Génesis.
5.
We, Adán-e-wagan-nugmar-narmakar-mamaid-e-gardad. Bab-Dummad dule-obinnisgua, deunni na e-sunnague dule-imaksad. 
Bab-Dummad machered ome-ebogwa obinnisad. Wemargi ise-nued binsasad. Bab-Dummad dulemar-obinnisgua, amarga sogsad: “Bemar, duleye nugguoye.” 
Adán birga-dulanergwa-gakambe-nikadgi (130), e-machi gwalulesad, Setʼye onugsanonikid. Setʼde bela Adánʼsun-dakleged, degine, bela e-bab-daeyobi dabalid. 
A-sorba, Adán birga-dulataled-ilabaabak (800) napi-gudii gusad. Adán, machimala-baigan nikusbalid, degine, bunamala nikusbalid. 
Degisoggu, Adán bela birga-dulataled-ilabakebak gaka durgwen-gakambe (930) dula-gudii gusad. Degi-birga-nika Adán burgwisad. 
Set birga-dulatar-gakatar-nikadgi (105), e-machi-Enós gwalulesad. 
A-sorba, Set birga-dulataled-ilabaabak gakagugle (807) napi-gudii gusad. Set, machimala-baigan nikusbalid, degine, bunamala nikusbalid. 
Degisoggu, Set, bela birga-dulataled-ilabakebak gakambe-gakabo (912) dula-gudii gusad. Degi-birga-nika Set burgwisad. 
Enós birga-dulabake-gakambe-nikadgi (90), e-machi-Cainán gwalulesad. 
A-sorbali, Enós, birga-dulataled-ilabaabak gakambe-gakatar (815) napi-gudii gusad. Enós, machimala-baigan nikusbalid, degine, bunamala nikusbalid. 
Degisoggu, Enós, bela birga-dulataled-ilabakebak gakatar (905) dula-gudii gusad. Degi-birga-nika Enós burgwisad. 
Cainán, birga-dulapaa-gakambe-nikadgi (70), e-machi-Mahalaleel gwalulesad. 
A-sorbali, Cainán, birga-dulataled-ilabaabak gaka dulabo (840) napi-gudii gusad. Cainán, machimala-baigan nikusbalid, degine, bunamala nikusbalid. 
Degisoggu, Cainán, bela birga-dulataled-ilabakebak gakambe (910) dula-gudii gusad. Degi-birga-nika Cainán burgwisad. 
Mahalaleel, birga-dulapaa-gakatar-nikadgi (65), e-machi-Jared gwalulesad. 
A-sorba, Mahalaleel, birga-dulataled-ilabaabak gaka dulagwen-gakambe (830) napi-gudii gusad. Mahalaleel, machimala-baigan nikusbalid, degine, bunamala nikusbalid. 
Degisoggu, Mahalaleel, bela birga-dulataled-ilabaabak gaka dulabake-gakambe-gakatar (895) dula-gudii gusad. Degi-birga-nika Mahalaleel burgwisad. 
Jared, birga-dulabaabak-gakabo-nikadgi (162), e-machi-Enoc gwalulesad. 
A-sorba, Jared, birga-dulataled-ilabaabak (800) napi-gudii gusad. Jared, machimala-baigan nikusbalid, degine, bunamala nikusbalid. 
Degisoggu, Jared, bela birga-dulataled-ilabakebak gaka dulapaa-gakabo (962) dula-gudii gusad. Degi-birga-nika Jared burgwisad. 
Enoc, birga-dulapaa-gakatar-nikadgi (65), e-machi-Matusalén gwalulesad. 
Matusalén-gwalulesad-sorba, Enoc, birga-dulataled-ilapaa (300) Bab-Dummad-walikaa nanadii gusad. Enoc, machimala-baigan nikusbalid, degine, bunamala nikusbalid. 
Degisoggu, Enoc, bela birga-dulataled-ilapaa gaka dulapaa-gakatar (365) dula-gudii gusad. 
Ar Enoc, Bab-Dummad-walikaa nanadii gussoggu, ibagwengi sate daklealid, ar ade, Bab-Dummad na-sesad. 
Matusalén, birga-dulabakebak-gakagugle-nikadgi (187), e-machi-Lamec gwalulesad. 
A-sorba, Matusalén, birga-dulataled-ilagugle gaka dulabake-gakabo (782) napi-gudii gusad. Matusalén, machimala-baigan nikusbalid, degine, bunamala nikusbalid. 
Degisoggu, Matusalén, bela birga-dulataled-ilabakebak gaka dulapaa-gakabakebak (969) dula-gudii gusad. Degi-birga-nika Matusalén burgwisad. 
Lamec, birga-dulabakebak-gakabo-nikadgi (182), e-machi gwalulesad. 
Noéʼye e-machi-onugsasad. Ar ade, sogded: “Bab-Jehová we-napa-ukabsassoggu, a-ular, anmar ise-alamaknai arbaergebed. Ar emigindi, we-machigwa anmarga obunnoged ukoed.” 
Noé-gwalulesad-sorba, Lamec, birga-dulataled-ilatar gaka dulabake-gakambe-gakatar (595) napi-gudii gusad. Lamec, machimala-baigan nikusbalid, degine, bunamala nikusbalid. 
Degisoggu, Lamec, bela birga-dulataled-ilagugle gaka dulapaa-gakambe-gakagugle (777) dula-gudii gusad. Degi-birga-nika Lamec burgwisad. 
Noé, bato birga-dulataled-ilatar (500) nikagua, e-masmala gwalulenonikid: Sem, Cam, degi, Jafet.