28
Bane-bane Bab-Dummadga-ibmar-uklegoed-igar
(Éxodo 29:38-46)
1 Bab-Jehová, Moisésʼga sunmakded, ega sogded: 2 “Israel-dulemarga igar be uko, ega be sogo: ‘Ibagan-maid-sekalaa anga-ibmar-ukleged anga ukoye. We-ibmar-ogumakar-uklegoed-yeer-yapandaedi anga an-masga gued.’ ”
3 Bab-Jehová, Moisésʼga sogdebalid: “Israel-dulemarga be sogbalo: ‘Weyob soogi anga ibmar ogumakar be ukmaloye: Bane-bane degisadegu sibad-wawaad-sapingwagwad-warbo birgagwen-nikamalad bonisulidi be anga ukoye. 4 Wakdar, we-sibad-wawaad-wargwen be oburgoed. Sedodi, baid be oburgwebaloed. 5 Madubur-bur-nued nibiratar, olivo-gwalluba-mesa-omukuar be anga ukoed. We-olivo-gwallu bute-wargwen be ebugoed. 6 Degisadegu, Bab-Jehová Sinaí-yargi na igar-uksadba ega ibmar-ogumakar uklemai guoed. We-ibmarde yeer-yapanne Bab-Jehová itodaed. 7 Sibad-wawaad-irba bute-wargwen vino be ukoed. We-vinoʼde ibmar-ogumakar-ukleged-ailagi be eogoed. 8 Sedogusale, sibad-wawaad-baid ogumakar be anga ukbaloed. Ibmar-gwagba-mesa be anga ukoed. Degine, igi wakdar vino-bute-wargwen aila-birgi-eogega be uksabali, deyob, be sedo ukbaloed. We-ibmarde, Bab-Jehováʼga-ibmar-ogumakar-uklegedid, yeer-yapanne Bab-Jehová itodaed.’ ”
Obunnoged-Iba-iliba-ibmar-uklegoed
9 Bab-Jehová Moisésʼga sogdebalid: “Israel-dulemarga be soge: ‘Obunnoged-ibagindi, sibad-wawaad-sapingwagwad-warbo, birgagwen-nikamalad, bonisulidi, be anga ogumakar ukoye. Degine, vino egi-eolegega be ukbaloye. Madubur-nued nibirambe (10) olivo-gwalluba-mesa-omukuar anga be ukbaloye. 10 We-ibmar-ogumakar-uklegedi, obunnoged-ibagi uklegedid. Ukinbali, bane-bane ibmar-ogumakar-ukleged be ukbaloed, degine, vino egi-eolegega-ebuleged be ukmarbaloed.’ ”
Nii-iliba-ibmar-uklegoed
11 Bab-Jehová Moisésʼga sogdebalid: “Israel-dulemarga be sogo: ‘Gebe-nii-onodedgi, anga moli-bebe-nikad-sapingwagwad-walabo bonisulidi, sibad-wawaad-machered-wargwen bonisulidi, degi, sibad-wawaad-sapingwagwad-birgagwen-nikad bonisulidi, walagugle (7), ogumakar be anga ukoye.
12 Degine, moli-bebe-nikad-iliba, madubur-nued nibirambe-gakatar (15)
olivo-gwalluba-omukuar be anga ukoed.
Sibad-wawaad-macheredgindi madubur-nued nibirambe (10)
olivo-gwalluba-omukuar be anga ukoed.
13 Degine, sibad-wawaad-birgagwen-nikad-ilibardi madubur-nued nibiratar,
olivo-gwalluba-omukuar be anga ukoed.
We-ibmar-ogumakar-uklegedi, yeer-yapanne Bab-Jehováʼga gued.
14 E-vino-egi-eolegoed be ukbaloed:
Moli-bebe-nikamalad-iliba, bute-warbo.
Sibad-wawaad-machered-iliba, bute-wargwen-abala.
Degi, sibad-wawaad-birgagwen-nikad-iliba, bute-wargwen.
Weyobi birgagi nii-iliba ibmar-ogumakar be anga ukoed.
