48
Sión-yala, Bab-Dummad-neggwebur-gandikidid
Coré-wagan we-namaked narmaksad.
1 Bab-Jehová, duledar-dummadid.
E-neggweburgi, e-yala-isligwaledgi, e-nug-birigined innikigwadba odummoleged maid.
2 Ibiyob Sión-yala yeerdaklege,
bela napneg-naid weligwar imaked.
Sión-yala, dad-nakwed-argan-sapiledsik-siid,
Bab-Dummad-e-neggweburga gued.
3 Bab-Dummadi, Sión-neg-suid-gandikmaladgi,
dulemar-edarbedga gued.
4 Reymar na atosmalad,
geb Jerusalénʼgi gwisguargusmalad.
5 Reymar a-neggwebur-dakargu, geger-dakarmalad, abin gwakidmalad,
itosur-gwae duurmakdemalad.
6 Emargi bela-belad dobed nagusad,
igi sior ugakgunair, e-boniba galitonaidae,
debayobi, a-dulemargi dobed nagusad.
7 Dii-burwa-dummadba Tarsis-ulu-dummagan-aibinebayobi,
dulemargi dobed nagusad.
8 Igi-anmar-sunnagwad uayagwar epenne na ibmar itosmala,
emide, deyob Bab-Dummad-Bela-Gangued-Nikad-e-neggweburgi, anmar na ibyagwar daksamalad.
Anmar-Bab-Dummad, na e-neggwebur, degisadegu-sii imakoed.
9 Bab-Dummad, anmar bese-goled-neggi,
be-ise-wile-anmar-dakmaidgi binsabukwadamalad.
10 Bab-Dummad, bela napneg-ugakaase be-nug odummoleged.
Be-nuggi nued sunmaklediid.
Igar-innikigwadba be negsemaid.
11 Be-igar-innikii-imakedba Sión-yala yeer-itoged,
Judá-neggwebur-burwigana weligwar itomarmogad.
12 Sión-yala be ebirnamalo,
binnalee be namalo.
E-neg-suigan-bukwad be ebismalo.
13 E-galu-matusurmalad nue be dakmalo,
e-neg-gandikmalad nue be argamalo.
Adi, yoo be-wagan-danikoedga be we-ibmar sogmalagar.
14 We-Bab-Dummadi, anmar-Bab-Dummad-degisadeguadid.
Bab-Dummadi, anmar-idudii sadeguoed.