31
Israel-sordamar Madián-sordamargi-nakwisad
1 Bab-Jehová, Moisésʼga sunmakded, ega sogded: 2 “We-napneggi be naed-iduale, be-sergan-abargi be megnaed-iduale, be-dulemar-nuggine be Madián-dulemargi buged-mai be imakergebed. Geb a-sorbali, be burgoed.”
3 Geb degine, Moisés Israel-dulemarga sogded:
“Bemar Madián-dulemargi bila-ononamalaga be-sordamar be guakwa urbemalo. Anmar Bab-Jehová-nuggine, egi buged-mai imakmaloed. 4 Bela Israel-dulemala, na dadgan-ambe-gakabogwad-iliba (12), miligwen-miligwen (1,000-1,000) bila-ononaega sordamar-barmidoed.”
5 Weyobi, Israel-dulemar, na dadgan-ambe-gakabogwad-iliba (12), miligwen-miligwen welesad. Degisoggu, bela miliambe-gakabo-mergu (12,000) bila-ononaega sordamar-amilesad. 6 Moisés, we-sordamarbali dule-irwa-Babse-goled-Eleazar-machi-Finees barmisad. A-Fineesʼde Bab-Dummadse-goled-neggi nog-ebulemalad-semai gusad, degi, gar-trompeta semai gusbalid, adi, bila-onolealir ogolegar.
7 Bab-Jehová-Moisésʼga-sogsadba Israel-sordamar Madián-sordamargi bila-onodmargu, egi nakwismalad, bela ogilosmalad. 8 Israel-sordamar wemar-ogilosad-ukine, es-suidgi Madián-e-reymar-walataled oburgwismarbalid.
A-reymarde, wemalad:
Evi, Requem, Zur,
Hur, degi, Reba.
Deginbali, es-suidgi Beor-machi-Balaam oburgwismarbalid.
9 Deginbali, Israel-sordamar Madián-omegan, degi, Madián-mimmigan gasmalad. De-ukinbali, bela e-moli-bebe-nikamalad, e-sibad-wawaadmar, e-sibadmar, e-ibmar-nuegan e-ibe susmarbalid, bela ei searmalad. 10 Degi, Israel-sordamar bela Madián-dulemar-neggweburmar, e-neggwebur-burwiganse-bakar, ogumaksamalad. 11 Bela Madián-dulemar-galesadi, degi, e-ibmar-durgan-e-ibe-sulesadi, 12 bela Moisésʼse, dule-irwa-Bab-Dummadse-goled-Eleazarʼse, degine, bela Israel-dulemarse searmalad. Deunni, Israel-dulemar Jordán-diwar-naba Moab-nebagan-naidgi Jericó-neggwebur-asabin danar-danar bukwamalad.
13 Moisés, dule-irwa-Bab-Dummadse-goled-Eleazar, degi, Israel-dulemar-sapin-dummagan, danar-danar-bukwadgi ainiar gusmalad. Adi, danar-danar-bukwad-magaba sordamar-abindakegar. 14 Moisés, omegan-seledani dakargu, sordamar-idumaladse uluded, sordamar-miligwenad-e-dummaganse (1,000), sordamar-dulataled-e-dummaganse (100) uluded. 15 Ega sogded: “¿Ar ibiga bemar omegan-oburgwissuli? 16 We-omegan, Baal-Peorʼgi Balaam-ega-binsaed-uksadba, Israel-machergan-Bab-Jehováʼgi-isguega imaksamalad. A-ulale, Israel-machergan bukidar burgwisad.”
17 Moisés sogdebalid: “Degisoggu, bela masmala-oburgwemalo, degine, bela omegan-machergan-nikusmalad be oburgwemarbalo. 18 Unnila, omegan-yoo-macherganbo-gabmaladbi be odulomalo, adi, melle oburgwemalo.”
