Job.
5.
Elifaz sogdebalid: “Job, emisgindi be binnasuli golena, doa be-abin-imakdagodibe. Ar biti-baliwitur-gwensakse be golodibe. 
Ar emargi-isdar-binsalegedi, dule-binsaedsulid-oburgwed. Emargi-nobgulegedi, dule-binsaedsulid-oburgwed. 
An-sunnad an dakdaed, dule-binsaedsulidaedi igi nasgumaidae, degite, sikwas-naogua, e-neguya wioleddabalid. 
Dule-binsaed-sulidaed-e-mimmigandina, dule-e-bendaked satedaed, igar-naboleged-neggine nue-ibitodamalad, dule-e-irwa-gwisgued satedaed. 
Deginbali, dule-binsaedsulidaed-e-ibmar-digarmaladi, dule-ukudmaada-gudimalad e-ibe wedamalad. Gunmalagala iko-abargi e-ibe wedamalad. Dule-uku-uku-itodimaladi, a-dule-ibmar-nuegan-bukidar-nikadgi nue-nobe itodamalad. 
Ar ibmar-isgana, yogasaar ainisulid. Ar bonigan-abingalegedi, walagwen noardasulid. 
Ar igi soo-e-ditismakedi soogi daniki, debayobi, naibi-itolegedi dulegi danimogad. 
”Ani an weyob gunaina, bato an dika Bab-Dummadga an-bonigan an sogsabinnena. 
Ar Bab-Dummad ibmar-gegerdaklemalad imaked, bukidar ibmar-dakledisurmalad imaked. Akusunna-itoge anmar-imaked. 
Ar Bab-Dummadi dii owimaid, sapurgi dii-wiega imakmaid. 
Bab-Dummadi, dule-san-dummarba-imaksulid-e-nug ogannoged, degine, dule-naibi-itodimalad bendakbalid. 
Bab-Dummadi, dule-emar-binsaed-gaed-ibe binsaed obured, adi, e-ibmar-imakedgi mer nasguegar. 
Bab-Dummadi, dule-emar-binsaed-gaed-e-binsaed, egi aibinega imaked, degi, ibmar-isgana-imakbied e-ibe oburbalid. 
Bab-Dummadi, a-dule ibgine yolegega imaked. Ar amba neg-meegwadgi-gudiiyob-gudiile, mutikidba-gudiiyob yolegega imaked. 
Bab-Dummadi, dule-wileged bendaked, dule-isdar-sunmakdimaladgi bendakbalid, degi, dule-sabsur-emar-imakdimaladgi bendakbalid. 
Ar Bab-Dummadi, dule-wileged ogannoged, degine, dule-ibmar-isgana-imaked-gaya-maklegega imakbalid. 
”Dule Bab-Dummadse-nuguega-odurdaklegedi, ¡egi nued binsalesadid! Degisoggu, Bab-Dummad-Bela-Gangued-Nikadi be-odurdakele, mer be isdar itoge. 
Ar Bab-Dummadi, naibi-emar-imak-inigwele, emar-nudakbalid. Bab-Dummadi, amba emargi-yole-inigwele, emarga nunmaked osulobalid. 
Bab-Dummadi, bonigangi be-ollorsamaiguad. Ar amba be bonigan-abalagi-gunaile, be-bendakoed. 
Ukud-dummad-nagunonikile, Bab-Dummadi be-oburgwega be-imakosulid. Bila-onoleged-nagualile, es-suidgi-burgwega be-imakosurbalid. 
Gaya-isgana begi milealile, Bab-Dummadi, akarguega be-imakosulid. Degine, neg-isgued-nonikile, bai be itogosulid. 
Aka be neg-isgued-abin alledii guoed, ukud-abin be werguoed. Degine, ibdurgan-ursirmar-abin be gwayosulid. 
Ar akwamar be-nainu oichogosulid, ibnuedga bega guoed. Ibdurgan-ursirmar be-ibmar-digarmalad be-ibe ebugosulid. 
Be-neguyagine, nueganbi be garmakdii guoed, degine, be-sibad-wawaadmar be ebichialile, bega sogedba bukwa be dakoed. 
Mimmigan-bukidar be nikuoed, waganmar gaganmar-aineyobi be nikuoed. 
Seredgi amba nollosuli be neg-uangi megdapoed. Igi ibmar-gwag-goresadgine, e-iba-sogedbali welege, deyobi, be-iba-sogedba be burgwidoed. 
”Ar anmar bela we-ibmar bega sogedi, bato anmar nue-daksad, we nue-napiragwadid. Degisoggu, nue be itoge, be-sunnad be itoge. Ar bega ibmar-nuedga guoed.”