15 ” ’Nii-iliba-ibmar-ukleged-ukinbali, bane-bane-ibmar-ogumakar-ukleged be ukbaloed, degi, e-nis-egi-eoleged be ukbaloed. A-ukinbali, be-Bab-Dummad, bemarga isgued-osulogega sibad-wargwen Bab-Jehováʼga ogumakar be ukbaloed.’ ”
Oburgwilegoenad-Iba-iliba-ibmar-ukleged
(Levítico 23:5-8)
16 Bab-Jehová Moisésʼga sogdebalid: “Israel-dulemarga be sogo: ‘Gebe-nii-onoded-ibambe-gakabakegi Bab-Jehováʼga Oburgwilegoenad-Iba nagudoye. 17 A-bangine, iba-itoakwaa-onoleged be onodoye: Ibagugle (7) madu e-inasuli be gunnoed. 18 Gebe-iba-onodoedgi bela an-nug-odummogega anse nonimaloed. Bipisaale, a-ibagi dule gwen arbaosulid. 19 Bab-Jehováʼga ibmar ogumakar be ukoed.
Wemar be ukoed:
Moli-bebe-nikad-sapingwagwad, warbo.
Sibad-wawaad-machered, wargwen.
Degi, sibad-wawaad-birgagwen-nikad, walagugle (7).
We-ibdurgan, bela bonisulid be ukoed.
20 Moli-bebe-nikad-irba, madubur-nued nibirambe-gakatar (15),
olivo-gwalluba-omukuar be anga ukoed.
Sibad-wawaad-machered-irba, madubur-nued nibirambe (10),
olivo-gwalluba-omukuar be anga ukoed.
21 Degine, sibad-wawaad-sapingwagwad-birgagwen-nikad-irbardi, madubur-nued nibiratar,
olivo-gwalluba-omukuar be anga ukoed.
22 Degine, isgued-ulale, sibad-machered-wargwen ogumakar be ukbaloed,
adi, bega isgued-nabogegar.
23 We-ibmarmala, bela be anga, wakdar-ibmar-ogumakar-ukleged-ukine ukoed.
24 ” ’A-ukine, bane-bane ibagugle (7) weyobi masi, degi, ibmar soogi-ogumakar be anga ukoed. Wede, anga ibmar-yeer-yapannedga guedid. Gusgu ibmar-bane-bane-anga-uklegedi, degi, egi-eoleged-uklegedi uklebaloed. 25 Ibagugledgine (7), an-nug-odummogega anse bela bulakwaa nonimaloed. A-ibagine, bipisaale dule gwen arbaosulid.’ ”
Ibmar-Gebe-Sanmaked-Iba-iliba-ibmar-uklegoed
(Levítico 23:15-22; Deuteronomio 16:9-12)
26 Bab-Jehová, Moisésʼga sogdebalid: “Israel-dulemarga be sogo: ‘Gebe be ibmar-gwag-weedmalale, a-ibagine, ibmar-gwag-weleged-iba onodoed. A-ibagine, bipisaale dule gwen arbaosulid. 27 A-ibagi, ibmar-ogumakar yeer-yapanne-itogega be anga ukoed.
Wemar be anga ukoed:
Moli-bebe-nikad-sapingana, walabo.
Sibad-wawaad-machered, wargwen.
Degi, sibad-wawaad-sapingwagwad-birgagwen-nikamalad, walagugle (7)
28 Ibmar-ogumakar-uklegoed-irba, madubur-nued
olivo-gwalluba-omukuar be anga ukoed.
Moli-bebe-nikad-sapingwagwad-irba, madubur-nued
nibirambe-gakatar (15), be anga ukoed.
Degi, sibad-wawaad-machered-irba, madubur-nued
nibirambe (10), be anga ukoed.
29 Degine, sibad-wawaad-sapingwagwad-birgagwen-nikamalad-irba,
madubur-nued nibiratar, be anga ukoed.
30 Degine, be-isgued-ular bega isgued-nabogega sibad-machered-wargwen ogumakar be ukbaloed.
31 ” ’Bane-bane weyob be anga ukoed, vino-egi-eolemaloedse-bakar, be anga ukoed. Gusgu ibmar-bane-bane-anga-uklegedi, degi, egi-eoleged-uklegedi uklebaloed. Ibdurgan-be-anga-ukoedi, bonisulid be anga ukoed.’ ”