Sa Buka te Zobi.
1.
Koa nana si keke tie, pozana si e Zobi, sapu koa pa popoa Uzi. Na tie toṉoto si asa meke loke nana tinazutu; pamaṉa nia sa sa Tamasa meke kopu si asa pude lopu tavete va sea. 
Ka zuapa tuna koreo si asa meke ka ṉeta tuna vineki, 
meke tagoi sa si ka zuapa tina sipi, ṉeta tina kameli, keke tina bulumakao, meke ka lima gogoto doṉ'ki. Soku hola tugo nana nabulu si asa, meke na tie tagotago hola ni sa sari doduru tie pa kali gasa rimata. 
Sari na tuna koreo Zobi si hoke varivari hobei nia rini sa tinavete inevaṉa pa hopeke dia vetu, vasina hoke la si arini, meke hoke ruvati rini sari ka ṉeta tasidia vineki pude la somana hena na napo turaṉi. 
Pa vina betodi rina hopeke inevaṉa, si hoke vaṉunu munumunu hokara se Zobi meke vukivukihi va uququ poni sa sari hopeke nana koburu pude va via i, gua. Hoke tavete gua si asa sina balabala ia sa sapu meke gua, meke zama va kaleana hola si arini la koasa Tamasa pa bulodia, gua. 
Sipu kamo sa rane pude kamo la pa kenuna e Zihova sari na mateana pa Maṉauru, si e Setani tugo si somana la. 
Nanasia Zihova si asa, “Pa totoso ele hola, pavei si koa mae gua agoi?” Olaṉa se Setani, “Arau si ene la mae mo pa korapana mo sa kasia popoa,” gua. 
“Vegua dogoria tugo goi sa Qua nabulu se Zobi? Loke tie pa pepeso sapu toṉoto na leana gua asa. Vahesi Au sa si Arau, meke sapu pamaṉa Nau sa meke kopu sisigiti nia sa pude lopu tavete va sea.” 
Olaṉa se Setani, “Vea, kote boka pamaṉa nigo Zobi si Agoi pana loke nana likakalae si asa? 
Na Agoi mo kopu nia doduru totoso si asa meke sari nana tamatina meke sari doduru tiṉitoṉa pu tagoi sa. Agoi mo mana ni sari doduru tiṉitoṉa pu taveti sa, meke Agoi poni va soku nia bulumakao pude va siṉia rini sa pepeso, gua. 
Ba kamahire pana vagi pani beto ni Goi sari doduru tiṉitoṉa pu tagoi sa si kote zama va kaleana Igo sa pa Kenumu!” 
Meke olaṉa se Zihova koe Setani, “Leana mo. Sari doduru pu tagoi sa si koa pa mua ṉiniraṉira agoi, ba se Zobi mo telena si mu lopu tiqu la ia.” Ke taluarae taloa se Setani. 
Keke rane sipu korapa henahena na napo vaeni sari na tuna Zobi pa vetu tanisa tasidia kenuna, 
si kamo la si keke tie paleke inavoso koe Zobi meke zama, “Sipu korapa geli pepeso pude lelete sari na bulumakao pa inuma, meke sari na doṉ'ki si korapa gani duduli pa vasina lopu seu koa rini, 
si rapata va hodaka mo sari na tie Sabeani meke hiko taloa beto ni sari doduru. Va mate betoi rini sari doduru mua nabulu. Arau mo telequ si govete pude mae tozi nigo si agoi!” 
Sipu lopu ele beto zama si asa, si mae gana pule si keke nabulu meke zama, “Na nika te Tamasa si hoqa gore mae pa maṉauru meke sulu va matei sari na sipi meke sari na tie kopu sipi. Arau mo telequ si govete pude mae tozi nigo si agoi,” gua. 
Sipu lopu ele beto zama si asa, si mae gana pule si keke nabulu meke zama, “Ka ṉeta puku tie Babiloni, pu ene la pude raza la i sari na kana meke hiko tiṉitoṉa koarini, si mae rapata meke vagi taloa ni sari na kameli, meke va mate betoi sari mua nabulu. Arau mo telequ si govete pude mae tozi nigo si agoi,” gua si asa. 
Sipu lopu ele beto zama si asa, si mae gana pule si keke nabulu meke zama, “Sari na tumu si korapa henahena na napo vaeni pa vetu tanisa tumu koreo kenuna, 
meke raza va hodaka mae si keke givusu ṉiṉira, mae guana pa qega, meke hiru va hoqa ia sa sa vetu meke mate beto sari doduru. Arau mo telequ si govete pude mae tozi nigo si agoi,” gua. 
Sipu avosi Zobi si arini si turu sage meke daku rikatia sa sa nana poko pa tinalotaṉa. Neri va golugolua sa sa batuna meke hoqa gore pa pepeso pa vinahesina sa Tamasa. 
Zama si asa, “Dododohoqu totoso podo si arau, meke kote dododohoqu totoso mate si rau. E Zihova mo poni au, meke kamahire si e Zihova tugo vagi pani. Mani tavahesi sa Pozana e Zihova!” 
Pa korapadi ri doduru tinasuna pu raza koe Zobi, si lopu hite tavete va sea meke lopu zutua sa sa Tamasa.