Nehemías.
11.
Dulemar-neggweburgi-dummaganga-gudidimalad Jerusalén-neggweburgi megnonimalad. Ar Jerusalén-neggwebur, neggwebur-swilidikid-gued. Degi, dulemar-baigandi, na wilubdaknanai-guarmalad, doa-dule, dule-e-ambegine gwensak (10%) Jerusalén-neggwebur-islidikidse megnamaloe, degine, baigan-walabakebakaddi (9) e-neggwebur-baiganse megnamaloed. 
Bela-dulemar na dukin-dukin sogsamalad, emarde Jerusalén-neggweburgi megmaloye. A-ular, Israel-dulemar nue-yeer a-dulemargi binsasmalad. 
Dulemar Judá-yar-neggwebur-baigangi na e-nainu-nainugi-megismaladi, degi, na e-neggwebur-e-neggweburgi-megismaladi, wemar-dake: Dule-irwa-Bab-Dummadse-gormalad, Levita-dulemar, Bab-Dummadse-goled-neggi-dule-arbamalad, degi, Salomón-maigan-e-wagan. Israel-yar-e-dummaganga-gudimaladi, Jerusalén-neggweburgi megismalad. 
Amala, abala Judá-waganad, degi, abala Benjamín-waganmogad. Judá-wagandi, wemalad: Uzías-machi-Ataías. Uzíasʼde, Zacarías-machid. Zacaríasʼdi, Amarías-machid. Amaríasʼdi, Sefatías-machid. Sefatíasʼdi, Mahalaleel-machid. Mahalaleelʼdi, Fares-wagwad. 
Degine, Baruc-machi-Maasías, Barucʼde, Colhoze-machid. Colhozeʼdi, Hazaías-machid. Hazaíasʼdi, Adaías-machid. Adaíasʼdi, Joiarib-machid. Joiaribʼdi, Zacarías-machid. Zacaríasʼdi, Siloni-machid. 
Bela Fares-wagan, Jerusalén-neggweburgi dulataled-ilabake gaka dulapaa-gakabaabak (468) mergu megismalad. Bela wemala, bila-onomalad-sorda-gumalad. 
Benjamín-wagan Jerusalénʼgi megismaladi, wemalad: Mesulam-machi-Salú, Mesulamʼde, Joed-machid. Joedʼdi, Pedaías-machid. Pedaíasʼdi, Colaías-machid. Colaíasʼdi, Maasías-machid. Maasíasʼdi, Itiel-machid. Itielʼdi, Jesaías-machid. 
Degine, Jesaías-gwenadgan-gargwenmaladdi, Gabai, degi, Salai, bela amarse-bakale, dulataled-ilabakebak gaka dulagwen-gakabaabak (928) mergumalad. 
Zicri-machi-Joel, wemar-e-dummadga gued. Degine, Senúa-machi-Judá, dummad-sorbali Jerusalén-neggweburgi negdakedmogad. 
Dule-irwa-Bab-Dummadse-gormaladdi, wemalad: Joiarib-machi-Jedaías, Jaquín, 
Hilcías-machi-Seraías. Hilcíasʼde, Mesulam-machid. Mesulamʼdi, Sadoc-machid. Sadocʼdi, Meraiot-machid. Meraiotʼdi, Ahitob-machid. We-Ahitobʼde, Bab-Dummadse-goled-neg-e-dummadid. 
Degine, bela e-gwenadgan Bab-Dummadse-goled-neggi-arbananaid, dulataled-ilabaabak gaka dulagwen-gakabo (822) mergued. Deyobi, Jeroham-machi-Adaías, Jerusalénʼgi megismogad. Jerohamʼde, Pelalías-machid. Pelalíasʼdi, Amsi-machid. Amsiʼdi, Zacarías-machid. Zacaríasʼdi, Pasur-machid. Pasurʼdi, Malquías-machid. 
Degine, Adaías-gwenadgan, e-neg-yaurgi na negsedimalad, bela dulataled-ilabo gaka dulabo-gakabo (242) mergue megismarmogad. Deginbali, Azareel-machi-Amasai, megismogad, Azareelʼde, Azai-machid. Azaiʼdi, Mesilemot-machid. Mesilemotʼdi, Imer-machid. 
Degine, Amasai-gwenadgan, dule-gala-ibeganad, bela dulanergwa-gakabaabak (128) mergued. Gedolim-machi-Zabdiel amar-dummadga-gued. 
