Job.
14.
Job sogdebalid: “Dule gwalulenonikile, unnila sikwas gudii gued, ar bonigandi bukidar daed. 
Dulemar dutumaryobid. Dutumar argadele, bato dinguddaed, debayobi, dulemar gued. Sikwas-negsichid-nagunonidaeyobi, dulemar berguddaed. 
Bab-Dummad, ¿be deyob duledaedgi ataknasunde? ¿Be-asabin-igar-nabodagega be anse gornasunde? 
Degite, ¿ar doa ibmar-nued, ibmar-isganagi onogoe? Gege dule deyob imaked. 
Dulega ibagan-bergued bato sogles maid, bee be, bato ega niiwarbigwa-wilub-gudiguega ega ibagan mesisad. Degisoggu, gege a-ibagan-obicha gudii gued, ar deyob be imaksad. 
Mer bar egi be nakulege, ies be sae, na e-arbadiid-manigi wergudii be imakgwele. 
”Ar sapimarbela amba siklesale, gannar ainiardaed, degi, e-anagan dunguddaed. 
Ar sapi-e-malimar nungumai-inigwele, e-saila nungumai-inigwele, 
egi dii-aryoderdi, gannar sunna durgued. Sapi-gebe-diglesadyob e-anagan ainiardaed. 
Ar duledina, burgwisar bar daklegosulid. Ar dule burgwisale, ¿bia nadoe? 
Ar igi demar dinguddae, degine, igi diwar dinguddabali, 
deyob dulemar berguddaed, bar gwisgusurdamalad. Ar mogir-arad-naid-berguedsega, geb dule-burgwismalad gwisgumaloed. Dule-burgwismalad e-gabmamaidgi geb atakdemaloed. 
”Be-urwemaid-berguedse neg-uangi be an-odukuena yeerban. Bitigi an-ebinsaega be ibagan nasikena yeerban. 
Dule burgwisale, geg bar gannar durgued. A-ulale, an-bendakleged-iba an bane-bane edarbedii gusaled. 
Geb agi be anse gornonikoed. An be-abin-imaknonikoed. Ar bee be, an-obinnisadsoggu, be yeer an-daknonikoed. 
Be an-gudiid emi be daked, an-isguedgindi bar be binsassulid. 
Ibmar-sagugi-ise-atinnar-melleddaedyobi, be an-isgued dikasuli meted. An-isgumalad bela be anga elisad. 
”Ar igi yar-dummad-mamaridele, akwamar-babatidele, baidsik ambakusdae, deyobi, be dule-e-ibmar-edarbediid be imaked. 
Ar igi-diimar akwamar-sabsursae, deginbali, diwar-dummad-nomaile, bela ese ibmarmar ebipilege, deyobi, dule-ibe e-bendakleged be osuloged. 
Bela-bela be we-dule oitoged, be we-dule-obelogega imaked, bar e-wagar-daklesuli be imaked. Deyob, be we-dule neg-uanse barmeted. 
Ar e-mimmigan-nug ogannolenaile, we-duledi gwen bar wisguosulid. Ar e-mimmigan mesagwar-imaklenaile, we-duledi gwen wisguosulid. 
Unnila e-san-nunmakedbi itoged, na e-nunmakdiidbali, wile-itodiid.”