44
Bab-Jehováʼbi, Bab-Dummadid
1 Bab-Jehová soged:
“An-mai-Jacob-dulamar, Israel-dulamar-an-na-susad.
¡Emigi, nue be an-itogo!”
2 Weyob Bab-Jehová-be-obinnisadi, sapibeneggi be-omesisadi,
be-bendakmaidi, soged:
“Jacob-dulamar, melle be dobgu,
be an-mai gued,
Jesurún, ani an be-susad.
3 Napa-dinnaganaba dii-suurmakega an imakoed,
nega-dinnaganaba dianmar an omesoed.
Be-wagangine, An-Burba an odegoed,
be-anagangine, ise-nued an binsaoed.
4 Gagan-oglegwichiyobi gumaloed,
dianmar-gaka-nagaba sapi-senigana-gwigwichi-daeyobi gumaloed.
5 Dule-gwensak sogdagoed: ‘An Bab-Jehováʼgad gued.’
Dule-baiddi ‘Jacobʼye’ nugguoed.
Dule-baidmoga e-argangi weyob narmakoed:
‘Ani an, Bab-Jehováʼgadi.’
Geb Israel-nug e-nugga imakoed.”
Bab-Jehová, degi, bab-dummagan
6 Weyobi, Bab-Jehová, Israel-dulemar-e-Rey, Israel-dulemar-Bendakmaidi, degi, Bela-Gangued-Nikadi, soged:
“Ani an gebesailadid, anse bergunaibalid,
Bab-Dummad-baidi sulid.
7 ¿Doa anyob gusunna?
¡Dule anyobile, sunmakdo!
An an-dulamar-urbisad-akale, ibmarmar-gusad sogdo.
¡An-asabin, yoo-ibagan-guoedgi sunmakdo!
8 ¡Melle be gwayemar,
gandik be imakmar!
¿Ar bato an bega sogsasursi?
¿Dikasurgus an be-owisossursi?
Ar bemar an-barsogega gumalad.
¿Ar Bab-Dummad-baid maisi? Suli.
¿Bab-Dummad-baid bebina-sogedi maisi? Suli.
Gwen Bab-Dummad-baid-gudii an dakdisulid.”
Bab-dummaganyob-soblesmalad-binsarmalad
9 Dule ibmar-bab-dummadyob-imakleged-sobmaladi, ibmar-nuedga gusulid.
E-ibmar-bur-yeerdakle-sobarmaladi, gwen ibmar-nuedga gusulid.
E-sobmaladi, na wismalanad,
we-ibmar-bab-dummadyob-imaklegedde, aku atakmalad, uaya yallirmalad.
10 Dule-bab-dummad-baid-sobedi, we-ibmar ega ibmar-nuedga gusulid.
Degi, esgoro-diregwadgi bab-dummadyob-imakleged-sobedi, we-ibmar ega ibmar-nuedga gusulid.
11 Bela dule-ega-san-uksamaladi, bingedar itomaloed,
we-ibmar-sobedgi-arbamaladi, unnila dulemar gumalad.
Bela bular ambikudamarsun, bela dagmarsun.
Ar bela ise-gwayar bukudmaloed, nue-bingedar itodmaloed.
12 Dule-esgoro-sobed, esgoro amied.
Geb soo-ginnitibidgine, esgoro mesed.
Geb mardogi sarsogar bab-dummadyob-imakleged sobed.
Ise nuesaar imaked.
Ar dule-esgoro-sobedi, mas-gunsuli-arbanaile, gobsurbalile, nolloleddaed.
13 Dule-ibmar-sobedi, suargi-ibmar-soboed dubgi wilub-imaked.
Geb esgoro-garagwadgi ibmar sobed, ibmar-orokwaa-saedgi wagar-wilub-onoged.
Geb a-sorbali, akwa duleyob-daklege, degi, yeerdaklege sobed,
adi, neg-bipigwad-yaba ogwisegar.
14 Dule-baigan nikabalid, urwar-digmalad.
Geb dii-wiedi a-urwarmar odummoged.
Geb urwar siklegega bukidar nika gunonikoed.
Ciprés-warmardibe, barya-warmardibe, sapurba digdamalad,
nue-odummogedse imakdamalad.
15 Geb dulemar e-anagan soo-ogaega imakdamalad.
Dule waegala, sapan-negabala ogadamalad.
Egi soo-ogasale, madu yodamarbalid.
