Žalmi.
71.
RAJEJA, ke tu man garuďom, ma domuk šoha, hoj man te ladžav! 
Zachraňin man, bo sal spravodľivo, a le man avri! Visar tiro kan ke ma a pomožin mange! 
Av mange miri skala, kaj man furt šaj avava te garuvel. Rozhodňinďal tut, hoj man zachraňineha, bo tu sal miri skala, miro hrados. 
Devla miro, zachraňin man andral o vast le nalačhe manušestar, andral e burňik le dzive the binošne muršestar! 
Adonaj, tu sal miri naďej, RAJEJA, tuke pačav mire terňipnastar. 
Pre tute man mukav, kanastar uľiľom, andral o per mira dakro sal furt miro ochrancas. Pal tute giľavava o chvali pro furt. 
But manuša peske len mire dživipnastar, bo tu sal miro zoralo hrados. 
Andre miro muj hin pherdo chvali pal tute, sako džives tuke den e slava. 
Ma odčhiv man andre miro phuripen; ma omuk man, sar slabisaľuvav! 
Bo ola, ko pre ma džan, pre ma vakeren; ola, ko man kamen te murdarel, pal ma phenen: 
„O Del les omukľa. Džan pal leste a chuden les, bo ňiko les na zachraňinela.“ 
Devla, ma dža mandar dur! Devla miro, siďar mange te pomožinel! 
De, hoj pes te ladžan a te aven zňičimen ola, ko džan pre miro dživipen. Mi ladžan pes a mi en pokorimen ola, ko man kamen te dukhavel. 
Ale me užarav furt pre tute a furt buter tut lašarava. 
Mire vušta vakerena pal tiro spravodľišagos a sako džives pal tire zachranakre skutki, kajte pes aňi na den te zrachinel. 
Avava a lašarava o zorale skutki le Nekbareder RAJESKRE. Leperava tiro spravodľišagos – ča tiro. 
Devla, sikavehas man terňipnastar a me dži akana vakerav pal tire bare skutki. 
Kajte avava phuro a ela man šiva bala, ma omuk man, Devla, medik na vakerava pal tiri zor avre pokoleňjenge, pal tire zorale skutki savorenge, ko avena pal ma. 
Devla, tiro spravodľišagos, džal dži o ňebos, bo bare veci kerďal. Ko hin sar tu, Devla? 
Kajte mange diňal te prindžarel but pharipena the čoripena, ale pale man obdžiďareha a cirdeha man upre dži telal andral e phuv. 
Tu man deha bareder pačiv a pale man poťešineha. 
A me tuke paľikerava le bašavibnaha pre harfa vaš tiri vernosť, Devla miro. Giľavava tuke o chvali pre citara, Sveto Devla le Izraeloskro! 
Mire vušta radisaľona, sar tut lašarava; the miri duša, savi cinďal avri. 
Miri čhib vakerela calo džives pal tiro spravodľišagos, bo ola, ko man kamle te dukhavel, ľoľile avri a ladžanas pes.