1 Israel-dulemar dakdegu, Moisés yar-birgi-gudiid gwen aidedasuli, Aarónʼse nade gusmalad. Ega sogdemalad:

—¡Aarón! Be anmarga bab-dummagan sobe, adi, anmar-idu-nadap gumalagar. Ar Moisés-Egipto-yargi-anmar-onosad, anmar wissulid, wede igi-gusa.

2 Aarón dulemar-abin sogded:

—Be-omegan-uaya-dukugi-ormar-nanaid, be-bunamala-uaya-dukugi-ormar-nanaid, be-masmala-uaya-dukugi-ormar-nanaid be ungemardo. Geb be anse sedamalo.

3 Geb degine, bela dulemar uaya-dukugi olua-nanaid unnusmalad, geb bela Aarónʼse senonimalad. 4 Aarón bela we-ormar abingasad. Geb soogi or dusad. Binna-binna sobe-sobe imaksad, moli-bebe-nikad-sapingwagwadga obinnisad. Geb degine, bela sogdemalad:

“¡Israel-dulemar! Wemar be-bab-dummagan-dake. Wemar, Egipto-yargi bemar-onosad-dake.”

5 Aarón weyob dulemar-daksagu, moli-bebe-nikad-asabin ibmar-ogumakar-ukleged-aila sobsad. Geb binnasur sogded:

“¡Oibosale, Bab-Jehováʼga iba-dummad anmar onomaloed!”

6 Oibosgu, wakudaryalaba dulemar ailagi ibdurgan-ogumakar uksamalad, degine, gwenatigwar-guegala, ibmar uksamarbalid. Geb mas gutemalad, gobdemalad. Bela galagwensuli wergudmalad.

7 Geb degine, Bab-Jehová Moisésʼga sogded:

—Be nae, be aidena. Ar be-dulemar, Egipto-yargi be onosadi, nue-isgudmalad. 8 An-ega-Igar-uksadgi bato bangudmalad. Emide, or dusmalad, moli-bebe-nikad-sapingwagwadyob sobsamalad. A-molise Bab-Dummadyob ese gornanaid, Bab-Dummadyob ega ibmar-ogumakar uknanaid. Sogdemalad: ‘Israel-dulemar, we be-bab-dummagan-dake, we Egipto-yargi bemar-onosad-dake.’

9 Bab-Jehová Moisésʼga sogdebalid:

—We-Israel-dulemar an dakedi, nue dulemar-non-dutusurmaladid. 10 Degisoggu, emigindi be an-dako. An sae-itoged. We-dulemar an obelogoed. Bedina, wagan-bukidar-nikuega an be-imakoed.

11 Geb degine, Moisés e-Bab-Dummad-Jehová-urwed-bargaegala, ega sogded:

—Bab-Jehová, ¿ar ibiga sae-itogedba be-dulamar be obelodagoe? ¿Ar na be Egipto-yargi be-gangued-dutusulidba onossursi? 12 Ar ibiga Egipto-dulemar-weyob-sogega be imakoe: ‘Emide be dake, Bab-Dummad Egipto-yargi we-dulemar-onosad, yala-imbaba-oburgwega onosad. Bela we-napneggi-obelogega onosad.’ Melle be sae-itoge. Melle we-dulemar-obelogedgi binsae. 13 Be-maimar Abraham, Isaac, degi, Jacob, amar be ebinsae. Ar amarga be sogsa gusad, an ise-sogar sogye: ‘Niisgwamar-nibneggi-nanaidyob be-wagan an bega omelogoye. Degine, be-waganga we-yarmar-nanaid degisadegu egadga guoye.’

14 Geb degine, Bab-Dummad e-dulemar-obelogoye-sogsagusadi, emisgi sogdesunnad, bar obelogosurye. 15 Geb degine, Moisés yar-birgi-gudiidi aidealid. Moisés akwa-matabogwad Bab-Dummad-Israel-Dulemarbo-Igar-Mesnaid-narmakaledi e-argangi-sedani aidealid. Igar-Mesilesad akwa-matabogwadgi abinbela narmakaled. 16 Bab-Dummad akwa-matabogwad imaksad, degi, e-sunnad egi narmaksabalid.

17 Geb degine, Josué dule-bukidar oimake-itoargu, Moisésʼga sogded:

—Dulemar danar-bukwadgi urwe-nana an itodo.