Deginbali, egi suar-nuchu sobdamarbalid.
Geb e-nug-odummoddamalad.
Ibmar-sobaled-bab-dummadyob-imakleged sobdamarbalid.
Geb asabin yokorgi-sindigar sigdamalad.
16 Abala, a-suar, sapanga imakdamalad.
Egine, geb na mas dudamalad,
degi, san nariddamarbalid,
geb nue-immelesdamalad.
Geb deginbali, egi wadamarbalid.
Sogdedamalad: “Soo-gasgu, wis uka-uegus-itole.”
17 Geb suar-gwabgusadgi, suar-nuchu sobdamalad,
e-bab-dummadga imakdamalad.
Geb asabinni yokorgi-sindigar sigdamalad,
e-nug odummoddamalad.
Geb ise-wilegar ega sogdedamalad: “Be an-bendake,
ar bee be, an-bab-dummadid.”
18 Ar we-dulemar ibmar wissurmalad.
Akusunna ibmar itomalad.
Ar nue-atakmar-inigwele, akusunna ibmar dakmalad.
Neg-aku-itomaladid, akusunna ibmar-itomaladid.
19 Amba ibmar-wisgued napid.
Amba magar-ibmar-itoged abeged.
Ar gwen weyob binsasurmalad,
weyob sogsurmalad: “Suar, abala madu-yoega an ebusad,
abala an egi san-narisbalid, a-san an guchad.
¿A-suar-gwabgusadgi, an ibmar-isgana sobode?
¿Ar we-suar-asabin ande yokorgi-sindigar sigode?”
20 Ar we-dulemar sooburu-maeyobi gumalad.
Dukin e-binsaedbali yamoledimalad.
Geg na-dukin agi onomalad,
degi, geg sogbalid: “¡We an-argan-nuedsik-ibmar-ganikidi, ibmar-binsaledid!”
21 Bab-Dummad weyob sogded:
“Jacob-wagan, we-ibmar be insao.
Ani an be-obinnisad, be an-maiga-gued,
Israel-dulemar, an gwen be-iegosulid.
Israel-wagan, ar be an-maiga gued.
22 Burwa-sibugana-yogguddaedyobi, an bega be-ibmar-isgana-imaked, osulosad.
Degi, boo-aisakiddaedyobi, an bega be-isgued osulosad.
Gannar be anse dage,
ani an be-nudaksad.”
23 Isaías weyob sogded:
“Mogir-billi, Bab-Jehová-ibmar-imaksadgi weligwaledgi be namak.
Napa-yaa-matusurmalad, gandikidba be gormakmar.
Yalamar, sapurmar, degi, bela e-sapimar, binnasuli be namakmar.
Ar ade, Bab-Jehová Jacob-dulemar-bendaksad,
Bab-Dummadi e-gandikid-yeerdakleged Israel-yalagi oyosad.”
Jerusalénʼgi dulemar gannar ambikuoed
24 Weyob Bab-Jehová-be-bendakedi, sapibeneggi-be-omesisadi soged:
“Ani an Bab-Jehová gued, bela ibmar-obinnisadid.
Ani an wargwen mogir-billi egasadid.
Ani an dukin napneg onasosadid.
Dule gwen an-bendaksasulid.
25 ”Ani an Bab-Dummad-gayaburba-barsogedyob-san-imakdamalad-e-ibmar-sogedi, ega guega an imakdasulid.
Nergan an obingesadaed.
Dule-binsaed-ibegana sikirmakega an imakdaed.
E-binsaed-nikaa-daedi, gannar-gannar-ibmar-obaredga an imakdaed.
26 Ani an an-maimar-gayaburba ogannodaed.
Degi, anga-gayaburba-berbemalad anse-ibmar-egisedi, sogedba-guega an imakdaed.
”Ani an soged, ‘Jerusalén-neggwebur gannar sigoye,
Judá-neggweburmar gannar bukuoye,
e-neg-bibichismalad, gannar an nudakoye.’
27 Ani an demar-wilasailad odinnoged.
Degi, diwar-odinnogega an igar ukbalid.
28 Ani an Rey-Ciroʼgi soged: ‘Anga sibad-wawaad-edarbed guye.
An-ibmar-abegedi anga sogedba imakoye.
Jerusalén-neggwebur gannar sigoye.
Anse-goled-neg-e-saila gannar megoye.’ ”