Sorda-bila-onodimalad, degi, dule-galesmalad-san-uruked-igar
19 Moisés, Israel-sordamarga sogded: “Bemardina, be dule-wargwen-oburgwisale, igi, mui-ebusale, ibagugle (7) dulemar-danar-danar-bukwad-magaba gudii guoed. Ibapaagwadgi, degi, ibagugledgi (7) bemar san-urukmaloed, degi, dulemar-galesmalad san-urukmarmogoed. 20 Deginbali, bela be-mormala, be-ibmar-ukamar, be-sibad-e-absarmar, degi, be-ibmarmar-urgogi-sobarmalad be enukbaloed.”
21 Dule-irwa-Bab-Dummadse-goled-Eleazar, sordamar-bila-onodidanimaladga sogded: “Bab-Jehová Moisésʼga weyob igar-uksad: 22 ‘Olo, mani, esgoro-gordikid, esgoro, esgoro-estañoʼye-nugad, gingwa, 23 degine, bela ibmarmar soo-abin geg-akargumalad, soogi be ogoed. Adi, a-ibmarmar swilidik guoed. Geb degi, ibmar-uruked-diigi be urukbaloed. Ibmarmar soo-abin-gummakdedamaladdi unnila ibmar-uruked-diigi be urukoed. 24 Ibagugledgine (7), bemar, be-mormar enukoed. Geb agi, be swilidik gumaloed. Geb dulemar-danar-danar-bukwadse gannar be dogmaloed.’ ”
Ibmar-mimilemaloed-igar
25 Bab-Jehová, Moisésʼga sogdebalid: 26 “Dule-irwa-anse-goled-Eleazarʼga, degi, Israel-dule-danar-danar-bukmalad-e-dummaganga ibmar-ebisega be-bendakmarye be sogo. Dulemar-gales-selenonimalad be ebismalo, degi, bela ibdurganmar-gales-selenonimalad ebismarbalo. 27 Geb degine, sordamar-bila-onoapmaladga negabar ibmar be ukoed, Israel-dulemar-baiganga negabar be ukmogoed. 28 Sorda-bila-onoapmaladga-ibmar-uklegoedi, anga be sumogoed.
Ibmarmar-dulataled-ilataled-iliba (500) war-wargwen be suoed:
Dulemar-gales-selenonikid,
moli-bebe-nikad,
moli-uayasuid,
sibad-wawaad,
degi, sibad.
29 We-ibmarmala dule-irwa-anse-goled-Eleazarʼga be ukoed, adi, anga ukegar.
30 ”Baid-negabalad Israel-dulemarga-uklegoedi, anga be subaloed.
Ibmarmar-dulabo-gakambegwad-iliba (50) war-wargwen be suoed:
Dulemar-gales-selenonikid,
moli-bebe-nikad,
moli-uayasuid,
sibad-wawaad,
degi, sibad.
Geb we-ibmarmala, Leví-wagan-anse-goled-neggi-arbamaladga be ukoed.”
31 Moisés, dule-irwa-Bab-Dummadse-goled-Eleazarʼbo Bab-Jehová-ega-igar-uksadba imaksamalad.
32 Ibmar-weyob-mergu senonimalad, sordamar-dukin-ibmar-amismaladdi obarilesulid:
Sibad-wawaad, mili-dulataled-ilanergwa gaka dulapaa-gakambe-gakatar (675,000).
33 Moli-bebe-nikad, mili-dulapaa-gakambe-gakabo (72,000).
34 Moli-uayasuid, mili-dulapaa gakagwensak (61,000).
35 Degi, yagana-amba-macherganse-gordisulid, mili-dulagwen-gakambe-gakabo (32,000).
36 Sorda-bila-onoapmaladga weyob-mergu we-ibmarmar uklesad:
Sibad-wawaad, mili-dulataled-ilapaa gaka dulagwen-gakambe gakagugle gaka dulataled-ilatar (337,500).