18 Moisés, Josuéʼga sogded:

19 Moisés dulemar-bukwadse-aidenonigua, moli-bebe-nikad-sapingwagwad-sobaled dakded, degine, dulemar-dodonanai dakdebalid. Moisés deyob dakdegu, sae-itoded. E-argangi-akwa-matabogwad-ganikid binnasur meted. Yar-dikarba we-akwa-matabogwad mamarisad. 20 Geb degi, Moisés, moli-bebe-nikad-sapingwagwad-soblesad susad, geb ogumakega soogi balimeted. Geb doo-doo imaksad, bela ubi-ubi-imakedse sasad. Geb degine, diigi mie-mie imaksad. A-diigi Israel-dulemar-ogobsad. 21 Geb Moisés Aarónʼga sogded:

—¿Igi we-dulemar be-imaksa? Emide be, we-dulemar dummad-isguega be imaksad.

22 Aarón Moisés-abin sogded:

—Dummad, mer be anse urwe. Ar be wisid, we-dulemar unnila isguedginbi binsadidamalad. 23 Ar we-dulemar anga sokarmalad: ‘Anmar-idu-nadap-guegala anmarga bab-dummagan be sobye. Ar ade, anmar wissuliddeeye, we-dule-Moisés Egipto-yargi-anmar-onosadi, igi-gusdibeye.’ 24 Geb degine, an ega sogdesunnad: ‘Dule or-nikadi, anga sedamalo.’ Agi anga or uksamarsunnad. Geb soogi an ormar meted. Geb degine, we-moli-bebe-nikad-sapingwagwad noarsunnad.

25 Moisés dakdegu, dulemar geg na san-bargamala, Aarón, gwen we-dulemar-san-bargaega imaksasuli, deginbali, we-Israel-dulemala, e-isdarmalad-dodogedga gudoe, 26 degidbali, Moisés dulemar-danar-bukwad-dogedgi gwisgusad, amarga sogded: “Ar doamar Bab-Jehováʼba nanai-itomala, anse dagmalo.” Agi bela Levita-dulemar Moisésʼba akadmalad.

27 Moisés amarga sogded:

“Weyob Israel-e-Bab-Dummad-Jehová soged: ‘Bela bemar na es-suid nasikmalo, dulemar-danar-danar-bukwadse gannar be namalo, dulemar-e-dordo-e-dordonegse be namalo. Be-gwenaddibe, be-aidibe, be-neg-dikarba-mamaiddibe, be oburgwemalo.’ ”

28 Levita-dulemar Moisés-ega-sogsadba bela imaksamalad. A-ibagi, dulemar-milipaa-gubin (3,000) oburgwismalad. 29 Geb degine, Moisés Levita-dulemarga sogded:

“Emi-ibagi, bemar, be-masmalagi-aibichad-ular, be-gwenadgangi-aibichad-ular, Bab-Jehováʼga-arbaega be gunonimalad. Degisoggu, Bab-Jehová, emi-ibagi, ise-nued bemargi binsanonimalad.”

30 Degidgine, oibosgua, Moisés Israel-dulemarga sogded:

“Bemala nue-dummad-isgusmalad. Degi-inigwele, Bab-Dummadbo-igar-nabogegala, Bab-Jehováʼse an nakwenaoed, abakalegi, Bab-Dummad nabir bemarga isgued-elialile.”

31 Geb degine, Moisés Bab-Jehováʼse gannar nonikid, ega sogded:

—Ar we-Israel-dulemar or-sobaled bab-dummadga-imaknonimargu, nue-dummad-isgunonimalad. 32 Degisoggu, Bab-Dummadye, we-dulemar-e-isgusad ega be eliena gadin. Ar degisulile, be-gardagi an-nug-narmakar-naid be elisunna.

33 Bab-Jehová Moisés-abin sogded:

—Ar dule-angi-isgusadbi an-gardagi-e-nug-narmakar-naid an ei elioed. 34 Degisoggu, bedi be nae. We-dulemar an-bega-sogsad-yarse be sede. An-baliwitur be-idumai guoed. Ar dulemar-angi-isgusmaladdi, e-odurdakleged-ibagan-nonikile, e-isgusmaladba an a-dulemar sabsur-odurdakoed.

35 Geb deyobi, Bab-Dummad-Jehová Aarón-moli-bebe-nikad-sapingwagwad-sobsad-ular, Israel-dulemargi boni-dummad barmialid.