Kinabo te Zeremaea.
2.
Kei, latu e Zihova meke va opoadumu nia Nana tinaṉaziri se Zerusalema pa Zaione! Nomana sa hinoqa gore tanisa, ta huara va kaleana sa vasileana tolavaena pa Izireli; lopu balabala ia Sa sa Nana hakehakeana nene pa rane sapu ta ṉaziri si Asa. 
Loke Nana tataru se Zihova totoso huari Sa sari doduru vetuvetu te Zekopi; pa Nana tinaṉaziri si huara pani Sa sari gobana sa vasileana Zerusalema pa Ziuda. Sa butubutu baṉara meke sari koburu tavia si kurekure totoso va gore i Sa pa pepeso. 
Pa korapa tinaṉaziri si kumati Sa sari doduru ṉiniraṉira pa Izireli. Vagi pule nia Sa sa Lima mataona totoso kamo mae sa kana. Katu ia Sa koe Zekopi sa nika huruṉuna sapu halala koari doduru tinago te Izireli. 
Guana kana si Asa sapu ṉavea sa Nana bokala, si va nama sa Lima mataona. Guana kana si va matei Sa sari doduru pu goto la pa matana, va arahia Sa guana nika sa Nana tinaṉaziri koasa vasileana Zerusalema pa Zaione. 
Se Zihova si guana keke kana; huara pania Sa si pa Izireli. Huari Sa sari doduru nana vetu baṉara meke sari nana vasileana ta gobadi. Sa tinalotaṉa meke tinaruqoqo si va soku ponia Sa sa vasileana Zerusalema pa Ziuda. 
Seke ilasia Sa sa Nana Zelepade; huaria Sa sa Nana vasina varivarigarana. Va murimuri taloa ni e Zihova sari binalabala te Zaione koari na totoso inevaṉa meke sari rane Sabati; pa Nana tinaṉaziri si kilui Sa sari baṉara na hiama. 
Korona nia e Zihova sa Nana hope meke veko pania Sa sa Nana Zelepade. Vala ni Sa koari na kana sari gobadi ri na vetu baṉara te Zerusalema; iraṉa si arini pa korapa vetu te Zihova kekeṉoṉo gua sapu tavetia rini pa rane inevaṉa. 
Vizatia e Zihova pude huara gore nia sa goba pa vari likohaena Zerusalema pa Zaione. Ṉava pakia Sa sa vasina kote huaria Sa meke lopu va noso ia Sa sa Limana pude huhuara. Va kabo i Sa sari na goba patu na vetu hakehakeina; keke gua mo murimuri taloa dia. 
Sari na sasadana si lodu gore la pa pepeso; huari Sa sari na rotodi. Sari baṉara na koburu tavia si ta raovo taloa la pa votiki popoa, sa tinarae si loketoṉa, meke sari nana poropita si noso, na lopu vagi dinogodogorae koe Zihova. 
Sari koimata te Zerusalema pa Zaione si habotu pa pepeso meke lopu kulu; na kavuru si veko lani rini pa batu dia meke va sage poko baika. Sari barikaleqe vaqura pa Zerusalema si todoṉo eko mo sari batu dia. 
Ele mabo kabo sari mataqu, na pa korapaqu tu ta sigiti si rau, sa buloqu si ta zoropo la pa pepeso sina ta huara sari qua tinoni, sina sari koburu na haha si mabubulu koari siraṉana sa vasileana nomana. 
Zama si arini koari tinadia, “Avei sa bereti meke vaeni?” sipu korapa mabubulu guana tie ta sekedi si arini koari na siraṉana sa vasileana nomana, meke sipu korapa goregore mo sari dia tinoa pa limadia rina tinadia. 
Sa kote gua si arau pude zama poni igo? Na sa kote boka va padapada nigo arau, kei, agoi Zerusalema? Na sa kote boka va padapada nigo arau, pude maqu va manoto igo, kei, Zerusalema pa Zaione? Sa bakoramu si lohi gua tugo na lamana peava. Esei kote boka salaṉa igo? 
Sari dinogodogorae tadi mua poropita si kokoha meke loke laedi; lopu tozi rini sari mua sinea pude va balau igo koasa tinaraovo. Sari zinama vatu ni rini koa goi si kokoha meke turaṉa va sea igo rini. 
Doduru pu ene hola koa goi si popohara atuni lima dia koa goi; hegere si arini meke hiruhiruni batudia koasa popoa Zerusalema meke zama: “Hie tugo sa vasileana nomana sapu ta pozae sa vasileana tolavaena hola, sa qinetuqetu tanisa kasia popoa?” gua. 
Doduru mua kana si tukeli rini ṉuzudia meke ṉaṉara atu koa goi; hegere meke garata livo meke zama, “Kamahire va eoṉo ia gita. Hie sa rane sapu aqa nia gita; namu toa kamoa gita pude dogoria,” varigue. 
Ele tavetia e Zihova gua sapu balabala ia Sa; ele va gorevura ia Sa sa Nana zinama sapu tozi vura nia Sa pukerane. Loke Nana tataru totoso huara gore nigo Sa; va malumu ia Sa sa kana pude eri nigo, meke sovutu ia Sa sa ṉiniraṉira tadi na mua kana. 
Sari bulodi ri na tinoni si kabo vura la koe Zihova. Kei, sa gobana sa vasileana nomana pa Zaione, sari kolomatamu si va totolo guni na ovuku rane na boṉi; mu lopu makudo, sari matamu si lopu va magogosi. 
Tekulu, mamu kabo vura pana boṉi, sipu podalae kopu sari na tie kopu pana boṉi; mu va totolo vura nia sa bulomu guana kolo pa kenuna e Zihova. Ovulu sage lani koa Sa sari limamu mu tepatepa poni sari mua koburu, arini pu malohoro pa inovia koa ri na varipaza siraṉa. 
Zama se Zerusalema, “Kei Zihova, doṉo mae, Mamu balabala au: Esei si ele tavete guni nia Agoi hie? Kaqu hena i tu rina barikaleqe sari tudia soti, sari koburu sapu kopu sisigiti ni rini? Kaqu tava mate tu sari na hiama na poropita pa korapa Zelepade te Zihova? 
Sari tie vaqura na barogoso si eko varigara koasa kavuru pa siraṉa; sari qua koreo vaqura na vineki vaqura si mate pa vedara. Agoi va matei koasa rane sapu bugoro Agoi; loke Mua tataru meke seke matei Agoi. 
Gua sapu tioki Agoi sari na tie mae pude somana pa rane inevaṉa, si tioki Agoi saripu rapata pa doduru vari kaliqu. Koasa rane sapu ta ṉaziri se Zihova si loke tie si boka govete babe boka toa; sarini pu kopu ni meke va noma i si va matei ri na kana.”