Job.
17.
Job sogdebalid: “Napi an iche-iche bunnomaid, an-ibagande nue-bergudanikid, neg-uan bato an-edarbemaid. 
Dule-emargi-dodomaladbi unnila an-ebiris-gunanaid, emide, a-dulemarbi an dakdisunnad. 
”Bab-Dummad, be an-ular mani-bennukega be an-bendakdage. ¿Ar doa bar an-bendakdagosunna? 
Bab-Dummad, we-dulemar-ibe be ebinsaed oburusad. A-ulale, amar nakwegala be imakosulid. 
Ar dule manibina e-ai-urmakdibe, na e-mimmigan-burgwed daknonikoed. 
”Bab-Dummad, dulemar-angi-dodogar-sunmakega be imaksad, aka an-wagargi-wiiakmalaga be imaksad. 
Ibmar-nunmakedba bar an nue ataksurgusad, bela an garbigus dakleged. 
Dule-nuegan an-dakalile, geger an-dakardamalad. Degidbali, we-dulemar dule-isganamargi uluddamalad. 
Degi-inigwele, ar dule-innikidaedi, e-gudiidbali, bur nued gudii guoed. Dule-ibmar-oakalossulidi, bur bule gangumaid. 
”¡Dagmala! Anse gatik gwisgudamala. Ar an wisid, ar bemar-abargi dule-binsaed-ibed gwen gudisulid. 
An-bergued-ibagan nue-walikgusad, an-ibmar-abeged gwen anga gusulid, degine, an-ibmar-imakoye-sogsad, gwen anga gusurbalid. 
We-dulemar neg-mutikid neg-ibginedyob dakdamalad. Amba neg mutikile, sogdedamalad, neg oibodaniye. 
¿Ibu bar an edarbosunna? Unnila napa-yaba-dogedbi an napid, negsichidgi an mai guoed. 
Ar neg-uan an-babga guoed, nusmar an-nanga, an-gwenadganga gunonimogoed. 
Degisoggu, ¿bia bendakleged-igar an amiosunna? ¿Bia ibmar-nued bar anga danikosunna? 
An ibmar-nued-edarbediid anba bergudoed, anba napaga gudmogoed.”