Sa Buka Kinabo te Zeremaea.
1.
Kei, ivulu sa popoa Zerusalema, sapu hoke siṉi ia na tie! Namu gua tugo na naboko si asa, sapu tatasana arilaena koari na butubutu baṉara! Sa kalaho koari na vasileana nomadi si na pinausu mo kamahire. 
Pana boṉi si kabo sisigiti si asa, sari kolomatana si koa mo pa paparana. Koari doduru nana babaere lopu keke si koa pude va manotia. Qoraqora nia ri doduru nana baere si asa; ura na kana ia tu rini kamahire. 
Pa tinasigiti meke tinavete mamata, vasina si ta raovo la se Ziuda. La koa turaṉi sa sari butubutu karovodi; loke nana vasina pude magogoso. La kamoa ri doduru pu kana ia na ta pusi ke lopu boka siba. 
Sari siraṉa la pa Zaione si guari tie talotaṉadi, ura loke tie si mae koari nana rane inevaṉa hopedi. Doduru nana sasada nuquru si ivulu, talotaṉa sari na hiama, kabo sari na vineki, meke Zaione si kuliusu. 
Sarini pu kukiti nia si ta evaṉae na nana palabatu; na bokabokadi sari nana kana. E Zihova mo va kilasia si asa koa gua koari soku sinea tanisa. Sari nana koburu si ta raovo taloa, la pinausu koari pa popoa seu. 
Taloa beto sari tinolava tanisa vasileana pa Zaione. Sari tuna koreo sa baṉara si guana kurukuru dia sapu lopu dogoro duduli; pa inovia si govete si arini koari na tie pu hukue ni. 
Koari nana rane tinalotaṉa meke tinasigiti si balabala pulei Zerusalema sari doduru nana tinagotago sapu tagoi sa pukerane. Kamahire si pa limadia ri nana kana si asa, loke tie si koa pude toka nia. Doṉo la ia ri nana kana meke hegere nia sa nana hinoqa na tinahuara. 
Ele noma hola sa sinea te Zerusalema meke boni si asa koari nana sinea. Kamahire kilu ia ri doduru pu hoke va lavatia, ura ele dogoria rini dodohona; asa telena ba kurekure ke tomea sa sa isumatana. 
Sari nana sinea si guana boni sapu napiti pa nana poko; sapu vugo repere si lopu balabala ia sa. Sa hinoqa tanisa si kaleana hola, meke loke tie si koa pude va manotia. Zama se Zerusalema, “Kei Zihova, doṉo mae ia sa qua tinasigiti, ura ele va kilasau sa qua kana.” 
Sari limana sa nana kana si saputu vagi sari doduru nana tinagotago; dogori sa sari butubutu huporodi sapu nuquru pa nana Zelepade hopena, sarini pu hukati Agoi pude somana pa Mua vinarigara hopena. 
Doduru nana tinoni si kabokaboi meke hata bereti; vari hobeni ginani rini sari dia tinagotago pude toa dia. Ke zama se Zerusalema, “Kei Zihova, doṉo mae. Mamu balabala au, ura ta etulu si rau.” 
“Vegua, loke ginuguana koa gamu sia, doduru gamu pu ene hola? Doṉo vari likohae, mamu dogoria. Vea, koa dia kaiqa vina kilasa sapu gugua taqarau, sapu ta raza nia rau, sapu e Zihova va kamo nau, koasa rane sapu ta ṉaziri si Asa? 
Panaulu tu garunu gore mae gunia Sa sa nika; pa susuriqu garunu nuquru la nia Sa. Ivara nama nia vaqara Sa sari nenequ meke va taliri pule au Sa. Doloviviriqu meke veko pani au Sa, mabubulu doduruna sa rane. 
Sari na qua sinea si ta pusi varigara meke mamata guana ioki; pa Limana Sa ta tigisi varigara. Mae hake si arini pa ruaqu meke vagi pania e Zihova sa qua ṉiniraṉira. Vala nau Sa koa rini pu ṉiṉira hola nau si arau. 
Kilui e Zihova sari doduru qua varane; tioko va mae ia Sa si keke qeto minate pude mae raza au pude va matei sari qua tie vaqura. Pa Nana munamunalana vaeni si neti munalia Sa sa popoa Zerusalema sapu tataru hola nia Sa. 
Gua asa ke kabo si rau meke titisi sa kolomata pa mataqu. Loke tie si koa tata pude va manoto au, loke tie pude va ṉiṉira pule ia sa maqomaqoqu. Sari qua koburu si doloviviri sina sa kana si ṉiṉira hola.” 
Qaqama vurani Zaione sari limana, ba loke tie si koa pude va manotia; na ele tozia e Zihova koe Zekopi sapu sari nana baere mo kote kana ia si asa; na Zerusalema si ele ta evaṉae keke tiṉitoṉa bonina koari nana kana. 
Zama se Zerusalema, “Se Zihova si toṉotona, ba arau mo sekei sari Nana tinarae. Avoso mae, gamu doduru tinoni; doṉo mae koari qua tinasigiti. Sari qua koreo vaqura meke vineki vaqura si ele ta raovo taloa. 
Tioko la i rau sari butubutu pu tavete ni vinariva egoi rau ba qoraqora nau rini. Sari qua hiama meke qua koimata si mate pa korapa vasileana nomana totoso hata ginani rini pude harupi sari dia tinoa. 
Kei Zihova, doṉo mae ia sa tinasuna koa ia rau! Ta sigiti hola qua, meke ta duaṉa sa buloqu ura na va gugue hola si arau. Pa siraṉa si va mate tie sa vedara; pa korapa vetu si na minate mo si koa. 
Avosia mo ri na tie sa qua tinalotaṉa, ba loke tie si koa pude va manoto au. Doduru qua kana si ele avoso nia sa qua kinuliusu; qetu nia rini gua sapu tavete mae nia Goi koa rau. Mu va kamo mae ia sa rane tadirini sapu tozia Goi pude madi tasuna gugua arau si arini. 
Mamu dogori sari doduru dia kinaleana; Mamu va kilasi gua sapu va kilasa guni nau Goi si arau koa gua koari doduru qua sinea. Sa qua kinuliusu si noma hola meke mabubulu sa buloqu.”