18
2d. David bilamar-onosadgi nakwisad
(18:1–22:1)
David e-negsemaid onasgumai gusad
(2 Samuel 8:1-14)
1 We-ibmar-gusad-sorbali, David, Filistea-sordamar-ogalakusad, degi, e-maiga imaknonibalid. David, Filistea-dulemar-ibe Gat-neggwebur sunonibalid, e-neggwebur-burwiganase-bakar, sunonikid.
2 David, Moab-dulemar-ogalakunonibalid, geb e-maiganga imaksad. Deginbali, David, Moab-dulemar-mani-bennukdii-gumalaga imaksabalid.
3 A-ukinbali, David, Hamat-neg-nugadgi, Soba-e-rey-Hadad-Ezer Éufrates-diwarba-yar-suega-gunaigu, Hadad-Ezer-ogalakusbalid.
4 Agi, David, Hadad-Ezer-ibe:
Ur-napagined miligwen (1,000) susad,
sordamar-moligi-sii-urwemalad miligugle (7,000) gasad,
dulemar-napagi-urwemalad mili-dulagwen (20,000) gasbalid.
Ur-napaginedgi-moli-atinnarmalad-e-mali-gasi siksa gusbalid.
Unnila molimar-dulatar (100) oakalossulid, ur-napaginmaladga urbisad.
5 Geb degi, Siria-sordamar-Damascoʼginmalad, Soba-e-rey-Hadad-Ezer-bendakega nonimarmoganad. Degi-inigwele, David egi-obichabalid. David, Siria-sordamar mili-dulagwen-gakabo (22,000) ogilononikid. 6 Degine, geb David, e-sordamar Siria-yargi, Damasco-neggweburgi-nakulemalaga urbisad. Siria-dulemar David-maiga gunonimalad. Deginbali, David, Siria-neggweburga mani-bennukleged-igar mesisad. Bab-Jehová, David-bia-bila-ononadele, emargi-obinega David-imakdaed.
7 Deginbali, David, Hadad-Ezer-sordamar-sigu-abgamalad-orbiid-ebusadi, e-ibe susbalid, geb Jerusalénʼse sesa gusad. 8 Deyobbali, David, Hadad-Ezer-e-neggweburmar Tibhatʼye-nugadgi, degi, Cunʼye-nugadgi, esgoro-gordikid-bukidar susbalid. A-esgoro-gordikidmar, Salomón, dii-sied-dummad-sobega ebusad, degi, buarmar-esgoro-gordikidbiid-sobega ebusbalid, deginbali, ibmar-Bab-Dummadse-goled-neggi-ebulemalad-sobega ebusbalid.
9 Hamat-e-rey-Toi wisgusad, David, Soba-e-rey-Hadad-Ezer-e-sordamar bela obelosye. 10 Ar Hamat-e-rey-Toi, Hadad-Ezer-e-isdaradmosoggu, Rey-Davidʼga nuedye-sogegala, degi, Hadad-Ezerʼgi-nakwisad nued-be-imaksaye ega sogbaligala, ese e-machi-Adoram barmialid. Degidbali, Toi, ibmar-akar-akar-orgi-sobarmalad, manimar, degi, ibmar-esgoro-gordikidgi-sobarmalad Davidʼga barmialid.
11 David, bela Toi-ega-ibmar-uksadi, Bab-Jehováʼga uksad. Deginbali, dulemar-ibe manimar-susbalidi, degi, ormar-susbalidi, Bab-Dummadga uksabalid.
We-dulemar-ibe susgusad:
Edom-dule, Moab-dule, Amón-dule,
Filistea-dule, degi, Amalec-dule.
12 Deginbali, Sarvia-machi-Abisai, Balu-Nebagi miliambe-gakabaabak (18,000) Edom-dulemar-ogilosad. 13 Degine, Abisai, Edom-yargi dule-nakulemalad-urbenonikid. Agine, geb bela Edom-dulemar David-e-maiganga gunonimalad. Bab-Jehová, David-bila-ononadele, e-isdarmaladgi-nakwega imakdaed.
David-e-dulemar-idumalad
(2 Samuel 8:15-18; 20:23-26)
14 David bela Israel-yargi negsemaidgine, nue-itoakwaa dulemarga negsemai gusad, innikii e-dulamar-semai gusad.
15 David-e-dulemar-idumaladi, wemalad:
Sarvia-machi-Joab, sorda-bila-onomalad e-dummadid.
Ahilud-machi-Josafat, garda-narmaked-e-dummadid.
16 Ahitob-machi-Sadoc, degi, Abiatar-machi-Abimelecʼbogwa,
dule-irwa-Bab-Dummadse-gormaladid.
Savsa, Davidʼga garda-narmakedid.
17 Joiada-machi-Benaía,
Cereteo-dulemar, degi, Pelet-dulemar-e-dummadid.
Geb David-masmaladina, dummagan-negsedimaladid.