2 Samuel.
16.
David yarbirgi sikwas-nasgua, Mefiboset-e-mai-Siba David-abin noalid, geb Davidʼga moli-uayasuid-walabo e-siged-nika-nika senonikid, degine, geb molimar-birgi we-ibmarmar senonibalid: Madu, dulataled-ilabo (200), uva-dinnagana-madu, gwadulatar (100), higo-dinnagana-madu, gwadulatar (100), degi, vino, moli-uka-buglu-gwagwen senonibalid. 
Rey-David, Sibaʼse egisded: —¿Ibiga be we-ibmar sedaniki? Siba abin-sogded: —Moli-uayasuid-walabogwadi, rey-e-gwenadgan-egi-sigmalaga an sedanikid. Madumar, degi, uva-dinnagana be-sordamar-ogunnega an sedanibalid. Vinoʼdina, bemar nega-dulesulidganba-gudiidgi-yeguarmalale, gobmalaga an sedanibalid. 
Rey-David, Sibaʼse egisded: —¿Be-dummad-Saúl-e-wagwadina? Siba abin-sogded: —Jerusalén-neggweburgi besa. Ar ade, binsaed: ‘Emi-iba, e-dad-negsemaigusad gannar ega uklegoye.’ 
Rey-David, Sibaʼga sogded: —Mefiboset-ibmar-nikad bela begadga gusunno. Ani an bega uked. Siba, David-abin dulluu imakded, geb ega sogdemogad: —Rey, be an-dummad-gued. Nuedye an bega sogdo, we-ibmar be anga uknagu. 
Rey-David Bahurim-neggweburse nonigua, Saúl-e-gwenad-Gera-machi-Simei, David-abin noalid. Agine, Simei, Davidʼgi uluded, gaya-isgana egi sogded. 
Degine, sordamar David-ebiris nadap-inigwele, Simei, Davidʼgi akwa-misad, degine, dummagangi akwa misbalid. 
Simei, Davidʼgi urwenagu, weyob sogded: —¡Be nae! ¡Be dule-isganad, be dule-gindakedid! 
Rey-gan-suega be Saúl-gwenadgan oburgwisad. A-nukad Bab-Jehováʼse be sabsur-odurdaklenaid. Agala, Bab-Jehová, be-machi-Absalón negseega imaknaid. ¡Na be dukin sadii, dule-gindakedbi gaamakdiid! 
Geb Sarvia-machi-Abisai, reyga sogded: —¿Ibiga we-dule-isgana an-dummad-reygi isdar sunmaknai? Dummad, an bega e-dukar egwanno. 
Rey-David, Sarvia-masmala-abin sogded: —Mer be achamalo. We-igar bemargadsulid, degi, angadsurmogad. Ar dule-we-ibmar-sognaidi, Bab-Jehová-sogedba-sognair sognaid, be Davidʼga deyob sognaoye. Degite, ¿doa ese golosunna, ibiga be deyob sognaye? 
David, Abisaiʼga, degi, e-sordaganga sogdebalid: —Be dakena, ar an-machi-sunnadbela, an-oburgwebigudiid, degite, ¿we-dule-Benjamín-wagwa-bursunna? Mer ese be gormalo. Igi na sunmakbie, e-itolegeddo, ar Bab-Jehová we-dule barmialid. 
Abakar Bab-Jehová, an-nunmak-itodiidba wile an-dakalile, we-gaya-isgana emi-angi-milenaidi, ibmar-nuedga anga gualile. 
David, e-sordaganmala igarba gannar nadmarbargu, amba Simei yar-dikarbali iisedi gaya-isgana-sognadapi gusad. Amba Davidʼgi akwamar-minai gusbalid, ukubse-bakar minai gusbalid. 
Rey-David, degi, bela e-sordaganmar nadapidba nue-geggusmalad. Degisoggu, Jordán-diwarse nonimargua, agi obunnosmalad. 
Degidgine, Absalón geb bela-Israel-dulemar-eba-danigusmalad, Jerusalén-neggweburse dognonimalad. Ahitofel eba nonimogad. 
David-e-ai-Arquita-dule-Husai, Absalónʼse-nonigua, ega sogded: —¡Rey be undar-suiti-megena gadin! 
Absalón, Husaiʼse egisded: —¿Ibiga be-aiba be nadsuli? ¿Ar be-aigi dodoye be soge? 
Husai, Absalón-abin sogded: —Degisuli. Ar unnila Bab-Jehová-dule-nug-imaksadba an gudiguoed, degi, dulemar, dule-nug-imaksadba an gudiguoed, bela Israel-dulemarba an gudigubaloed. Degisoggu, an be-walik gudiguoed. 
¿An doa-e-maiga bar guo be an insasunna? Unnila an be-maiga guergebed. ¿Ar rey-machiga an arbadii guosur be insae? Eye, an arbadii guoe. Ar igi an be-babga-arbadii gusa, deyob an bega arbadii gumogoed. 
Geb agine, Absalón, Ahitofelʼga sogded: —Be anga binsaed dake, ibu anmar imakoe. 
Ahitofel, Absalónʼga sogdemogad: —Be-bab e-omegan-dikarbalid e-neg-edarbega-obesadbo be gabnae. Adi, bela Israel-dulemar be-dakmalagar, be-babbogwa be nue-isdaradga gusye. Deyobile, dulemar-beba-nanaimalad bela gangudmaloed. 
Degisoggu, Absalónʼga neg-uas-birgi dordoneg-sobsamalad. Adi, agi e-bab-e-ome-dikarbarmaladse golegar. Geb deyobi Israel-dulemar bela daksamalad. 
We-ibagangine, dulemar Ahitofel-binsaed-ukedgi binsadamalad, wede Bab-Dummad-gayaburbaye. David, degi, Absalónʼmoga deyob egi binsadamarmogad.