7
1e. Muusaila-Mulusad-Igar
(7:1–9:29)
Muusaila-mulusad
1 Geb a-sorba, Bab-Jehová Noéʼga sogded: “Emi-ibagangi, dulemar-bukwad-abargi, unnila bebi an-asabin inniki nanadiid. Degisoggu, be, be-gwenadganmala ur-dummadyaba be doge.
2 Geb bela ibmar-durgan-swilidikmalad:
Machered-walagugle (7), ome-walagugle, ur-dummadyaba be oubogo.
Ibmar-durgan-swilidiksurmaladdi
unnila machered-wargwen, ome-wargwen be oubogo.
3 Nuumala amba deyob be imakbaloed:
Nuumar-swilidik-akar-akar-nikadi, gwagugle-gwagugle (7-7), abirgunagwar-abirgunagwar ur-dummadyaba be oubogo.
Adi, we-napneggi bela ibmar-durgan, nuumarse-bakar, egad-egad balibimalad mer e-dula berguegar.
4 ”Ar ade, ibaguglese (7) dii an owioed, iba-dulabo (40) mutikidba, degi, ibginedba dii-winai an imakoed. ¡We-napneggi bela ibmar-dula-obinnilesad, bela an obelogoed!”
5 Ar igi Bab-Jehová Noéʼga sogsa, aba bela Noé ibmar imaksad.
6 We-napneggi muusaila-nosgua, deunni, Noé birga-dulataled-ilanergwa (600) nikad. 7 Noé-ur-dummad-sobsadyaba-dogsamaladi, wemalad:
Noé, e-ome,
e-masmala,
degi, e-balamar,
adi, muusailaba melle burgwemalagar.
8 Ibmar-durgan-swilidikmalad,
ibmar-durgan-swilidiksurmalad,
nuumar,
ibmar-durgan-napagi-garmakdimalad,
9 a-ibmar-durgan, igi Bab-Dummad Noéʼga sogsadyobi, Noéʼba ur-dummadyaba war-warbo abirgunagwar-abirgunagwar dogsamalad.
10 Ibagugle-gusgu (7), muusaila napneggi muluded.
11 Noé birga-dulataled-ilanergwa-nikadgi (600), nii-warbogwad-ibambe-gakagugledgi, dii-wilasailadgi bela napa-urba-dii-sailagan-mamaid utuded, degine, nibneggi-dii-sailagan-mamaid argaded. 12 Napneggi iba-dulabo (40) bane-bane mutikidba, ibginedba, dii-winai gusad.
13 Noé, ur-dummadyaba-dogsad-ibagi, wemar eba dogsamarmogad:
E-ome,
e-machi-Sem,
e-machi-Cam,
e-machi-Jafet,
degi, e-masmala-omegan.
We-dulemarbi ur-dummadyaba dogsamalad.
14 Wemarba bela ibmar-durgan-na-egad-egad-balibimalad dogsamarbalid. A-ibdurgan wemalad:
Ibmar-durgan-sapurbarmalad,
ibmar-durgan-sunna-akwilemalad,
ibmar-durgan-napagi-garmakdimalad,
nuumar, degi, bela ibmar-sakan-nikamalad.
We-ibmar-durgan, Noéʼba ur-dummadgi dogsamarmogad.
15 Bela ibmar-dula-gudidimalad Noéʼba ur-dummadyaba war-warbo dogsamalad. 16 Bab-Dummad Noéʼga-sogsadba bela ibmar-durgan-akar-akar na abirgunagwar-abirgunagwar dogsamalad. Geb a-sorba, Bab-Jehová ur-dummad-yawagak edisad.
17 Iba-dulabo (40) napneggi dii-winai gusad. Dii-muludgu, ur muamakded. Degisoggu, ur-dummad dii-birgi muamaknai gusad. 18 Dii sabsur-muremai-muremai guded. Ur-dummaddi dii-birgi muamaknai gussunnad. 19 Dii bela-bela mulussoggu, napneggi-yar-dummagan-bukmalad bela dogsad. 20 Bela yarmar dogsa-sigisgu, amba dii dalipaa-abala-wilub (3½) muremai gusad. 21 Weyob bela ibmar-durgan-we-napneggi-bukwad burgwisad:
Nuumar,
ibmar-durgan-sunna-akwilemalad,
ibmar-durgan-sapurbarmalad,
ibmar-durgan-unimalad,
degi, bela dulemar burgwismarmogad.
22 We-napneggi ibmar-dula-gudimalad, bela burgwisad.
23 Weyob bela we-napneggi we-ibmarmar obelolesad:
Dulemar,
ibmar-durgan,
ibmar-durgan-napagi-garmakdimalad,
degi, nuumar,
amar bela burgwismalad.
24 Unnila, Noé, degi, ur-dummadyaba-bukwamaladbi durgusmalad. Dakargu, iba-dulagugle-gakambe (150) bela napneggi dii-saila mulus nagusad.