Job.
29.
O Job mek vakerelas dureder a phenďa kada: 
„Oj, te mange uľahas avke sar andre ola čhona varekana, sar andre ola dživesa, sar man o Del stražinelas; 
sar upral miro šero švicinelas leskri momeľi a delas man o švetlos, sar predžavas le kaľipnaha. 
Andre ola dživesa somas terno the zoralo, o Del sas miro prijaťeľis a chraňinelas miro kher, 
o Nekzoraleder mek sas manca a mire čhave sas pašal mande, 
lanďuvavas andre šmetanka a andral miro lisos džalas avri o olejos le prudoha. 
Sar phiravas andre brana le foroskri maškar o phuredera a sar mange zabešavas pre miro than, 
o terne murša man dikhenas a džanas pre sera, o phure ušťenas upre a ačhenas. 
O raja preačhenas te vakerel a chudenas peske o muja. 
O vladci ačhenas čhit a e čhib lenge andro muj priľepisaľolas. 
Oda, ko man šunelas, pal ma mištes vakerelas a oda, ko man dikhelas, man lašarelas, 
bo zachraňinavas le čore manušes, sar peske mangelas e pomoca, a pomožinavas the la širotake, savake na sas ko te pomožinel. 
Oda, ko merelas, mange žehňinelas a la vdovake keravas o radišagos andro jilo. 
O spravodľišagos pre mande uravas sar o gada; o čačipnaskro dživipen sas pre ma sar o plašťos le turbanoha pro šero. 
Mire jakhenca dikhavas vaš o koro a mire pindrenca phiravas vaš o bango. 
Le čorenge somas dad a pro sudos zaačhavas vaš o cudzincos. 
O špicovata danda le nalačheske phagavas avri, andral o danda leske cirdavas avri e korisť. 
Vašoda mange phenďom: ‚Merava mange khere a dživava ajci dživesa, keci hin o zrnka andre poši. 
Avava sar o stromos, kaskro koreňis hino furt andro paňi a pre kaskre konara bešel e rosa caľi rat. 
O manuša man furt lašarena a miri zor te chudel o lukos man šoha na omukela.‘ 
O manuša man šunenas a sas čhit, sar užarenas pre miri rada. 
Sar me dovakeravas, on pes imar na denas anglal; mire lava pre lende kvapkinenas sar paňi; 
užarenas pre lende avke sar pro brišind a phundrade mujenca len pijenas sar o jaruno brišind. 
Šukares pre lende asavas akor, sar pes daranas a slabisaľonas; o švetlos mire mujeskro len delas zor. 
Me len ľidžavas a ačhiľom lengro vodcaske. Sas man ajsi pačiv sar le kraľis maškar peskre slugaďa; sar oda, ko del radišagos olen, ko hine andre žaľa.“