26
Bab-Dummadse-goled-neg-sunna-seleged-soblegoed
(Éxodo 36:8-38)
1 Bab-Jehová Moisésʼga sogdebalid:
“Anse-goled-neg-sunna-seleged be soboed.
Be sobega, lino-mor-nued goambe (10) be ebugoed.
Deginbali, be nirbadub-arad,
nirbadub-suir-akwagiid,
degi, nirbadub-ginnid be ebubaloed.
Agine, baliwitur-dummagan-querubinʼye-nugad,
bela nue-yeerdakle-imakar, a-morgi be sobbaloed.
2 Bela mormar-e-suguedi, daligugledbi (7) be imakoed.
E-matardungueddi, daligwenadbi be imakoed.
Mormala bela emarbi-dungu be imakoed.
3 Mor-dummagan-goatale be gwadi-gwadi imakoed.
Baid-mormar-goataledi amba gwadi-gwadi be imakbaloed.
4 Degine, mor-goataled-gwadialed-e-dikargi e-uayamar dub-aradgi ega be nasikoed.
Amba deyob mormar-baigan-goataled
gwadiarmalad-e-dikargi be imakbaloed.
5 Mormar-goataled-gwadiarmaladgi
e-uayamar gwadulabo-gakambe (50) be nasikoed.
Degine, baigan-goataled-gwadiarmaladgi
amba gwadulabo-gakambe (50) be nasikbaloed.
E-uayamar abin-abin be nasikoed.
6 Mor-nasiked orbi dulabo-gakambe (50) be imakbaloed,
adi, mormar-goataledi, baigan-mormar-goataledbo be oatogegar,
adi, anse-goled-neg-sunna-seleged-e-mor unnila gogwenayob guegar.
7 Sibad-absar mor-dummaganga be imakbaloed,
adi, anse-goled-neg-sunna-seleged-birgi anwegar.
A-mormar-dummagan goambe-gakagwensak (11) be imakoed.
8 Mormar-e-sugued, daligugle-gaka-abala sugue (7½) be imakoed,
e-matardungueddi, daligwen be imakoed.
Mormar-dummagan goambe-gakagwensakad (11) bela emarbi-dungu be imakoed.
9 We-mormar-dummagan, goatar be gwadioed,
degine, baid goanergwa (6) be gwadibaloed.
Geb anse-goled-neg-sunna-seleged-e-yawagak-asabin, mormar-dummagan-goanergwad-e-gogwenad-napid be nubyar nasikoed.
10 Geb a-sorbali, mor-dummad-dikarba gwadulabo-gakambe (50) e-uayamar be nasikoed.
Amba deyob baigan-gwadilesmalad-dikarba e-uayamar be nasikbaloed.
11 Deginbali, esgoro-gordikid-dulabo-gakambe (50) mor-gamalad be imakbaloed.
Wemala mor-dummad-e-uaya-yaba be odogoed,
adi, mor-dummagan danar-danaled unnila goa-gwennagwadyob guegar.
12 Mormar-dummagan, ar bur-suidsoggu,
anse-goled-neg-sunna-seleged-e-dikarmargi batenai guoed.
13 We-batenanaidi, anse-goled-neg-sunna-seleged-edugoed,
gwensaksik, achabo batenai be imakoed,
baidsik, amba achabo batenai be imakbaloed.
14 Sibad-wawaad-machered-e-ukamar-ginnidgi-odolegaled,
anse-goled-neg-sunna-seleged-edugega be imakbaloed.
Geb degine, ibdurgan-uka-nuegan, be ebubaloed,
adi, agi anse-goled-neg-edugegarbar.
15 ”Deginbali, anse-goled-neg-sunna-selegedga urgomar-acaciaʼye-nugad be sobbaloed.
We-urgomar nue inniki-inniki be imakoed.
16 We-urgomar dalibo-abala-sugu be imakoed,
e-matardungueddi achapaa be imakoed.
17 Deginbali, urgomargi e-nagmar war-warbo-nika be soboed,
adi, nabir urgomar naga-nagaba matak-matak gwisguegar.
Weyob bela urgomar be anse-goled-neg-sunna-selegedga be imakoed.
18 Degisoggu, urgomar mata-dulagwen (20) anse-goled-neg-sunna-selegedga,
dad-nakwed-argan-nuedsik ogwichega be imakoed.
19 Urgomar-mata-dulagwenad-urba e-sigmalad gwadulabo (40) manibi be soboed.
Urgomar-irbali gwa-gwabo e-sigmalad be imakoed,
adi, urgo-e-nagmar e-sigmaladgi dogegar.