37 Geb Bab-Jehováʼga dulataled-ilanergwa-gakadulapaa-gakambe-gakatar (675) we-sibad-wawaad uklesmogad.
38 Moli-bebe-nikad, mili-dulagwen-gakambe-gakanergwa (36,000).
Geb Bab-Jehováʼga dulapaa-gakambe-gakabo (72) we-moli-bebe-nikad uklesmogad.
39 Moli-uayasuid, mili-dulagwen-gakambe gaka dulataled-ilatar (30,500).
Geb Bab-Jehováʼga dulapaa-gakagwensak (61) we-moli-uayasuidmar uklesmogad.
40 Degi, yagana, miliambe-gakanergwa (16,000).
Geb Bab-Jehováʼga dulagwen-gakambe-gakabo (32) we-yagana uklesmogad.
41 Moisés, Bab-Jehová-ega-igar-uksadba dule-irwa-Bab-Dummadse-goled-Eleazarʼga ibmarmar-Bab-Jehováʼga-uklegoed uksad.
42 Degi, sordamar-bila-onoapmalad-ibmar-senonimaladi, Moisés negabala Israel-dulemarga uksamogad.
43 Degisoggu, Israel-dulemarga weyob-mergu we-ibmarmar uklesmogad:
Sibad-wawaad, mili-dulataled-ilapaa gaka dulagwen-gakambe gakagugle gaka dulataled-ilatar (337,500).
44 Moli-bebe-nikad, mili-dulagwen-gakambe-gakanergwa (36,000).
45 Moli-uayasuid, mili-dulagwen-gakambe gaka dulataled-ilatar (30,500).
46 Degi, yagana, miliambe-gakanergwa (16,000).
47 We-ibmar-Israel-dulemarga-uklesadi, Moisés dulemar-dulabo-gakambegwad-iliba (50) war-wargwen susad. Degi, ibdurgan-dulabo-gakambegwad-iliba (50) war-wargwen susbalid. Bab-Jehová-ega-igar-uksadba imaksad. Geb bela Moisés we-ibmarmala Leví-wagan-Bab-Dummadse-goled-neggi-arbamaladga uksad.
Sordamar-idumalad Bab-Dummadga-ibmar-uksad
48 Degidgine, sordamar-idumaladi, sordamar-miligwenad-e-dummagana (1,000), sordamar-dulataled-e-dummagana (100), Moisésʼse nonimalad. 49 Ega weyob sognonimalad: “Anmala bega-arbamaladi, anmar na egad-egad sordamar-sediid ebichismalad. Dakleargu, wargwensaale anmar-sordamar bilagi burgwissulid. 50 A-ulale, anmar na ibmar-orbiid-amismaladi Bab-Jehováʼga sedanimalad, adi, anmar-isgued-ular ukegar.
A-ibmarmala wemalad:
Ormar-sakwagi-nagumalad,
ordudmar, olarganmar,
oluamar, degi, ormar-baigan.”
51 Degine, Moisés, dule-irwa-Bab-Dummadse-goled-Eleazarʼbo sorda-bila-onomalad-e-dummagan ega-ibmar-orgi-sobarmalad-senonimalad abin susmalad. 52 Sordamar-idumaladi, sordamar-miligwenad-e-dummagana (1,000), sordamar-dulataled-e-dummagana (100) belagwapa Bab-Jehováʼga or-uksamaladi, nibir-dulataled-ilabake gaka dulagwen-aidiku (420) uksamalad. 53 Sorda-bila-onomaladi, na egad-egad wala-walagwen ibmarmar susgusmalad. 54 Moisés, dule-irwa-Bab-Dummadse-goled-Eleazarʼbo sorda-bila-onomalad-e-dummagan ega-or-uksamaladi, Bab-Dummad-dulemarbo-ambikued-negse sesad, adi, Bab-Jehová Israel-dulemar-ibmar-imaksad ebinsaegar.