Job.
18.
Degine, geb Bildad Súah-neggweburgined, Job-abin-sogded: 
“¿Sana be sunmaked bogilegoe? Binsaed-nikaa be sunmakena, anmar nuedgi sunmaksaled. 
¿Ibiga ibdulamaryob be anmar-dake? ¿Ibiga binsaedsurmaladyob be anmar-dake? 
Ar be urwed doggussoggu, abali, na be dukin wionaid. ¿Ar degidbali, napaneg swiri naguoye be binsasi? ¿Ar be-sogedba akwamar ainiroye be binsasi? 
”Ar dule-isganamar-e-gwallu akitoed, e-soo-gaedi baligaosulid. 
Dule-isgana-e-neguyagine neg sichiledoed, e-gwallu-gasiid akitoed. 
Dule-isgana gandikidba-nanaed bergudoed, degine, e-igar-mesisadgi dukin yardaklegoed. 
Na e-nanadiidba dukin yardakledii guoed, dukin e-sakigi galenai guoed, 
e-nagmatarba galegoed, egi bar noosulid, bela egi apurnai guoed. 
Dule-isgana-iduale, napagi dukuar dub bukwad, adi, nadapile, egi galegegar. 
Dule-isganaga neg-gwayed nagunonikid, gwayed eba sorba gudiguad. 
Bonigan-egi-yoleged bogigunaisulid, dule-isgana ukudba belagus nadapid. 
E-ukamar, boniganse ibitonaid, e-arganmar, e-nagmar, burgwedanikid. 
Dule-isgana na neguyagi-baisur-binsadiid bergusad, emisgindina, burgwed-igarse nadapsunnad. 
Dule-isgana-e-neguya, soo-sailase bela ibitosad. E-ibmar-nikadi, soo-azufreʼse bergusad. 
Igi sapi-saila, e-malimar, e-anagan, dinguddae, debayobi, dule-isgana gued. 
We-napneggi bar dule-isganagi binsalegosulid, e-nug-dummarba-megisad bela bergunonikoed. 
Dule-isgana neg-meegwadgi-gudiidi, negasichidse barmelledoed, we-napneggi-gudiidgi ononnolegoed. 
Dule-isgana na e-neggweburgi mimmigan, gwen obegosulid, e-gudigusadgi, gwenadgan gwen obegosurbalid. 
Dulemar dad-nakwedsik-bukwamaladi, degine, dad-argwanedsik-bukwamaladi, dule-isgana-deyob-gusad geger itomaloed. Degisoggu, gwayed egi nagunonimaloed. 
Weyob dule-isgana bergued, dulemar-Bab-Dummad-akudakdimalad weyob bergued.”