20 Anse-goled-neg-sunna-selegedga urgomar-mata-dulagwen (20)
dad-nakwed-argan-sapiledsik ogwichega be imakbaloed.
21 Be e-sigmalad-manibiid gwadulabo (40) be imakbaloed.
Urgomar-iliba gwa-gwabo e-sigmalad be imakoed.
22 Anse-goled-neg-sunna-seleged-sorsik,
dad-argwanedsiki urgo-matanergwa (6) be sobbaloed.
23 Deginbali, e-abingunaid-yarganbalidgala,
urgo-matabo be soboed.
Deyobi, e-abingunaid-yarganbalid-baidga,
urgo-matabo be sobbaloed.
24 We-urgo-matabogwad-e-nagmar, e-sigmalad-birgi darbo abingunaidgi gwisguoed.
Geb nibalidse or-dummad-naidgi be urgo darbobela be odogoed.
Weyob urgo-matabogwad niba ebo-atonai be imakoed.
25 Degisoggu, urgo-matabaabakgi (8) e-sigmalad-manibiid gwaambe-gakanergwa (16) be sioed.
A-sogleged, urgo-matagwengi e-urba e-siged be gwa-gwabo sioye.
26 Deginbali, urgo-warakwagana-acaciaʼye-nugad-biir-megmalad be imakbaloed.
We-urgo-warakwagana anse-goled-neg-sunna-seleged-e-dikar-soggwensikidga walatar be imakoed.
27 Urgo-warakwagana anse-goled-neg-sunna-seleged-e-dikar-baidsikidga, walatar be imakbaloed.
Degine, dad-argwaned-yarganbalidga urgo-warakwagana walatar be imakbaloed,
28 Neg-abargi-urgo-warakwa-megoed bela-baksa urgomar-abargi megoed.
29 Bela urgomar-ebilis or be matak-matak nasikoed.
Degine, e-olua-dummagan orbi be imakbaloed,
adi, a-yaba urgo-warakwagana-odogegar.
Bela we-urgo-warakwagana-biir-megmalad-birgi or be nasikbaloed.
30 ”Igi-dakle yar-birgi bega oyolesa, ayobi, anse-goled-neg-sunna-seleged be soboed.
31 Deginbali, mor-dummad be imakoed.
We-dubmargi be imakoed:
Nirbadub-aradgi,
nirbadub-suir-akwagiidgi,
nirbadub-ginnidgi,
linoʼdub-nuedgi be soboed.
We-morde nue-yeerdakle-imakar, baliwiturmar-querubinʼye-nugad, egi-ise-nue-sobale be imakoed.
32 Buarmar-acacia-walabakegwadgi we-mor-dummad-yeerdakleged be nasikoed.
We-buarmarde or egi nasiklealed.
E-siged-manibiid-birgi we-buarmar gwisguoed.
33 We-mor-dummadde mor-nasikmaladgi be nasikoed.
Degisoggu, we-mor-dummad Neg-Islidikid, Neg-Ise-Islidikid-ebo bachiki-imakega guoed.
We-mor-dummad-daksik Dulemarbo-An-Igar-Mesisad-Ulu be sioed.
34 Geb degine, Dulemar-Ebo-An-Igar-Mesisad-Ulu-birgine, e-eduged be mesoed.
E-edugedde, Isgued-Elileged-E-Wilubye, sogleged.
We-ulude, Neg-Ise-Islidikidyaba sioed.
35 Neg-Islidikidgi, mor-naid-magabali,
dad-nakwed-argan-sapiledsik, mese be sioed.
We-mese an-asabin madu-ukleged-mesed.
A-mese-asabinni, dad-nakwed-argan-nuedsik gwallu be sibaloed.
36 Anse-goled-neg-sunna-seleged-e-yawagakgala, we-dubmargi mor-dummad be soboed:
Nirbadub-aradgi,
nirbadub-suir-akwagiidgi,
nirbadub-ginnidgi,
linoʼdub-nuedgi be soboed.
Ise-nue-sobar, bela-bela-nue-yeerdakle-imakale, be we-mor-dummad imakoed.
37 Degine, we-mor-dummadgala,
acacia-buarmar walatale ega be imakoed.
We-buarmar-ebilis or be matak-matak nasikoed,
degine, mor-gamalad olobi ega be imakbaloed.
Deginbali, wemar-buarmar-ataled-abingaega,
esgoro-gordikidgi gwaatale e-sigmalad be soboed.”