Deuteronomio.
32.
“Nibneg-naid, nue an-sunmaked itomalo. Napneg-naid, nue an-ibmar-soged itomalo. 
An-ibmar-odurdakoedi, dii-wiedyobi babatoed. An-sunmakoedi, booyobi babatoed. Gagan-gebe-aramakalidgi-dii-wiedyobi, an-ibmar-odurdakoedi, guoed. Gagan-dutuganagi-boomiedyobi, an-sunmakoed guoed. 
”An Bab-Jehová-nug soge-soge imakdii guoed. ¡Anmar-Bab-Dummad-nug be odummomar! 
Bab-Dummad akwasailayob anmar-odukued, bela ibmar-nueganbi imaked, ar ade, bela e-igarmala igar-innikimaladbiid. Bab-Dummad napiragwadid, egi ibmar-isgana naisulid. Bab-Dummad ibmar-napiragwadbi imaked, ibmar-innikigwadbi imaked. 
”Israel-dulemar, be dule-isganamalad, Bab-Dummadgi be nue-dummad-yolesmalad, bemar bar e-mimmiganga gusurmalad, ar ade, bemar na dukin nug-oichosmalad. 
Bemar, dulemar-gegeganad, bemar, dule-binsaedsurmaladid. ¿Ar weyob bemar be-Bab-Jehová-abin-imakmarde? ¿Ar Bab-Jehováʼde be-Bab-Dummadsursi? ¿Ar bemar-obinnisadsursi? ¡Ar Bab-Dummad we-napnegse bemar-senonikidid! ¡A wegi bemar-urbisadid! 
”Neg-epennemalad be ebinsao, birgamar-dikasurgus-nasmalad be ebinsao. Neg-epenne-gusmalad be-babse be egiso, be-bab bega sogoed. Be-girmar-seleganse be egiso, amar bega igar-onakoed. 
Bab-Dummad-Bur-Birigined, yar-baid-baidgi, degi, neggwebur-baid-baidgi, dulemar-urbenaigua, amarga sogedba e-yar-abingumalad nasiksad. Israel-dulemargindina, nued binsanai gusad. 
Ar ade, Israel-dulemar, Bab-Jehováʼgadid, ar ade, Jacob, Bab-Jehováʼgadga gunonikid. 
”Bab-Dummad, Israel-dulemar nega-dulesulidgangi-gudii daknonikid, neg-isganaganba, gwen ibmarga-guedsulidgi-gudii daknonikid. Bab-Dummad amar-angaagwar imaknonikid, amar-akwenonikid. Bela-bela, Bab-Jehová na e-ibya-akweyobi, Israel-dulemar-akwedii gusad. 
Ar igi sulubagi na e-mimmi-ogukuega e-uu-siidgi onodae, ei-argwate-dakele, na e-sakangi-gasa gannar e-uuse-sesdae, deyobi, Bab-Dummad, Israel-dulemar-semai gusmogad. 
Bab-Jehová na ebi Israel-dulemar-semaigusad, bab-dummad-baid eba gwen nadapi gussulid. 
”Bab-Dummad yalaganba Israel-dulemar onakwemaigusad. Nainugi-ibmar-welesadgi e-dulamar-oguchagusad. Achanisgi, degine, olivo-gwallugi na e-dulemar-oguchad. We-ibmarmar akwa-dutusulidgi ega onosgusad. 
Moli-nunis-gwamakaledgi oguchagusad, degine, sibad-e-nunisgi ogobsagusad. Sibad-wawaad-senigana-gwallu-ibegangi, degi, sibad-senigana-gwallu-ibegangi, oguchagusad. Basán-yalagi sibad-wawaad-machergangi, degine, sibad-machergangi oguchagusbalid. Orosgi-dakleged-trigo-bur-nuegangi oguchagusad, degine, uva-nis-ginnidgi ogobsagusad. 
”Deyobi, Jesurún nue wardunguded, agidbali, Jesurún-dulemar Bab-Dummadgi banguded. Nue-mas-gundiidbali, nue-wardungussunnad. Geb degine, e-Bab-Dummad-e-obinnisadgi banguded, E-bendakdiid ieded. 
Baigan-bab-dummaganse-gotemaladgi, Bab-Dummad-nobguega imakdemalad. E-bab-dummagan-e-ibmar-wilubgan-sunnasurmaladgi, Bab-Jehová-ouludmalad. 
