Génesis.
47.
José, Faraón-owisonaded, ega sogdapid: —An-bab, degine, an-iamar-Canaán-yargi-mamaid, emi bato Gosén-yarse nonimalad, bela ibmar-nikad, sibad-wawaadmar, degi, moli-bebe-nikmalad senonimarbalid. 
José, Faraónʼse e-iamar-walatar sesad, adi, Faraón amar-mag-dake guegar. 
Geb degine, Faraón José-e-iamarse egichialid: —¿Ibigi bemar arbamala? Amar abin-imakdemalad: —Dummad, anmar-be-maigan-gumaladi, anmar-dadganyob anmar sibad-wawaad-edarbemalad gumalad. 
Anmar we-yarse megega nonikid, ar ade, Canaán-yalagi ukud yaisulid, anmar-sibad-wawaad gagan-maed sate gualid. Degisoggu, Dummad, Gosén-yargi-megega wis be anmar-imake. 
Geb degine, Faraón, Joséʼga sogded: —José, be-bab-nonikidi, be-iamar-nonikidi, be-walik-megega nonimalad. 
Egipto-yala bega guakwaa naid. Be-gwenadgan-megega Gosén-yar ega be uke, ar ade, a-napa, napa-baiganba bur nuedid. Ar be-gwenadgan-abargi machergan-nue-yeer-ibmar-durgan-akwemalad-nikadibe, amar an-ibmar-durgan-akwega be onugsaodo. 
José, Faraónʼse e-bab-sesa gusbalid, adi, Faraón Jacob-mag-dake guegar. Jacob, Faraón-argan-gadgua, ise-nued-egi-binsaedgi ega sogsad, be undarsaar megena gadinye. 
Geb Faraón Jacobʼse egichialid: —¿Birgabigwa be nika? 
Jacob Faraón-abin sogded: —Birga-dulanergwa-gakambegus (130), we-napneggi an bipirmakdiid. Doggus ibagan-nuegan an daksasurgusad. Ibagan-isganagi bur bule an gudii gusad. An-dadgan-sergu-megisadyob yoo an ese warmaked. 
Geb a-sorbali, Jacob Faraónʼga sogded, degimaloye. Geb Jacob noded. 
Degidgine, Joséʼdi, e-bab-Jacob, degi, e-iamar, Egipto-yargi-megega imaksad. Geb degine, José Faraón-ega-igar-uksadba, Ramesés-yargi, e-babga, degi, e-gwenadganga, nainumar-bur-nued uksad. 
Deginbali, José e-gwenadgan-mas-abegedba, bela e-gwenadganga mas-ukmai gusad. 
Bela neggweburmargi bur bule ukud nasgumaid. Abali, mas sategusad. Egiptoʼgi, degi, Canaán-yargi ukudba dulemar burgwemamaid. 
Egiptoʼginmalad, degi, Canaánʼginmalad orosgi-dakleged Joséʼse-bakega bela e-mani ebusmalad. A-mani, José, Faraón-neggi bela sabosad. 
Egiptoʼgi, degi, Canaán-yargi mani-sategussoggu, Egipto-dulemar Joséʼga sognadmalad: —¡Be anmarga masgunned udage! Mani-satedba, ukudba be anmar-oburgwer, igar maisulid, wedi noaled. 
José dulemar-abin sogded: —Ar bemar mani bergusale, be-ibmar-durgan be sedamalo. A-muchub, an bemarga orosgi-dakleged ukoed. 
Egipto-dulemar Joséʼse we-ibmar-durgan senonimalad: Molimar, sibad-wawaadmar, sibadmar, moli-bebe-nikamalad, degi, moli-uayasuidmar senonimalad. A-birgagi, José, a-muchub ega orosgi-dakleged uksad. 
