Job.
4.
Akor o Elifaz andral o Teman odphenďa kavke: 
„Te tuha vareko kamľahas te vakerel, zľidžaha oda? Ale ko pes šaj zľikerel, hoj te na phenel vareso? 
Dikh, tu sikavehas but dženen a o slaba vasta zoraľarehas. 
Tire lava ačhavenas pro pindre oles, ko perelas; tu dehas zor le khočen, so poddžanas. 
Ale sar oda pharipen akana avľa pre tute, našťi ľikeres avri; demaďa pre tu a predaranďiľal. 
Či nane tiri istota oda, hoj lašares le Devles, a tiri naďej oda, hoj džives žužes anglo Del? 
No ča gondoľin, či muľa varekana vareko, ko sas ňevinno? Kaj sas o čačipnaskre zňičimen? 
Andre miro dživipen dikhľom kada: Ola, ko sadzinen o nalačhe veci a rozčhivkeren o bini sar o zrnka, skidena oda upre. 
Soča pre lende o Del dichinela, našľona a e balvaj leskra choľatar len zňičinela. 
O nalačhe hine sar o ľevos, so hino choľamen a kerel vika, ale o Del lenge phagerel o danda, hoj te čhiten. 
O nalačhe hine sar o ľevi, so meren bi o chaben a lengre terne pes rozdenašen. 
Ale ke ma avľa počoral o lav a miro kan olestar sikra šunďa. 
Akor, sar avel pro manuša o zoralo soviben, sas man o nalačhe sune, 
chudňom te daral a izdravas; savore kokala mange razisaľonas. 
Varesavo duchos mange pregeľa pašal o muj a o bala mange pro ťelos ačhile upre. 
Zaačhiľa, ale me les na sprindžarďom, ča varesavi podoba mange ačhelas anglo jakha. Sas cichones a šunďom o hangos: 
‚Či šaj avel o manuš spravodľiveder sar o Del? Abo či šaj avel o murš žužeder sar leskro Stvoriťeľis? 
Te o Del pes na mukel aňi pre peskre sluhi a peskre aňjelenge rachinel e chiba, 
akor sar oda ela olenca, ko hine la čikatar a o zakladi len hin andro prachos? On ena zňičimen sigeder sar o moľos, 
tel jekh džives ena murdarde, našľona pro furt a ňiko olestar aňi na džanela! 
Perena tele sar o stani, savengre koľiki hine avricirdle, merena bi oda, hoj te dochuden o goďaveripen.‘ “