6. BAB-DUMMADSE-GOLED-NEG-SUNNA-SELEGED
35
(35:1–40:38)
Obunnoleged-iba, iba-islidikidid
(Éxodo 31:12-17)
1 Moisés bela Israel-dulemarse gochad, geb degine amarga sogded: “Weyob Bab-Jehová igar uksad, weyob be imakmaloye: 2 Ibanergwa (6) arbalegoed, ibagugledgindi (7), iba-islidikidid. A-ibagi, Bab-Jehováʼga obunnolegoed. Ar doa-dule a-ibagi arbaele, we-dule oburgwilegoed. 3 Bemar-neg-yagine, bipisaale obunnoged-ibagi soo be ogaosurmalad.”
Bab-Dummadse-goled-neg-sunna-seleged-soblegoedga ibmar-ukleged
(Éxodo 25:1-9)
4 Moisés, bela Israel-dulemar-danar-ambikunonikidga weyob sunmaksad: “Bab-Jehová sogsad: ‘Weyob be imakmaloye: 5 Bemar ibmar-nikadi Bab-Jehováʼga be sedamaloed. Dulemar na e-gwagegi ibmar Bab-Jehováʼga ukbi-itomaladba ibmar sedagoed. We-ibmarmar sedagoed:
Olo, mani, esgoro-gordikid.
6 Nirbadub-arad, nirbadub-suir-akwagiid, nirbadub-ginnid,
linoʼdub-nued, sibad-e-absarmar,
7 sibad-wawaad-machered-e-ukamar-ginnidgi-odolegaled,
ibdurgan-uka-nuegan,
urgomar-acaciaʼye-nugad.
8 Olivo-gwallu gwallu-ogaegar.
Gwallu-wawad ibmar-magega guegar,
degi, olivo-gwallu ina-wawadikmaladgi ebulegegar.
9 Akwa-nuegan-óniceʼye-nugmalad,
akwa-nuegan mor-efodʼye-nugad-birgi nasikegar,
degi, mor-binasgargi-nasiklegedgi nasikegarbar.’ ”
Bab-Dummadse-goled-neggi-ibmar-ebulemalad
(Éxodo 39:32-43)
10 Moisés Israel-dulemarga sogdebalid: “Bela Bab-Jehová-ibmar-sogsad-sobmalaga, bela dulemar bemar-abargi nue-ibmar-wisi-sobemalad nonimalo. 11 Amar we-ibmarmar sobmaloed:
Bab-Dummadse-goled-neg-sunna-seleged,
e-neg-sunnad, e-uas-mormar,
e-mor-gamalad, e-urgomar,
e-suarmar, e-buarmar, e-sigmalad.
12 ”Deginbali, sobmarbaloed:
Bab-Dummad-Israel-Dulemarbo-Igar-Mesisad-Ulu,
e-suarmar, e-eduged,
mor-dummad-Ulu-walik-naguoed.
13 ”Deginbali, sobmarbaloed:
Mese, mese-suarmar,
bela mesegi-ibmar-ebulemalad,
degi, madu-Bab-Dummadga-ukleged.
14 ”Sobmarbaloed:
Gwallu-sied, degi, bela eba ibmarmar-ebulegoed.
E-gwallumar, degi, olivo-gwallu gwallu-ogaegar.
15 ”Sobmarbaloed:
Ina-wawadikid-inciensoʼye-nugad-ogumakleged-aila, degi, e-suarmar.
Gwallu-wawa ibmar-magega ebuleged,
ina-wawadikmalad.
Mormar-dummagan Neg-Sunna-Seleged-e-yawagak-dogedgi-naguoed.
16 ”Sobmarbaloed:
Bab-Dummadga-ibmar-ogumakar-ukleged-aila,
e-esgoro-gordikmalad-biir-biir-megoed,
degi, e-suarmar, bela eba-ibmarmar-ebulegoed.
Dii-sied-esgoro-gordikidbiid,
degi, a-e-malimar.
17 ”Sobmarbaloed:
Bab-Dummadse-goled-neg-sunna-seleged-e-galugi mormar-dummagan-ebirmaloed,
e-buarmar, e-sigmalad.
We-neg-sunna-seleged-e-neg-e-galu-dogedgi mor-dummad-naguoed.
18 We-neg-e-bargamalad, e-galu-bargamalad, e-dubmar sobmaloed.
19 Aarónʼga, degi, Aarón-masmalaga, Bab-Dummadse-goled-neggi-mormar-ebulemaloed sobmarbaloed.
Bela we-ibmarmar sobmaloed.”
