2 Samuel.
20.
Degi-neg-gunaidgi dule-isgana, Benjamín-dule Bicri-machi-Seba gudimogad. A-dule gar-trompeta ogote gusad, degi, iseedi sunmakded: “¡Israel-dulemar, bela e-neg-e-negse namalo, anmar Davidʼba naguosuli, Isaí-machiba ibmar-nued anmar amiosulid!” 
Degisoggu, bela Israel-sordamar Davidʼgi bangudmarsunnad, geb Bicri-machi-Sebaʼba nadmarsunna. Judá-dulemardina, Rey-Davidʼba nadegusmalad, Jordán-diwar-akar Jerusalén-neggweburse nadmalad. 
Rey-David Jerusalén-neggweburgi e-neg-siidse-dognonigua, e-omegan-dikarbalid-warambegwad (10) na e-neg-akwega-obesadi, ononai gualid. Neg-bachik-siidse a-omegan-barmisad. Agi Rey-David we-e-omegan-dikarbalid-bendakdii gusad. Degi-inigwele, David, a-omeganse bar gordii gussulid. A-omegan e-burgwedse negyaba geg-noe gudii gusmalad, sui-e-ibe-burgwismaladyob gudii gusmalad. 
Degine, geb Rey-David, Amasaʼga sogded: “Judá-sordamar be anga onmako, ibapaase be an-asabin gwisgunoniko, sordamar nonimarmogo.” 
Amasa, Judá-sordamar-onmakega nade gusad. Sordamar-onmakega undar gaganai gualid, degisoggu, e-ibagan ega obite gusad. 
David deyob daksadbali, Abisaiʼga sogded: “Bicri-machi-Seba bur bule Absalónʼba anmar-wiogoed. Degisoggu, be an-sordamar sedo, be Seba-baleginnamalo, abakale, Seba neggwebur-galu-matusulidgi dogalile. Ar degiile, aka bur bule anmarga neg-gaganonikoed.” 
Agi Jerusalén-neggwebur-akar, Bicri-machi-Seba-barganaega wemar Abisaiʼba nade gusmalad: Joab, degi, e-sordamar, Cereteo-sordamar, Pelet-sordamar, degi, niga-gandikmalad nadegusmarmogad. 
Gabaón-neg-nugadgi akwasaila-siid-dikarba-nadapmargua, Amasa abin noalid. Deunni, Joab urwed-mor-yoi-gudiid, e-dikargi-molidub-naidgi es-suid-nai gudibalid. Degi-gudiidgi egi esbunyar argwated. 
Agine, Joab Amasaʼga sogded: “Degite gwenad, ¿be nueganbi?” Degine, geb Joab sakwa-nuedgi Amasa-e-siga gasad, e-wagar-uegar. 
Amasaʼdina, Joab argan-baidgi esbunyar-baid-sedanikid daksasulid. Degisoggu, ese-danigua, Joab, Amasa-e-dikargi esbunyar-yononikid. Geb e-samurmar ainide gusad. Agi Amasa ilagwen-burgwar naded, bar Joab ese achassulid. Degine geb, Joab e-ia-Abisaiʼbogwa Bicri-machi-Seba barganadmalad. 
Joab-e-sorda-gwensak Amasa-mui-dikarba gwisgunonikid, geb iseedi goted: “¡Dule Joabʼba nanaimalad, David-bendakbimalad, Joab-sorba namalo!” 
Amasa abebi igargi meremaisoggua, sordamar-a-igarba-nadapmalad, Amasa-dakega, bela gwisguddamalad. Agi, sorda-iseedi-gochadi dulemar-gwisguddamalad-daksagua, Amasa-igargi-maid obacha imaksad. Geb mor-dummad egi ogicha imaksabalid. 
Deyob Amasa-onirilesgua, Bicri-machi-Seba-baleginnegar sordamar bela Joabʼba nadegusmalad. 
Seba, bela Israel-dadgan-walambe-gakabogwad-bukwadse (12) idakdii gusad, degi, Abel-Bet-Maaca-neggwebur-siidse idakdii gusad. Degi, Barim-neggweburginmalad bela Sebaʼba nagusmarmogad. 
Joab e-sordaganbo Abel-Bet-Maaca-neggweburse nonimargua, bela neggwebur-ebirismalad. Neggweburgi dogega, e-galu-matusulid-akwabiid-dikarba napa-nakwemaid-imaksamalad. Geb Joab-sordamar galu-eyaridmalad. 
Agine, geb ome-nue-binsaed-nikadi iseedi Joab-sordamarse goted: —¡An-itomala! ¡An-itomala! Joabʼse wis be anga gormala. An ebo sunmakbie. 
Agine, Joab omese-nonikid. Geb ome ega sogded: —¿Be, Joab? Joab abin-sogded: —Eye, ani an Joab. Ome ega sogdebalid: —Dummad, nue be an-itogo, an bega ibmar-sogoed. Joab abin-sogded: —Anga be sogdo, an be-itogoed. 
Geb ome weyob Joabʼga sogded: —Epennegwa, dule igar-nudakbiele, gusgu soglear daed: ‘Abelʼginmaladse be egismala.’ Ar dulemar deyob igar nudakdamalad. 
Anmar Israel-yargine dule-belagwamaladid, anmar bila-onoged-dule-surmalad. Anmar-neggwebur Israel-yargine nuga-nikadid. ¡Aka be emisgindi neggwebur-nuga-nikad be oitobied! ¿Ibiga be Bab-Jehová-e-dulamar osulobie? 
Joab ome-abin sogded: —Suli, deyob an neg-imakosuli, negmar-earnai an guosuli. 
Neg-oichogega an danisulid. Anmar unnila dule-gwensakbina gudanikid. Efraín-yalaganbalid Bicri-machi-Sebaʼbina anmar danikid. A-dule, Rey-Davidʼgi gwisgunonikid. A-dule, be anmarga uke. Ar be, a-dule be anmarga uksale, anmar yog-naar saoed. Ome, Joabʼga sogded: —Degir-nabirdo. Neggwebur-galu-birgi Seba-e-nono bega egwallenonikodo. 
We-ome binsaed-yeer-nikasoggua, bela dulemarbogwa sunmaksad. Degisoggu, Bicri-machi-Seba-e-nono egwachamalad. Geb Joabʼga galu-matusulid-birgi Siba-e-nono mecharmalad. Agi, Joab gar-trompeta ogochad, geb deyob neggweburgi bangudmalad, e-neg-e-negse nadegusmalad. Joabʼdina, Rey-Davidʼse nonikid, Jerusalén-neggweburse. 
Weyob Joab bela Israel-sordamar-e-dummadga gunonikid: Joiada-machi-Benaíaʼdina, Cereteo-dulemar-iduedga, degi, Pelet-dulemar-iduedga gunonimogad. 
Adoramʼdina, mani-galeged-e-dummadga gunonimogad. Ahilud-machi-Josafatʼdina, neg-gusmalad-garda-narmaked-e-dummadid. 
Sevaʼdina, garda-narmakedga nug-imaklenonikid. Sadoc, degi, Abiatarʼbogwa, dule-irwa-Bab-Dummadse-gormaladga nuggunonimalad. 
Jair-dule-Iraʼdina, Davidʼga dule-irwa-Bab-Dummadse-goledga gunonimogad.