Ng'oong'uutyēēt.
5.
Nto mii yoo, akas kitaabuut nyēē wuu makateet nyēē /kēētooyē. /Kikeesir kitaabuunaa wook tukwaay ānkimii āwutaab taay nyēbo chiichoo kiibuurēē ng'echeraanaa wōō. /Kikikēēnuchēē kitaabuunaa tukuuk tisab. 
Kyaakas malayikeet nyēbo kāāmuukēywēēk kukuurchinē barak kule, “Ng'oo ꞉nyēē yemaat kōōnēm tukuuchoo /kikēēnuchēē kitaabuut, sukung'aany kitaabuunaata?” 
Nteenee, māmii ꞉chii barak, wōlēēb kōōrēēt nto ku *kāābkwoombiich nyēē imuuchē kuyaat kitaabuunaa nto mbo kukas āriit. 
Kyaariir ankaariir, kuuyu kimāmii ꞉chii nyēē kiyemaat kuyaat nto kukas kitaabuunaata āriit. 
Nto mii yoo, kumwoowoo ꞉boontēēt akeenke ām booyichoo kule, “‑Meeriir. Kāākōōbēliis ꞉chiichoo kuu ng'ētunytaab Yuuta nyoo rutunēē tiikiityoontēētaab *Tāwuti ānkuchōōnēē kōōnyii. Imuuchē ꞉chiichooto kōōnēm tukuuchoo tisab choo /kikēēnuchēē kitaabuunaa ankuyaat kitaabuut.” 
Nto mii yoo, akas *Mēēnkit nyēē wuu nyēē /kakeebakach kukēēyyoonyēē yēē mii ꞉ng'echeraanaa wōō kukāmuut ꞉tukuuchoo ang'wanu āk booyichoo. Kiboonto ꞉Mēēnkoo kuuynook tisab ākoo koonyek tisab. Tāmirmirookaab Yēyiin ꞉chooto tisab chēē /kiikiiyooktooy kuba kōōrēēt kumukuul. 
Kiwokōōnēmunēē ꞉Mēēnkoo chiito nyoo kimii ng'echereetaab bāytooyiisyēēt kitaabuunaa kumii āwutaab taay nyēbo chiichooto. 
Yu kayey kuu nyooto, kōōryookyi keey ꞉tukuuchoo ang'wanu ākoo booyichoo tibtēm āk ang'wan taayeetaab Mēēnkoo. Kiboonto ꞉chii ake tukul ām booyichoo bukantiit ākoo kibuumbōōk chēbo *ta-aabuut chēē mii ꞉tukuuk chēē boong'u ꞉yyētiing'waa nyēē anyiny, nto chooto ku soowuutēkaab biikaab Kiriistō. 
Kityēēn tyēēnto nyēē lēēl nyēē mwooyē kule, “Iyemaat inam kitaabuunaa ānkiinēmu tukuuk choo /kikēēnuchēē, kuuyu /kikeebakachiing' sukuwālāng' ꞉korotiikuuk biiko kukwaanee kuutuweek tukul, aroosyek tukul, bōrōryōōsyēk tukul āk yēēmōōsyēk tukul kukwa wōlēē mii ꞉Yēyiin. 
Kiiyey ꞉inyiing' icheek kuyēk bāytooyik kubāytooyiis ām kōōrēēt ānkuyēchinē Yēyiintēēnyoo yiisyēēt.” 
Nto mii yoo, akas malayikaanik chēē kiyitē kisyēērōōk chēē mātinyē rarwa. Kiimuut ꞉malayikaanichaa ng'echeraanaa wōō āk tukuuchoo ang'wan āk booyichoo kutyēēntōōs. 
Kityēēnchinē barak kule, “Yemaat /kēēsilto Mēēnkoo /kikēēbākāchē. Inee ꞉nyoo tinyē kāāmuukēywēēk, bāytit, kiirnātēēt āk nkuruuk. /Kēēkoonyit, /kiitōrōōr /ankiikaasta!” 
Yooto akas kiito ake tukul nyēē soboot ām barak, nyēē mii kōōrēēt, nyēē mii araarayta āk mbo nyēē mii kāābkwoombiich kutyēēnē kule, “Kusilākoy ākookoy ꞉chiichoo kēēbuurēē ng'echeraanaa wōō ānkusilākoy ꞉nkinee Mēēnkoo. Koonyitootiin ꞉icheek ānku wōōyēch ānkuboonto kāāmuukēywēēk kēnyiis āk kēnyiis!” 
Nto yityo kumwooy ꞉tukuuchoo ang'wanu kule, “Kuwuuyiit nyooto.” Kukutuny ꞉booyichoo ānkuyim kusiltooy Yēyiin.