Israel-dulemar Bab-Dummadga ibmar uksamalad
20 Degidgine, bela Israel-dulemar Moisés-asabin-bukmaladi ainiarmalad.
21 Bela dulemala, bela na e-gwagegi-ibmar-ukbi-itosmaladi,
Bab-Dummad-dulemarbo-ambikued-neg-sobmalaga,
agi-bela-ibmarmar-ebulemalad-sobmalaga,
degine, dule-irwa-Bab-Dummadse-goledgi mor-islidikid-yomalad-sobmalaga,
Bab-Jehováʼga ibmar searmalad.
22 Bela ibmar-ukbi-itosmaladi, machergan, degi, omegan-ugakse, we-ibmarmar senonimalad:
Ordub, oluamar,
sakwagi-ormar-nagumalad,
argangi-or-yolemalad,
degi, bela ormar-galagwensuli senonimalad.
Belagwable Israel-dulemala Bab-Jehováʼga or senonimalad.
23 Bela dulemar nirbadub-arad-nikamalad,
nirbadub-suir-akwagiid, nirbadub-ginnid,
linoʼdub-nued, sibad-e-absarmar,
sibad-wawaad-machered-e-ukamar-ginnidgi-odolegaled,
ibdurgan-uka-nuegan, senonimalad.
Bela-dulemar we-ibmar-nikamaladi, Bab-Dummadga-ukega senonimalad.
24 Bab-Dummadse-goled-neg-sunna-selegedgi ebulegega,
dulemar mani-nikamaladi,
esgoro-gordikid-nikamaladi, Bab-Jehováʼga ukdemalad.
Degine, urgomar-acaciaʼye-nugad-nikamaladi, ukdemarmogad.
25 Deginbali, omegan-ibmar-nue-wisimalad, e-argangi-dub-sobsamaladi, Bab-Dummadga senonimalad:
Nirba-dub-aradgi-sobsamalad,
nirbadub-suir-akwagiidgi-sobsamalad,
nirbadub-ginnidgi-sobsamalad,
degi, linoʼdub-nuedgi-sobsamalad, senonimalad.
26 Bela omegan ibmar-nue-imakmaladi, e-gwagegi nue-imakbi-itosmaladi,
sibad-e-absarmar sobsamarmogad.
27 Israel-dulemar-dummaganga-gudidimaladi,
akwa-nuegan-óniceʼye-nugad,
degi, akwamar-nuegan,
mor-efodʼye-nugadgi-nasikmalaga,
degi, mor-binasgargi-nasikleged-birgi-nasikmalaga, senonimalad.
28 Deginbali, we-ibmarmar senonimarbalid:
Ina-nuegan,
olivo-gwallu gwallu-ogaegar,
gwallu-wawad ibmar-magegar,
degi, ina-wawadikmalad obupurmakegar.
29 Bela Israel-dulemar, machergan, degi, omeganse-bakale, na gwagegi-ibmar-ukbi-itosmaladi, Bab-Jehováʼga na e-itogedba-ibmar-ukega senonimalad, adi, Bab-Jehováʼga ibmarmar sobegar.
Ar igi Bab-Jehová-Moisésʼga-sogsagusa, deyob imaksamalad.
Bezaleel, degi, Aholiab, arbaega sulesmalad
(Éxodo 31:1-11)
30 Geb degine, Moisés Israel-dulemarga sogded: “Nue be an-itomalo. Bab-Jehová, Uri-machi-Bezaleel onugsasad. Bezaleelʼde, Hur-e-wagwad. E-dad-dummad-Judáʼgi danikidid.
31 Bab-Dummad Bezaleelʼga E-Burba uksad,
nue-binsaed-nikaa guegar,
nue-ibmar-mag-ito guegar,
nue-ibmar-wisi guegar,
degi, ibmar-akar-akar-obinyegar.
32 Adi, ibmar-yeerdakle orgi-sobegar,
manigi-sobegar,
esgoro-gordikidgi-sobegar.
33 Deginbali, nabir akwa-nuegangi-arbaegar,
akwa-nuegan ibmar-birgi siegar,
nabir urgomargi-arbaegar,
degi, galagwensuli ibmar-yeerdakle imakegar.
34 ”Bab-Dummad Bezaleelʼga, degi, Aholiabʼga nabir-dulemar-odurdaked-gurgin uksad. Aholiab Ahisamac-e-machid, e-dad-dummad-Danʼgi danikidid.
35 Bab-Dummad Bezaleelʼga, degi, Aholiabʼga, we-gurginmar uksad:
Nabir baisursunna-ibmar-imaked,
nabir-ibmar-onoged,
nabir nirbadub-aradgi-ibmar-sobed,
nabir-nirbadub-suir-akwagiidgi-ibmar-sobed,
nabir-nirbadub-ginnidgi-ibmar-sobed,
nabir-linoʼdub-nuedgi-ibmar-sobed-gurgin, uksabalid.
We-dulemala, ibmar-yeerdakle sobmaladid, mormargi arbamaladid,
degi, nabir na-e-itolegedba sunna ibmar-akar-akar onomaladid.”