Žalmi.
133.
Le Davidoskri giľi pro drom upre andro Jeruzalem. Dikh, sar mištes the šukares oda hin, sar hine o phrala jekhetane andro smirom! 
Oda hin sar o vzacno olejos pro šero, so čuľal tele pal e brada, pal e brada le Aronoskri, so čuľal dži pro agor pre leskro ruchos. 
Oda hin sar e Chermonoskri rosa, so čuľal tele pro Sionoskre verchi. Bo ode o RAJ bičhavel peskro požehnaňje the dživipen pro furt.