Luka.
17.
O Isus phenđa ple učenikonenđe: “O iskušenja čače ka aven, ali pharo okolese prekala kaste avena! 
Olese ka ovel ine po šukar ki men te ovel lese phandlo baro bar hem te ovel frdime ano more, nego te ćerel jekh akale tikorendar te perel ano greh. 
Arakhen tumen! Te grešinđa nesavi verno osoba, vaćer laće so adava nane šukar, a te pokajinđa pe, oprostin laće. 
I te efta puti ko dive grešini premala tute hem efta puti avela kora tute hem vaćeri će: ‘Kajinav man’, oprostin laće.” 
O apostolja phende e Gospodese e Isusese: “De amen po bari vera!” 
A o Gospod phenđa: “Te isi tumen vera tikori sar zrno oti gorušica, ka phenen ine akale kaštese: ‘Ikal tut oto koreno hem sadin tut ano more!’ I ka šunel tumen ine. 
Kova tumendar ka phenel ine ple slugase, kova handela ili arakhi e bakren, kad irini pe tari njiva: ‘Siđar ava akari hem beš te ha maro’? 
Na li angleder ine ka phenel lese: ‘Ćer maje te hav, phand tut i kecelja hem kande man đikote hava hem pijava, a palo adava tu ka has hem ka pije’? 
Na li valjani te zahvalini e slugase adalese so ćerđa adava so ine lese phendo? Na valjani. 
Ađahar hem tumen, kad ćerena sa so phenđa tumenđe o Devel, vaćeren: ‘Amen injam sluge kolenđe na valjani te zahvalini pe! Ćerđam samo soi amari buti!’” 
I sar o Isus džala ine nakori diz Jerusalim, nakhino maškari regija Samarija hem i regija Galileja. 
I sar đerdini ine ko nesavo gav, nakoro leste ale deš gubavci kola terdine po dur olestar 
hem vičinde: “Isuse, Gospodarona, smilujin tut amenđe!” 
Kad dikhlja len o Isus, phenđa lenđe: “Džan hem mothoven tumen e sveštenikonenđe!” I sar ine džana dromeja, saslile tari guba. 
I jekh olendar kad dikhlja so saslilo, irinđa pe koro Isus slavindoj e Devle oto sa o glaso. 
Pelo anglo lesere pre mujeja đi phuv, zahvalindoj lese. A ov inele Samarijanco. 
Tegani o Isus pučlja: “Na li deš saslile? A kaj pana okola enja? 
Nijekh li olendar na aračhilo te irini pe hem te slavini e Devle, sem akava jekh kova čak nane ni Jevrejco?” 
I phenđa e manušese: “Ušti hem dža! Ti vera spasinđa tut!” 
Jekh dive o fariseja pučle e Isuse kad ka avel o carstvo e Devlesoro. O Isus phenđa lenđe: “O carstvo e Devlesoro na avela e znakonencar saven ka šaj te dikhen tumare jaćhencar. 
Naka šaj te phenel pe: ‘Ače akatei!’ ili ‘Eče adari!’ Adalese soi o carstvo e Devlesoro maškara tumende!” 
Tegani phenđa ple učenikonenđe: “Avela o vreme kad ka mangen te dikhen jekh oto dive kad me, o Čhavo e manušesoro, ka vladinav sar caro, ali naka šaj te dikhen. 
O manuša ka phenen tumenđe: ‘Eče adari!’ ili ‘Ače akatei!’ Ali ma džan olencar te roden man! 
Adalese so o aviba e Manušesere Čhavesoro ko lesoro dive ka ovel sar i munja kad čhinela taro jekh krajo e nebosoro, a svetlini ko dujto. 
Ali angleder adalestar valjani but te patinav hem te ovav odbacime akala generacijatar. 
Hem sar so inele ano vreme kad o Noje živinđa, ađahar ka ovel hem ano vreme kad me, o Čhavo e manušesoro, ka avav. 
O manuša ine hana hem pijena, lena pe hem dena pe sa đi o dive kad o Noje đerdinđa ki barka. Tegani alo o baro pani hem tasavđa sarijen kola na inele ani barka. 
Ađahar da inele ano vreme kad o Lot živinđa. O manuša ani diz Sodoma ine hana hem pijena, činena hem biknena, sadinena hem vazdena čhera. 
A ko dive kad o Lot iklilo tari Sodoma, odupral sar bršin peli jag hem žuta bara save thabljona hem mudarđa sarijen kola ačhile ani diz. 
Ađahar da o manuša naka oven spremna ko dive kad me, o Čhavo e manušesoro, ka avav. 
Ko adava dive, ko ka ovel upro čher, a lesere stvarija ano čher, ma te huljel te lel len. Ađahar da, ko ka ovel ki njiva, ma te irini pe čhere palo ple stvarija. 
Setinen tumen so ulo e Lotesere romnjaće! 
Ko dikhela te arakhi plo dživdipe, naka ovel le večno dživdipe; a ko našali plo dživdipe, ka ovel le večno dživdipe. 
Vaćerava tumenđe, ki adaja rat kad ka irinav, duj džene ka pašljon ko jekh than e pašljojbnasoro. Jekhe ka lel pe, a e dujtone ka ačhaj pe. 
Ka oven duj đuvlja kola zajedno ka ćeren hajbnase. Jekha ka lel pe, a e dujtona ka ačhaj pe. 
Duj murša ka ćeren buti ki njiva; jekhe ka lel pe, a e dujtone ka ačhaj pe.” 
I on pučle e Isuse: “Kaj, Gospode?” A ov phenđa lenđe: “Kaj isi mulo telo, adari čedena pe o lešinarija.”