A-birga-bergusgua, birga-baid nagunonikid. Geb Egipto-dulemar Joséʼga sognonimalad: —Dummad, anmar mani-satedi, geg anmar begi odukued. Deginbali, anmar-ibdurgan bela begadga gusbalid. Anmar mas-bakega, ibmar-baigan-bega-uked sated. Degisoggu, anmar-nainu, degi, anmar begadga gumalargebed. 
Be anmar-nainu baksundo, be anmar-bakbarsundo, adi, masgi be anmar-ogundii guegar. Anmar Faraón-e-maiga gumaloed, degine, ibmar-gwaggi anmar-nainugi-anmar-arbaoedi, Faraónʼgadga guoed. Mer anmar burgwega, degi, melle napa binsa wilenai-gubaliga, be anmarga ibmar-gwag udado. ¿Ar ibiga burgwega be anmar-imakoe? ¿Ibiga binsa nainu wilenai-guega be imakbaloe? Melle deyob be imake. 
Geb degine, José Egipto-yargi Faraónʼga bela nainu baksad, ar ade, Egipto-dulemala ukudba na e-nainu ukdemalad. Weyobi Faraónʼgadga nainumar gunonikid. 
Degisoggu, Egipto-dulemala bela Egipto-yargi Faraón-maiga gunonimarsundo. 
José unnilagwa Egipto-dule-irwa-bab-dummaganse-gormalad-e-nainubi baksasulid, ar ade, Faraón amarga orosgi-dakleged ukdaed. Degisoggu, amardi e-nainu uksasurmalad. 
Geb degine, José dulemarga sogded: —Emigindi, be-nainumar, degi, bemar, Faraónʼgadga gunonikid. Ar ade, ibmarmar-an-baksadi, Faraónʼga an baksad. Emigindi, an bemarga ibmar-gwag digmalaga an uked. 
Bemar ibmar-weemaloedi, sagu-walatargi gwensak Faraónʼga be ukmaloed. Sagu-warbakegwaddi, be digega ebumaloed. Adi bemar, be-mimmigan, degi, bela dulemar-beba-gudidimalad a-ibmar gunmalagar. 
Dulemar José-abin sogdemalad: —Be nued anmargi daed. Nue be anmar-bendaksad. Degisulina, anmar burgoenad. ¡Anmar Faraón-maiga gumalodo! 
Weyobi José igar-mesnonikid, bela Egipto-yalagi ibmar-durbagan-welegedi, sagu-atargi gwensak Faraónʼga ukoye. José weyob igar-mesisadi, amba we-garda-narmaklenaidse, deyob, we-igar maid. Ar Egipto-dule-irwa-bab-dummadyob-imakdimaladse-gormaladdi bennuksurmalad, ar ade, e-nainumala Faraónʼgadga gussurgusad. 
Israel-dulemala Egipto-yargi-yoggunonimaladi, Gosén-yargi megnonimalad. Agi, nainumar na nikudmalad, dula-ichesur-mergu gudmalad. 
Jacob birgambe-gakagugle (17) Egipto-yargi megisad. Jacob birga-dulagugle-gakagugle (147) gudii gusad. 
Ibagwengine, Israel e-burgwed warmaksa itoalid. A-ulale, e-machi-Joséʼse gochad, ega sogded: —Ar ibmar-nued be anga nue-imakbiele, be-argan an-dua-urba be mese. Weyobi be anga oyogoed, an bese ibmar-egisoed, be anga imakedseye. Degisoggu, an bese egised, melle Egipto-yargi be an-mui-digo. 
An-babganyob an burgwenonimogale, Egipto-yargi be an-mui sedo. Bia an-babgan-muimar digar mamai, agi be an-mui digmogo. José e-bab-abin sogded: —An deyob imakodo. 
E-bab Joséʼgi alamaknai gusad: —¡Ise-sogar be anga soge, deyob an imakoye! José ise-sogar abin-sogded: —Eye, deyob an imakoe. Geb degine, Israel e-gabed-nono-onakwedsik, e-nono yollee imaksad.