Niamarga ibmar-ogumakar ukdemalad, amardi, bab-dummadgansurmalad. Bab-dummadgan-dakdisurmaladga ibmar-ukdemalad. Bab-dummagan-binidganga, emis-nomaladgala, be-babgan we-bab-dummagan-e-nug-odummossurmaladgala, bemar ibmar-ogumakar ukdemalad. 
Israel-dulemar, be-Bab-Dummad-be-ogwalulesad, be iedmalad. Bemar, be-Bab-Dummad-bega-san-burba-dulad-uksad, be iedmalad. 
”Bab-Jehová, e-mimmigan e-isdar-dake daksagua, sabsur-uluded. Degidbali, e-mimmigan-obachasunnad. 
Agine, Bab-Dummad sogdesunnad: ‘We-dulemargi an banguoed, gi-na-gudmarsunnodibe. Ar wemar an-sogedba dasurmalad, dule-isganamalad, we-masmala geg-innikii nanamaladid. 
Israel-dulemar, Bab-Dummadsulid e-bab-dummadga-imaksamalad. Degidbali, Israel-dulemar, nobguega an-imaksad. Nuchu-mimmi na e-bab-dummadga-imakdemaladgi an-oulusmalad. An-dulasurmalad an sabguoed, bemar, a-dulemargi nobgumaloed. An dule-binsaed-satemaladgi nabir binsaoed, bemar, a-dulemargi uludoed. 
Ar bela-belagwad sae-sae-ito an-imaksamalad, an-urwedi soo-ginnitibi-siiyobid. An-urwedi, nega-uluse warmaked. Bela napaneggi-ibmar-sanmakmalad ese gummakoed. Bela-bela yar-e-sailamar ese gummakoed. 
” ’Ani an Israel-dulemargi boni-dummagan obulogoed. Bela an-sigumar Israel-dulemargi an mioed. 
An Israel-dulemargi ukud-dummad barmidagoed. Uelleged-dummad, degine, bonigan-dummad, we-dulemar-obelogega an imakoed. Degine, Israel-dulemargi achu-sapur-ursilimar an barmidagoed, naibe-nuegan napagi-unimakdimalad egi an onioed. 
E-mimmigan magaba-nodogu, es-suidgi burgwemaloed. Negyabardi, bela-bela dobe-itomaloed. Sapingana, bunamala, goemar, degi, dadormar, bela-burgwemaloed. 
An binsasanad, Israel-dulemar an dikasuli oaisakioye, dulemar mer bar egi-binsaega an imakoye. 
Degi-inigwele, mer deyob bar imakoye an binsasad, adi, an-isdarmalad mer angi dodomalagar. An-isdarmalad angi-burgued an abessulid, abakalegi sokarmalale: Ar we-ibmar Bab-Jehová imaksasulid. Ar anmar bela imaksad. We-dulemargi anmar nakwisad.’ 
”Ar Israel-dulemar aku neg-itomalad, ibmar-magar-itoged satemalad. 
Ar Israel-dulemar, wis binsaed-nikamalana, wis mag-neg-itomalana, na-bergumaloed nue magar itononimaloenad. 
Ar wede, ¿igi-nabir dule-wargwenad sorda-miligwenad baregichasunna (1,000)? Ar wede, ¿igi-nabir dule-warbogwad sorda-miliambegwad oduurmaksasunna (10,000)? Ar Bab-Jehová eba-gudiidba deyob nabir gued. Ar Bab-Jehová eba-gudisulina, e-isdarmaladgi-nakwega imaksasulinad. Deyob e-isdarmaladgi obinosulinad. 
Ar anmar-isdarmalad nue-wismalad, e-bab-dummagan-e-gargangued anmar-Bab-Dummadyobsulid. 
E-uva-nainumala, Sodoma-neggweburyobi isgana-nanaed. E-uva-nainumala, Gomorra-neggweburyobi isgana-nanaed. E-uvaʼmala, ina-nusuyob-nanaed, ber gagbire-nanaed. 
E-vino, naibe-e-gichiyobid, naibe-e-boniganyobi dule-oburgwed. 
” ‘Ar bela an-sae-itoged an sabodiid. An-ibmar-nuedyob an sediid. 
