15
Moab-dulemar-yoedse-berguoedgi sunmaklesad
(Isaías 16:6-12; Jeremías 48:29-36)
1 Isaías, Moab-neggwebur-berguoedgi iduakwaa sunmaksad.
Moab-neggwebur-Arʼye-nugad bela ayarisad,
mutiki bergusad.
Moab-neggwebur-Kirʼye-nugad bela ayarisad,
mutiki bergusad.
2 Dibón-neggweburginmalad, e-bab-dummadse-goled-negse nadmalad,
adi, e-bab-dummadga-ibmar-ogumakar-ukleged-ailase bonamalagar.
Moab-dulemar Nebo-neggwebur-bergusadga,
degi, Medeba-neggwebur-bergusadga, ogormakbukwad.
Bela sailagia-swiri-swiri imaksamalad,
aku-sigamarse-bakale, bela enismalad.
3 Bela-dulemar boedbimalad,
galimbabali wile-itoged-mor yoyoidbimalad.
Neg-ubebbali ogormakdemalad,
dulemar-bukidar-ambikuedgi dulemar boedbimalad.
4 Hesbón-dulemar, degi, Eleale-dulemar, wile-itogedba binnasuli e-bendakmarye gordidimalad,
e-binnasur-gordiidi Jahaza-neggweburse magar itoleged.
A-ulale, Moab-sorda-bila-onomalad dobedba-binnasuli gorbukwad,
bela-bela egi dobed nagunonikid.
5 Moab-yar-ulale, an nue-bukib binsaed,
E-dulemar, Zoar-neggweburse duurmakmamaid,
Eglat-Selesiyáʼye-neg-nugadse duurmakmamaid.
Luhitʼye-neg-nugadba ise-boar-boar nakwemamaid.
Horonaim-neggwebur-igarba ise-boar-boar nadapmalad.
6 Nimrim-dianmar bela dingusad,
gagan-ara-aramalad bela dingusad.
Bar gagan-ara-aramalad nikagussulid,
bela gagan-ara-aramalad bergusad.
7 A-ulale, dulemar-bukidar e-ibmar-nuegan-nikamaladi
Sauce-sapimar-dian-maid-obakar sesmalad.
8 Dulemar-binnasuli-bodiidi, bela Moab-yalagi itolesad.
Dulemar-akigindiidi, bela Eglaim-neggweburse warmaksad,
degi, Beer-Elimʼye-neg-nugadse warmaksad.
9 Dimón-dian bela ablisbi-naid, bonigan napi-egi an barmidagoed:
Moab-dulemar-duurmakmaidgi achumigur-nono-wawaad an barmidagoed.
Amba dulemar-napneggi-bukwadgi achumigur-nono-wawaad an barmidagoed.