Génesis.
49.
Jacob e-machimalase gochad. Ese nonimargu, ega sogded: “Anse walikaa be dagmar. An bega sogoed, igi bemar yoedse guoe. 
Masmala, be an-itomalagala, anse be dagmar, be-bab-Israel be nue itodamar. 
”Rubén, be an-machi-sailaginedid, be an-ganguedid, be-inse an-san-burbagi danikidid. Be-inse bur nug-dummarba-nika guedid, be-inse bur gangued-nika guedid. 
Ar ade, be diwar-nomaidyob gued, geg be galeged. Ar an-omese be gornonigu, an-gabedgi be dodosad. A-ulale, bur dummadga bar be guosulid. 
”Simeón, Leví, gwenadgan gumalad. Es-suidmargi dulemar-sabsur-imakdamalad. 
E-onmakbukwadse, gwen an dogbisulid. E-igar-itobukmalad-abargi, gwen an sigbisulid. Ar ade, sae-itodmargu, dulemar-oburgwismalad. Yogasaar moli-bebe-nikad-e-dua-dub-wardummad siksamalad. 
Be-doggus-urwed bela-bela isdar-itolegega gusun. Degine, be-sabsur-ibmar-imaked, bela-bela isdar-daklegega gusun. Jacob-yalaganba an bemar-oaisakioed, Israel-neggweburmargi bela aisakiega an bemar-imakoed. 
”Judá, be-gwenadgan be-nug odummomaloed. Be-gwenadgan be-abin dulluu e-bebe napase ebulegedse imakmaloed. Be-isdarmaladgi be obindii guoed. 
Judá, be achumigur-sapingwagwadyob gued, Masgasa-gunnaid bergusale, obunnomegisdaed. ¿Doa ese achaoe? Dule geg ese achaed. 
Judá-dulemar-abargi dule-negsemaid gwen surguosulid, degine, gaapoled-e-ibed danikidse e-gaapoled-ganikid egi suosurmarbalid. Ar ade, dulemar-yar-baid-baidgi-bukmalad e-rey-Siloh-nonikoed, a-rey-sogedba nanamaloed. 
Judá mani-ibedga gunonikosoggu, uva-bukidar-nikadba e-moli-uayasuid uva-sailagi edinnoed, e-moli-bipi bur uva-e-wardummadgi edinnoed. Degi, Judá vino-obine-nikadba, e-mor vinoʼgi enukoed. ¡Vinoʼgi, e-mordummad enukbaloed! 
E-ibya vinoʼba bur gudureged. E-nugarmar moli-nunisba bur sibudikid. Ar Judá, mani-ibedid. 
”Zabulón, demar-gakagi megoed. Agi, urmar-nagued-neg nika guoed. E-ambikuoed, Sidón-yalase warmakoed. 
”Isacar, moli-uayasuid-dutusulidyob gued. Geg-gwisgue e-neg-yagi sagumar-imbagi obunnomaid. 
Isacar, obunnogega, yar-nued-dakargua, degi, yeerdaklege dakargua, ibmar-berbegega na san imaksad, emar-maiga gunonikid. 
”Dan, Israel-masmala-ambe-gakabogwad-baiganyobmogad (12). Dan, e-sordamarga igar-nudakedga guoed. 
Dan, naibe-buled igargi-maidyob guoed, a-naibe moli-maligi warmaksale, dule-moli-birgi-siid argwatedaed.” 
Jacob sogdebalid: “¡Bab-Jehováʼye, bela-bela be an-abonoged, an-edarbediid!” 
Geb degine, Jacob e-masmalaga sogdebalid: “Gadʼgi sordamar-urwemalad bukidar gwisgunonimaloed. Degi-inigwele, Gadʼdi, a-sordamar-baregitoed. 
”Aser mas-yaisur-nika guoed. We-masmar reymar-mas-gunnedyob yeer-gulle itomaloed. 
”Neftalí, igi goe-ome sapurba e-itolegedba gudidae, degi, e-mimmigan yeerdakle nikabali, deyob gued. 
”José, dian-dikarba sapi-gwichiyob gued, sapi-yaisur-sanmakedyobid, e-anagan galu-birgi obakmamaid. 
Joséʼga nunmaked-dummad uksamalad, sigu-mimalad isdar be-dakmaladba begi sigu mismalad. 
Degi-inigwele, bedi sikirmaksasulid, be-garganguedba be-warsi be gachii ganigwichi gusad. ¡Jacob-e-Bab-Dummad-Gandik-Maid, dog-nuedye an bega soged! Bedi sibad-wawaad-edarbedyob emar-idumaid, bedi, akwasaila-dule-odukuedyob gued, be Israel-bendakedid. 
¡Ar ade, be-bab-e-Bab-Dummad be-bendakoed! Bab-Dummad-Bela-Gangued-Nikad, ise-nued begi binsaoed. ¡Nibneggi ise-nued begi binsaoed! ¡Demar-uluba ise-nued begi binsaoed! Bemala, ichesur mimmigan-nika gumaloed, degi, be-mimmigan masgi be-omadii gumaloed. 
An-babgan angi ise-nued-binsasadba, be-bab ise-nued bur begi binsanaid. José, we ise-nued begi binsalesadi, yarmar-epenneganagi ibmar-sanmakedba bur nueganad, sapur-epenneganagi ibmar-sanmakedba bur nueganad. José, we-ise-nued-binsaleged, begadid. Ar be-gwenadgan-abargi be sulesad. 
”Benjamín, achu-sapur-gadi-urwedyob gued. Wakdar e-masgasad gundaed. Sedodi, e-mas-obichadi, e-sordaganmala gundaed.” 
Wemala, Israel-dulemar-sogambe-gakabo-ambikusadid (12). Weyob e-bab-Jacob ise-nued-binsaedgi e-masmala-war-wargwenga na emar-guoedgi ega napi sunmaksad. 
Ibagwengi, Jacob weyob e-masmalaga igar uksad: “An-burgwed warmaksad. An burgwisale, Canaán-yalagi, Het-dule-Efrón-nainugi, akwasaila-ollor-siidgi, an-dadgan-dikarba an-mui be digmalo. 
A-akwasaila-ollor-siid an bega obared: Mamre-asabin Macpelaʼgi akwasaila-ollor-siid. Deunni, Abraham Het-dule-Efrónʼse nainu-baksagu, we-akwasaila-ollor-siid baksa gusbalid. Adi, agi e-gwenadgan-e-muimar digegar. 
Agi, Abraham, degi, e-ome-Sara digsamalad. Agi, Isaac, degine, e-ome-Rebeca digsamarbalid. Deginbali, agi, Lea an digsamogad. 
We-nainude, degine, akwasaila-ollor-siidde Het-dulese bakles gusad.” 
Jacob weyob e-masmalaga igar-uksad-bergusgu, gannar megided. Geb degine, burgwissunnad.