Job.
15.
Geb agine, Temánʼgined-Elifaz, Jobʼga weyob sogded: 
“Dule-binsaed-ibedi yogasaar sunmaksulid. Dule-binsaed-ibed yogasaar urwesulid. 
Dule-binsaed-ibedi, dule-baidbo abin-abin-imaknaidgine, yogasaar sunmaksulid. Dule-binsaed-ibedi, igar-nudakedgi sunmaksuli gusulid. 
Bedina, aka be Bab-Dummad-dobekwaa-nanaedi obelonaid. Aka be dule-bamalad mer Bab-Dummadse-golega imaknaid. 
Be-sunmakedi be-isguedba be sunmaknaid, dule-galagwensulidamaladyobi be sunmaked. 
Be-sunmakedi dukin begi yolenaid, andi begi yolenaisulid. Be-gwabin-duku dukin be-wioged. 
”¿Be-inse gwalules be itoge? ¿Yarmar-nanaid-idu, be-inse gwalules be itoge? 
¿Bebi binsaed-ibed be itosi? ¿Bab-Dummadde bese binsaed egissi? 
Anmar bela be-ibmar-wisidi wismogad, bela be-ibmar-magar-itogedi anmar magar itomogad. 
Anmar-abargine dadagan bukwad, be-babba bur selegan nanaed. 
¿Bab-Dummad gadi-gadi be-gwage-imaked be baisurdaksunde? ¿Bab-Dummad bega binnalegwadgi sunmaked be baisurdaksunde? 
¿Ibiga be surbinsa urwed-itoge? ¿Ibiga be urwakwaa atake? 
¿Ibiga be Bab-Dummadse urwe? ¿Ibiga egi be yogasaar sunmake? 
”¿Igi-dule na ibmar-oakalodisurye sogosunna? ¿Doa nodisurye sogosunna? 
Bab-Dummad e-nug-odummodimaladginbela bengued, amba nibnegbela swilidik daksulid. 
Dulemarginbulesunna, e-abin swilidikidsulid. Duledi, gobedbinagudiiyobi, isguedbina gudiid. 
”Job, nue be an-itogo, an bega ibmar soggwelo. An-ibmar-daksad an bega sogesokalid. 
We-ibmar dule-binsaed-ibegan anmar-odurdaksadi, na e-babganba durdaksamaladid. 
Agala, Bab-Dummadi a-dulemarga yala uknonikid. Dule-ainebarmalad a-yargi eba bukwa gussulid. 
Dule-isganadina, bane-bane nunmakedba-gar-itodii gudoed, degine, dule-sabsur-emar-imakdiidgala, e-ibagan-bergued bato sogles naid. 
Dule-isgana ibmargoled-emar-ogwayed itoged, degine, na bogidik-gudiidgine, dule-atursamalad egi gwisgunonikoed. 
Dule-isgana negsichidgi-wakinnodeeye gwen binsasulid, es-suidse-ibitogoed ega igar maid. 
Igar-wissuli garmakdiid, mula-masga-guega gudiid. Dule-isgana e-oburgwileged-ibagan-mosad na wisid. 
Wileged-dummad, suli-suli-itoged, bela-bela dobe-itogega imaked. We-ibmarmala, rey-egi-yolesokaliyob itoge imaked. 
Ar Bab-Dummadgi ise-urwar argan-oyonai-gusad-ulale, na san-bule-bule Bab-Dummad-Bela-Gangued-Nikadga imaknai-gusad-ulale, ede na dobe itodiid. 
Ar dule-isgana Bab-Dummad-asabin ise-urwar gunaigusad, ar Bab-Dummad-ourwega, sigu-abgaed-sommed urwedgi ega oyonai gusad. 
”Ar dule-isgana amba wagar-dukwa-dukwa-nika-inigwele, degi, saban-dummad-inigwele, 
neggwebur-ayaraledgi mai guoed, negmar-ollo-ollo-siidgi gudii guoed, negmar-aimukudanimaladgi mai guoed. 
We-dule-isgana, bar ibmar-ibedga guosulid, e-ibmar-nuegan-nikadi bela e-ibe bergudoed, e-nainumar, bela e-ibe surgudbaloed. 
Burgwedgi wakinnosulid, sapi-gannar-ainiardaed soogi-gummakeyob guoed. Ar Bab-Dummad unnila e-bunnogedgi we-dule-obelogoed. 
Dule-isgana, ibmar-baisurmaladgi-yardaklediid iege, ibmar-baisurmaladgi-bengudisulid iege. Ar we-ibmarmargi gwen ibmar-nued amiosulid, we-ibmarmar, binsaledid. 
Igi sapi e-sikleged-ibagan-idu sikleddae, e-anagan aramakosuli sikleddae, deyob, we-dule-isgana burgwidoed. 
Igi uva-dub-e-san, amba yoo-nue-gue batiddae, degi, igi olivo-sapi e-durbamar-ainissuli berguddae, deyob, dule-isgana bergudoed. 
Degidbali, dule-isganamar e-anagan nikuosulid, degine, manigi-emar-binsaed-gamaladdina, e-neguya bela soogi gummakoed. 
Dule ibmar-isgana-imakedgi-binsaed, ibmar-isgana imaknonikoed, e-gwagegi unnila emar-yardakedgi binsadiid.”