Sa Buka Emosi.
1.
Hire sari na zinama te Emosi, keke koari na sepati pa Tekoa, sa nana dinogodogorae pa guguana Izireli sapu vata dogoro nia Tamasa koa sa, karua vuaheni sipu lopu ele kamo sa niu lavata, totoso e Uzaea si baṉara pa Ziuda meke e Zeroboami sa tuna koreo e Zehoasi si baṉara pa Izireli. 
Zama se Emosi: “Se Zihova si kurumu vura mae gua pa Toqere Zaione meke sa mamalaiṉina si lulusu vura pa Zerusalema; sari duduli pa pezara vasina kopu sipi sari na sepati si mate, meke sari huda pa batu toqere Kameli si harahara.” 
Hiera gua si zama nia e Zihova: “Koari ka ṉeta sinea te Damasikasi meke kamo ka made sinea, si lopu kaqu va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu la huara va kaleania sa sa popoa Qileadi meke vagia sa, 
ke kote garunu la nika si Arau koasa vetu baṉara sapu kuria Hazaelo, meke kote ta sulu palae sari vasidi ta gobadi te Beni Hadadi sa baṉara. 
Kote seke gore nia Rau sa tukutuku sasada koasa goba pa Damasikasi; kote huara ia Rau sa baṉara sapu koa pa Lolomo pa Aveni meke asa pu tuqena sa kolu binaṉara pa Beti Idini. Sari tie pa Siria si kote ta raovo pule la pa Kiri,” 
Hiera gua si zama nia e Zihova: “Koari ka ṉeta sinea te Qaza meke kamo ka made, si lopu kaqu va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu sari vasileana dodurudi si hoke raovo taloani sa meke la holuholu ni sa pa Edomu, 
ke kote garunu la nika si Arau koari na goba pa Qaza sapu kote sulu i sari nana vasileana ta gobadi. 
Kote va mate pania Rau sa baṉara pa Asidodi meke asa pu tuqena sa kolu binaṉara pa Asikeloni. Kote taliri la nia Rau sa Limaqu pa Ekoroni, osolae mate beto sari pa Pilisitia,” 
Hiera gua si zama nia e Zihova: “Koari ka ṉeta sinea te Taea, meke kamo ka made, si lopu kaqu va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu sari vasileana dodurudi si hoke la holuholu ni sa pa Edomu, lopu kopu nia rini sa dia vinariva egoi tinamatasi koari na Qua tie, 
ke kote garunu la nika si Arau koari na goba pa Taea sapu kote sulu i sari nana vasileana ta gobadi.” 
Hiera gua si zama nia e Zihova: “Koari ka ṉeta sinea te Edomu meke kamo ka made, si lopu kaqu va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu hadu luli nia vedara sa sa tasina koreo, loke nana tataru hokara, pa nana binugoro si raza pilipule ia mo sa si asa meke sa nana tinaṉaziri si huruṉu lamo, 
ke kote garunu la nika si Arau pa Temani sapu kote sulu i sari vasileana ta gobadi pa Bozira.” 
Hiera gua si zama nia e Zihova: “Koari ka ṉeta sinea te Amoni meke kamo ka made, si lopu kote va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu hova va rikati sa tiadi sari barikaleqe molumoludi pa Qileadi pude hoda i sari nana voloso pepeso, 
ke kote garunu la nika si Arau koari na goba pa Raba sapu kote sulu i sari nana vasileana ta gobadi pa vari korapadi rina iraṉa na kukili koasa rane varipera, pa korapa givusu ṉiburuna pa totoso raneboṉi. 
Sa nana baṉara meke sari nana koimata, si kote varigara la tugo pa tinaraovo,”