Ar buged-mai-imakleged angadid, anse berguoed. E-ibagan-mosale, anse ibitomaloed, ar ade, na dummad-wilegoed bato warmakdanikid. E-sabsur-odurdaklegoed-ibagan warmaksad.’ 
”Ar Bab-Jehová e-dulemar-gargangued-sate-dakalir, bendaknonikoed. Bab-Jehová maimar-bergus-dakalir, degine, dule-maiga-gudisurmalad-bergus-dakalir, Bab-Jehová e-dulemar-wile dakdoed. 
Agi, Bab-Dummad Israel-dulemarga sogdagoed: ‘¿Bia be-bab-dummagan bemar-egi-bengussurmaladde nadmarsunna? 
Be-bab-dummagan, ega be ibmar-ogumakar-uksad-e-gwallu-guchamalad, ¿bia nadmarsunna? Be-bab-dummagan, ega be gobed-uksad-gobsamalad, ¿bia nadmarsunna?’ Ar emigindi, a-bab-dummagan be-bendakmalaga, gwisgumardo. Ar emigindi, a-bab-dummagan be-bendakega, dagmardo. 
”Ar emigindi, Israel-dulemar, be dakmardo. ‘Anbi unnila Bab-Dummad gued. Bab-Dummad-baid sated. Ani, an dulemar-odulogedid, ani, an dulemar-oburgwedid. Ani, an dulemar-naibisaedid, ani, an dulemar-nudakedid. Dule angi wakinnosur guoed. 
An surgan-onaksun. An-dula-degisadegu-maid-nukad. Ise-sogar an sogsun: 
An-es-suid bela-bela-dakarmakaled an bela-bela e-nugar-ebitele, dulemarga-igar-nabogedgi an es-gadele, an-isdarmalad-buged-mai an imakoed, dulemar-isdar-an-dakmalad an sabsur-odurdakoed. 
An-sigumar ablisbi gunonikoed, an-es-suid san-immi-immi imakoed. Dule-naibigusmalad-e-ablis ariogoed, dule-galesmalad-e-ablis milegoed, dule-isdarmalad-e-dummagan-e-nono anse egwallegoed.’ 
”Dulemar-yar-baid-baidginmalad, Bab-Dummad-dulamarba be wergumar. Bab-Dummad, ega-arbamalad-e-ablis-eosmalad buged-mai imakoed. Ar deyob gunonikoed. E-isdarmalad-buged-mai imakoed. Bab-Dummad e-dulamarga isgued osulogoed, degi, e-yala-e-isgued ega osulobaloed.” 
Moisés dulemar-bukwadse nadegusad, Nun-machi-Josué, eba nadgusmogad. We-namaked bela dulemarga sogsagusad. 
Moisés bela Israel-dulemarga we-namaked sogsagua, 
a-dulemarga sogded: “Emi we-ibmarmar-an-bemarga-sognaidba bela be nanamalo, degine, be-mimmiganga bela we-Igar-an-bemarga-sognaidba nanamaloye, be sogmalo. 
Ar we-igarmar-an-bega-sognaid binsa bemarga soglesulid. Ar we-Igar-Maidba be damalale, be nabir dula-gudii gumaloed. Ar we-Igarmar-Maidba be damalale, Jordán-diwar-obakar-yar-be-susokarmaladgi nabir be suiti-gudii gumaloed.” 
Amba a-ibagine, Bab-Jehová Moisésʼga sunmakdebalid, ega sogded: 
“Abarim-yalaganse be naknae, agi Jericó-neggwebur-asabin Moab-yargi-Nebo-yala-siid be dakoed. Agi, be Canaán-yar Israel-dulemarga-an-uksokalid be dakoed. 
Ar be yar-nakoedgi be burgwedapoed, Igi be-ia-Aarón Hor-yargi burgwismoga, degi, e-serganba megnonigusa, deyob, be-serganba be megmogoed. 
Deyob be guoed, ar bemar bebogwa Israel-dulemar-wagab be angi yolesmalad, nega-dulesulidgan-Zinʼye-nugadgi, Cadesʼgi, Meriba-dii-naba be angi yolesmalad. Agi Israel-dulemar-abargi be an-nug odummossurmalad, be aku an-daksamalad. 
Degisoggu, Israel-dulemarga-yar-an-ukesokalid be unnila dakoed. A-yarsedi be dogosulid.”