Génesis.
8.
Geb degine, Bab-Dummad Noéʼgi, degi, ibmar-durgan-sapurbarmaladgi, ibmar-durgan-sunna-akwilemaladgi, bela ur-dummadyaba-bukwadgi binsaded. Bab-Dummad we-napneggi burwa ogornonikid. Geb degi, dii ilided. 
Deginbali, demar-wilasailadgi dii-sailagan-mamaid atided, degine, nibneggi dii-sailagan-mamaid atidmogad. Dii bar wissulid. 
Agine, dii binna-binna ilided. Iba-dulagugle-gakambe-gusgu (150), dii nue ilided. 
Geb nii-walagugled-ibambe-gakagugledgi, ur-dummad Ararat-yalagangi megidapid. 
Dii nue-iremai gualid. Nii-warambed-gebe-iba-onodedgi bato yar-dummagan-e-mullumar noalid. 
Iba-dulabogwad-sorba (40), Noé ur-dummadgi yawagak-bipi-soblesad egasad. 
Geb agi, sikwisichid barmisad. Sikwisichiddi gannar-gannar gukudii gusad, dii-dingued edarbedii gusad. 
Noé sikwisichid-barmisad-sorba, nuu barmisad, adi, dakega sana napa dingudibeye. 
Ar napa amba yoo dingusoggu, nuu siged amissurgusad. Degisoggu, gannar ur-dummadse nonikid. Noé e-argan onosgu, nuu-gasad, ur-dummadyaba gannar nuu-odosad. 
Noé ibagugle (7) napi edarbisbalid, a-sorba gannar nuu barmisbalid. 
Bato nue neg-mutikguali, nuu gannar nonikid. E-nugargi olivo-gagan senonikid. Agi, Noé nabir neg-nue-dingumaid mag daksad. 
Noé amba ibagugle (7) napi edarbisbalid, geb agi, gannar Noé nuu barmisbalid. Agindi, nuu Noéʼse bar gannar nonisulid. 
Degidgine, Noé birga-dulataled-ilanergwa-gakagwensak-nikadgi (601), napneg nue dingusad. Nii-gebe-gwisguded-ibagwenadgi, Noé ur-dummad-e-uas earisad. Geb agi dakded, napa dingusnai. 
Nii-warbogwad-iba-dulagwen-gakagugledgi, napa nue-dingusad. 
Geb degi, Bab-Dummad Noéʼga sogded: 
“Ur-dummadyaba-be-gudiid be nodago. Be-ome, be-masmala, degi, be-balagan beba nodamarmogo. 
Ibmar-dula-gudidimalad ur-dummadyaba-bukwad bela be onobalo: Nuumar, ibmar-durgan, degi, ibmar-durgan-napagi-garmakdimalad, adi, amar bela we-napneg-naid-ugakaase mimilemalagar. Deginbali, dula ichesur mergumalaga, we-napneg-naidgi bela ambikumalagar.” 
Geb degine, ur-dummadyaba-bukwadgi nosmarsunnad: Noé, e-ome, e-masmala, degi, e-balamar. 
Bela ibmar-durgan ur-dummadyaba-bukmaladi na-egad-egad-balibimaladba, ainismarmogad: Bela ibmar-sapurbarmalad, degi, bela ibmar-durgan-akwilemalad, bela ibmar-durgan-napagi-garmakdimalad, bela nuumar, ur-dummadgi ainismalad. 
Geb agine, Noé, Bab-Jehová-nug-odummogega, ibmar-ogumakar-ukleged-aila sobsad. Geb Noé bela ibmar-durgan-swilidikmalad, degi, nuumar-swilidikmalad akar-akar-ugakaase susad. Geb degine, ailagi ogumakar Bab-Jehováʼga uksad. 
Ibmar-ogumakaled-yeer-yapanned Bab-Jehováʼse-mosgu, Bab-Jehová sogded: “We-napneg dulemar-isgued-ular, bar an ukabsaosulid. Ar dulemar gusgu na sapingwagwad-akar e-gwagegi unnila isguedginbi binsadimalad. Degine, an emi-imaksadyob, muusailaba bela ibmar-dula-gudidiid bar an ogilogosulid. 
Amba we-napneg-naidgi, ibmar diglegoed, ibmar welegoed, neg uere guoed, neg diopii guoed, yola-nii naguoed, dii-wied-nii naguoed, neg-ibgined naguoed, neg-mutikid nagubaloed. Bela wemar-ibmar nikagu guoed, sate guosulid.”