35
Bendaklegega, Bab-Dummadse-goled
David we-namaked narmaksad.
1 Bab-Jehováʼye, angi-gwisgudimaladgi be gwichigue.
Angi-bila-onodimaladgi be bila-onoge.
2 Bab-Jehová, be-sigu-abgaed-suid be sue,
an-bendakega be dage.
3 An-balegindimalad-abin eswar be gae, akan be gae.
Ani an be-abonogedye be anga soge.
4 An-oburgwebimalad, bingegumarsun, neg-aku-ito gumarsun.
An-oakalobimalad, gannar sorsik namarsun, bingegus namarsun.
5 Amala, oros-e-uka burwa-abin-mileddaedyob gumarsun,
Bab-Jehová-e-baliwitur amar-baleginne.
6 E-igar-nanaedi, ega negsichidyob gusun,
e-igar-nanaedi, ega gware-gwareyob gusun.
Bab-Jehová-e-baliwitur amar-baleginne.
7 Gwen an ibmar-oakalossuli,
an-oburgwega, an-idu yaa akwismalad,
an-idu saki nasiksamalad.
8 Boni egi ukiagwar yolesunna,
na emar-yardakdiidgi, na dukin yardaklege.
Na yaa-akwismaladgi, na dukin argwanmala.
9 Degidbali, Bab-Jehováʼgi an yeer itogoed,
an e-abonogedgi weligwar itogoed.
10 Weyobi, binnasur an gotoed:
“Bab-Jehováʼye, ¿doa beyobi, dule-nollogwad dule-dutusulidgi bendake?
¿Doa beyobi, dule-wileged dule-e-ibe-ibmar-suedgi bendake?
¿Doa beyobi, dule-ibmar-abediid, dule-e-ibe-ibmar-suedgi bendake? Dule beyobid sated.”
11 Dule-barsogmalad-isganamar angi gwisguarmalad,
an-ibmar-wissulid anse egismalad.
12 Andi wemargi nueddaed,
emardi, angi ichakwadamalad.
Weyob-damalad ulubgi nunmak an-imaked.
13 Ar wemar uellemaigusgu, andi nue-bukib eba itodii gusad,
andi wile-itoged-mor-yoi gudii gusad.
Ulubgi-naibi-itogedba an mas guchasulid,
an ega Babse-goled gwen bogigussulid.
14 An-ai-burgwisayobi, an-gargwenad-burgwisayobi,
an bukib-itodii gusad.
An-nan-burgwisayobi, an bodii gusad.
An ulubgi-naibi-itogedba, an bukib-binsadii gusad.
15 An sabsur-wilesgu, emardi yeer-itosmalad, na atosmarbalid.
Dule-isganamar aku-an-dakmaladyobi, angi aibinmalaga na atosmalad,
an-san goa-goa imaknaidbi gusmalad.
16 Sabsur-an-imaknanai gusmalad,
angi dodonanai gusmalad,
isdar-an-dakmaladba anse uludmalad.
17 Bab-Jehová, ¿sanagwadse be we-dulemar yeerdakoe?
Dulemar-an-gindakbiedgi be an-bendake,
dulemar achumigur-nono-wawaadyob an-obelobiedgi be an-bendake.
18 Dulemar-bukidarad-abargi, an bega dog-nuedye sogoed.
Dulemar-bukidarad-abargi, an be-nug odummogoed.
19 An-isdarmalad-angi-aibindimaladi, mer angi wergumala.
Binsa-isdar-an-dakdimaladi, mer angi dodomala.
20 Ar wemar neg-bogidik-nasikedgi sunmaksurmalad,
unnila dulemar-gwage-eikwaa-damaladgi gakansaar sunmakmalad.
21 Anga ise-allar allemalad, sogmalad:
“¡Anmar-sunnad anmar e-isgusad daksamarye!”
22 ¡Bab-Jehová, bela be daksad!
¡Mer be gayamaklege!
¡Mer be angi bangue!
23 An-Bab-Dummad-Jehováʼye, anga igar-innikigwad-imakega be dage,
an-arsogega be dage.
24 An-Bab-Dummad-Jehováʼye,
be-igar-innikigwadba be anga igar naboge.
¡We-dulemar mer angi dodomalaga be imake!
25 Mer weyob binsamalaga be imake:
“¡Anmar weyopira dakbigusye!”
Mer weyob sogmalaga be imake:
“¡Anmar we-dule obelosye!”
26 An-sabsur-wilesadgi bela yeer-itodimaladi, bingegumala,
neg-aku-itodii gumala.
Dulemar angi bur san-dummarba-itodimaladi, bela-bela bingegumala,
nug-bipii gumala.
27 Anba-nanaimalad, binnasur namakmar, wergumar.
Sogdii gumarsun: “Bab-Jehová-e-nug odummolesunye,
Bab-Jehová e-mai-gwage-bogidikid yeerdakye.”
28 Be-igar-innikigwadgi an sunmakoed,
bane-bane an be-nug-odummodii gudoed.