mojžišoskro.
4.
O RAJ phenďa le Mojžišoske the le Aronoske: 
„Zgen le muršen andral le Kohatoskri fajta the famelija andral o kmeňos Levi. 
Pisin andre savore muršen tranda (30) beršendar dži penda (50), save šaj keren e služba paš o Svetostankos. 
Lengri služba ela, hoj pes te starinen pal o sveta veci andro Svetostankos. 
Sar ela o časos te sthovel o taboris, o Aron the leskre čhave avena andro Svetostankos, lena tele o andruno pochtan a zaučharena leha e archa la zmluvakri. 
Paľis upre thovena e lepeda le tuleňiskra cipatar a upral e fijalovo lepeda a ispidena andre o dručki. 
Pro skamind prekal o sveta mare thovena e fijalovo deka a upre thovena o taňira, o kuča, o čarore pre obeta a o džbani pre moľakri obeta. O maro ela furt pro skamind. 
Pre oda thovena e ľoľi deka, učharena les andre le tuleňiskre cipenca a ispidena andre o dručki. 
Paľis lena e fijalovo lepeda a učharena andre o svietňikos, o lampi, o kliešťi, o cikne lopatki the savore nadobi pro olejos. 
Pačarena les savore sersamoha andre lepeda le tuleňiskra cipatar a thovena pro dručki. 
Pro somnakuno oltaris thovena e fijalovo lepeda a učharena les andre lepeda le tuleňiskra cipatar a ispidena andre o dručki. 
Paľis lena savoro sersamos, soha pes služinel andro Svetostankos, thovena les pre fijalovo deka, učharena andre le tuleňiskra lepedaha a thovena pro dručki. 
Paloda žužarena o oltaris le žirošne prachostar a čhivena upre e fijalovo deka. 
Pre oda thovena savoro sersamos, saveha pes služinel paš o oltaris: o lopatki pre jag, o vidli, o lopati the o čarore. Učharena savoro andre lepeda le tuleňiskra cipatar a ispidena andre o dručki. 
Sar o Aron the leskre čhave savoro učharena andre a sar kampela o taboris te prethovel avrether, avela le Kohatoskri fajta, hoj oda te ľidžal, ale našťi pes chuden le svete vecendar, hoj te na meren. Kada kerena on paš o Svetostankos, sar pes prethovela o taboris. 
O rašaj Eleazar, le Aronoskro čhavo, pes starinela pal o olejos, pal o voňavo kaďidlos, pal e chabeneskri obeta the pal o olejos pro pomazaňje. Dodikhela pre calo Svetostankos the pre savoreste, so andre hin: pro sveta veci the pro sersamos.“ 
O RAJ mek phenďa le Mojžišoske the le Aronoske: 
„Dodikhen pre oda, hoj maškar o kmeňos Levi o manuša andral o fameliji le Kohatoskre te na meren, ale te dživen. Keren prekal lende kada: Sigeder sar avena paš o sveta veci, avena o Aron the leskre čhave a phenena sakoneske, so te kerel a so te hordinel, 
hoj aňi pro sikra te na dikhen andro Svetostankos pro sveta veci, hoj te na meren.“ 
Dureder o RAJ phenďa le Mojžišoske: 
„Zgen le muršen andral le Geršonoskri fajta the famelija andral o kmeňos Levi. 
Pisin andre savore muršen tranda beršendar dži penda, save šaj keren e služba paš o Svetostankos. 
Kadi ela e služba le Geršonoskra fajtakri: 
On hordinena o stanoskre lepedi, o Stanos, e lepeda le tuleňiskra cipatar, savaha pes učharelas andre, le Stanoskre vudareskri lepeda, 
e vudareskri lepeda andre dvora, e lepeda prekal e dvora the pašal o Stanos the oltaris, o lani the savoro sersamos pre oda. Sthovena savoro a hordinena peha. 
O Mojžiš the o Aron dodikhena pre oda, hoj o Geršoniti te hordinen a te keren savoro, so lenge prikazinena. 
Kadi hiňi lengri služba paš o Svetostankos. Ľidžala len o Itamar, o čhavo le rašaskro le Aronoskro. 
Zgen the le muršen andral e Merariskre fajti the fameliji andral o kmeňos Levi. 
Pisin andre savore muršen tranda beršendar dži penda, save šaj keren e služba paš o Svetostankos. 
Kada savoro hordinena a pal kada pes starinena: Pal o stanoskre rami, dručki, slupi the podstavci, 
pal o dvorakre podstavci, slupi, koľiki the lani a pal o sersamos, soha pes rozthovela o Stanos the e dvora. Phen sakoneske, so mušinela te hordinel. 
Kadi hiňi le Meraritengri služba paš o Svetostankos. Ľidžala len o Itamar, o čhavo le rašaskro le Aronoskro.“ 
Avke sar o RAJ prikazinďa, o Mojžiš, o Aron the o vodci zgende le muršen andral le Kohatoskre fameliji the fajti 
tranda beršendar dži penda, save mušinenas te služinel a te kerel e buči paš o Svetostankos. 
Zgende len a sas 2 750 murša, 
save mušinenas te služinel paš o Svetostankos. O Mojžiš the o Aron len zgende, avke sar lenge o RAJ prikazinďa. 
Sar zgende le muršen andral le Geršonoskri fajta the famelija 
tranda beršendar dži penda, save mušinenas te služinel paš o Svetostankos, 
sas 2 630 džene, 
save mušinenas te služinel paš o Svetostankos. O Mojžiš the o Aron len zgende, avke sar lenge o RAJ prikazinďa. 
Sar zgende le muršen andral le Merariskri famelija the fajta 
tranda beršendar dži penda, save mušinenas te služinel paš o Svetostankos, 
sas 3 200 džene, 
save mušinenas te služinel paš o Svetostankos. O Mojžiš the o Aron len zgende, avke sar lenge o RAJ prikazinďa. 
Sar o Mojžiš, o Aron the o vodci zgende savore muršen andral o kmeňos Levi pal lengre fajti the fameliji 
tranda beršendar dži penda, save mušinenas te služinel a te kerel e buči paš o Svetostankos, 
sas 8 580 džene. 
Avke sar o RAJ prikazinďa, avke o Mojžiš rozďelinďa dojekhe muršeske e služba paš o Svetostankos the o veci, save kampľa te hordinel. Avke sas zgende, sar o RAJ prikazinďa le Mojžišoske.