27
Israel-dulemar-ollor-guoed
1 Isaías sogded:
“A-ibagangine, Bab-Jehová, naibe-dummad-Leviatánʼye-nugad sabsur-odurdakoed.
Naibe-sinni-sinnid-Leviatánʼye-nugad sabsur-odurdakoed.
Bab-Jehová e-es-suid-gandikidgi,
degi, e-es-suid-dummadgi achu-simudubaled muu-billi-yagi-maidi oburgoed.
2 A-ibagangine, Bab-Jehová weyob sogdoed:
‘Uva-nainu-nued-sulealedga be namakmar:
3 Ani, an Bab-Jehová, uva-nainu-edarbedga an gued.
Bali-bali an-uva-nainu an oged.
Melle dule ani oakalogega, mutikidbali, ibginedbali, an-nainu an edarbed.
4 An ese bar urwesulid.
Ar amba ikomar uva-nainugi nikana,
gagan-ikobimalad amba uva-nainugi nikana,
an ebo ulusaled, an bela ogumaksaled.
5 Ar Israel-dulemar e-irwar gwisgubi an-abegele,
anbo igar nudakergebed.
Anbo igar nabogergebed.’
6 ”Yoo ibagan nonikoed, Jacob-wagan ambikunonikoed,
Israel-dulemar gannar ainidagoed,
nue-nasgumai gudagoed.
E-ibmar-nuegan napneg-dirbirmakar-naidgi iirmakmai gudoed.
7 Ar igi Bab-Jehová dule-baigan-sabsur-imaksa,
¿deyobi Bab-Jehová Israel-dulemar-sabsur-imaksasi? Suli.
Ar igi Bab-Jehová dule-baigan-ogilosgusa,
¿deyobi Bab-Jehová Israel-dulemar-ogilossi? Suli.
8 Ar Bab-Jehová e-dula-sabsur-odurdaksad, e-yalagi-bukwadgi onosad.
Igi burwa-ued nega-dulesulidganba-gordae,
deyobi, Bab-Jehová, Israel-dulemar-neggwebur-dikasurmaladse-odurdaklegega barmeted.
9 Jacob-wagan-e-isgued, weyob osulolenonikoed,
e-isgued-osulolegegala, weyob imakmalargebed:
Bela bab-dummagan-e-ailamar-bukwad obelomalargebed,
we-ailamar, akwasib-ebillegeyob imakmalargebed.
Deginbali, Jacob-wagan, bab-bundor-Asera-e-wilub bipisaale bar ogwissulirgebed,
degine, bali ina-wawadikmalad-aila obukusulirgebed.
Geb degidbali, Bab-Jehová, Jacob-wagan-e-isgued osulogoed.
10 ”Ar neggwebur-gandikid-siid bela oitoles siid,
neg olloo mellesiid.
Igi-nega-dulesulidganba dule sate, deyobi siid.
Moli-bebe-nikad-senigwad-gagan-maed-negga guded,
moli-bebe-nikad-senigwad-obunnoged-negga guded.
Sapi-gaganmar bela ese bergued.
11 Geb sapi dingudele, e-anagan bibichiddaed.
Geb omegan, sapanga aminonidamalad.
Ar Israel-dulemar neg-gunaid nue-akusunna itomalad.
A-ulale, e-Bab-Dummad-e-obinnisadi, we-dulemar-wiledaksulid,
a-ulale, e-Bab-Dummad-e-obinnisadi, we-dulemarga igi-barsaye sogosulid.”
12 A-ibagangine, Bab-Jehová, Éufrates-diwar-suke-aryomaid-akale, degi, Egipto-dian-maidse dulemar-egwaoed. Ar bemar Israel-dule-gumaladdi, igi-dule-sapurgi-arbaed ibmar-gwag gagagwen weedae, deyob bemar war-wargwen welemaloed.
13 A-ibagangine, gar-trompeta-dummad gordagoed. Asiria-yalase, degi, Egipto-yalase, dulemar-galesa-selesgusadi, Jerusalén-Yala-Islidikidse Bab-Jehová-nug odummononimaloed.