Levita-dulemardi, wemalad: Hasub-machi-Semaías, Hasubʼde, Azricam-machid. Azricamʼdi, Hasabías-machid. Hasabíasʼdi, Buni-machid. 
Sabetai, Jozabadʼbo, megismarmogad. Wemar, Levita-dulemar-e-dummagan-gumalad, degi, Bab-Dummadse-goled-neg-magabalid-soblenaid, e-dummaganga-gumalad. 
Micaía-machi-Matanías, a-dule-namaked-e-iduedid. Bab-Dummadse-goter, a-inse Bab-Dummad-nug ogannoddaed, degi, dog-nuedye Bab-Dummadga sogdedaed. Micaíaʼde, Zabdi-machid. Zabdiʼdi, Asaf-machid. Degi, Bacbuquías Matanías-sorbalidi, Jerusalénʼgi megismogad. Degi, Samúa-machi-Abda, Samúaʼde, Galal-machid. Galalʼdi, Jedutún-machid. 
Bela Levita-dulemala, Jerusalén-neggwebur-islidikidgi, dulataled-ilabo gaka dulabake-gakabake (284) mergue megismalad. 
Yawagak-dakmaladdi, wemalad: Acub, Talmón, degine, e-urbamar. Wemala, yawagakgi-nakulemaladid. Amar, dulabaabak-gakambe-gakabo (172) bela mergumalad. 
Geb Israel-dulemar-baigandi, dule-irwa-Bab-Dummadse-gormalad-baigandi, degi, Levita-dulemar-baigandi, Judá-yargi baigan-neggweburmargi, na e-nainu-e-nainugi mamai-gusmalad. 
Bab-Dummadse-goled-neggi-arbamaladdi, Ofel-yargi megismalad. Ziha, degi, Gispa, amar, amar-dummadga gusmalad. 
Bani-machi-Uzi Jerusalén-neggweburgi, Levita-dulemar-e-dummadid. Baniʼde, Hasabías-machid. Hasabíasʼdi, Matanías-machid. Mataníasʼdi, Micaía-machid. We-Micaíaʼde, Asaf-wagwa-gwensakadid. Wemarde, Bab-Dummadse-goled-neggi dule-namakmalad-gumalad. 
Ar ade, rey igar-uksagusad, degi, bane-bane dule-namakmalad igarmar-mamaidba ibmar imakmaloed. 
Rey, e-nuggi Mesezabeel-machi-Petaías bela-dulemarga-igar-nabogegala, onug-imaksad. Mesazabeelʼde, Zera-wagwa-gwensakad-gued. Zeraʼde, Judá-wagwa-gumogad. 
Israel-dulemar-baigandi, Judá-yargi neggwebur-dummagangi, degi, e-neggwebur-burwigangi megismalad. A-neggweburmardi, wemalad: Quiriat-Arba-neggwebur, Dibón-neggwebur, Jecabseel-neggwebur. 
Jesúa-neggwebur, Molada-neggwebur, Bet-Pelet-neggwebur. 
Hazar-Sual-neggwebur, Beerseba-neggwebur, 
Siclag-neggwebur, Mecona-neggwebur, 
En-Rimón-neggwebur, Zora-neggwebur, Jarmut-neggwebur, 
Zanoa-neggwebur, Adulam-neggwebur, Laquis-neggwebur, Azeca-neggwebur. Beerseba-neggwebur-akar, Hinom-nebase ambikusmalad. 
Benjamín-wagandi we-neggweburmargi ambikusmalad: Geba-neggweburgi, Micmas-neggweburgi, Aía-neggweburgi, Betelʼgi, degi, e-neggwebur-burwigangi ambikusmalad. 
Neggwebur-baigan, wemarbalid: Anatot-neggwebur, Nob-neggwebur, Ananías-neggwebur, 
Hazor-neggwebur, Ramá-neggwebur, Gitaim-neggwebur, 
Hadid-neggwebur, Seboim-neggwebur, Nebalat-neggwebur. 
Lod-neggwebur, Ono-neggwebur, degi, Argangi-Ibmar-Sobmalad-Nebagi ambikusmalad. 
Levita-dulemar gwen-gwena Judá-yargi megismalad, degine, Benjamín-dulemarba megismarbalid.