Job.
19.
Degidbali Job, Bildad-abin-imakded. Weyob sogded: 
“¿Sanagwadse bemar an-wionai guoe? ¿Sanagwadse bemar angi-sunmaknaid indakmaloe? 
Bemar angi gannar-gannar yolenanaidi, ¿bemar bingesurmarsi? 
Ar an nue-isgusye soglegele, angi siido, an na wargwen gunaid. 
Bemar bur anba dule-nuedye sogmarsunde, emide, an-isgusadba be angi dododmalad. 
Bemar wisgumalargebed, Bab-Dummad weyob an-imaknaid, ar Bab-Dummad e-sakigi an-gasa gunaid. 
”Aisaar an binnasuli gornainad: ‘¡An-oburgwebimarye!’ Dule-wargwensaale, gwen an-itosulid. An bendakleged egisnai-inigwele, gwen an-bendaksurmalad. 
Bab-Dummadi an-idu igar edusad, gege bar an obake gusad. An-nanaedbali negasichidbi an-idu nasiksad. 
Bab-Dummadi, an-ibmar-bukidar-nikadi bela an-ibe sunonikid. An-nug-dummarba-gued bela an-ibe obelononibalid. 
Sapiyobi, bela an-obelosad. An-ibmar-edarbediid, sapi-e-saila-bergusayobi an-ibe obelosad. 
Bab-Dummadi nue angi dummad-urwenaid, e-isdaradga an-imaksa gunaid. 
Bela e-bila-onomalad an-ebiris ambikunonimalad, an-dordoneg-ebiris bukunonimalad. Napa-arsanyob-nakwemai sobsamalad degi, angi gwisgunonimalad. 
”Bab-Dummadi an-gwenadgan-angi-banguega imaksad, an-aimarse-bakale, angi bangudmalad. 
An-gwenadgan an-iedmalad, dule-magar-an-dakdimalad an-iedmarmogad. 
An-neggi-gudimalad aku an-dakdemalad, bunormar-anga-arbadimaladse-bakale, dule-baidiyob an-dakdemalad. 
An-maiga-gudiidse an gotedaenad, gwen an-abin-imaksurdaed. Amba ise-wilegar an gordibe, amba an-itodasulid. 
An-gaya-yapannedde gwen nabir-yapansulid, an-ome ima an-itoged. An-gwenadgan-gargwenmaladse-bakale, imasun an-daked. 
Burwiganase-bakale, angi dododmalad. An-dakarmalale, biir naddamalad. 
An-aimarbela imasar an-dakdemarmogad, an-gwenadganbela angi aibitemalad. 
An-garmar bus-bus gusad, an-san bar daklesurgusad. Unnila napi an bunnodiid. 
An-aimar, nue-wile be an-dakmala, ar Bab-Dummad nue an-wionaid. ¡Nue-wile be an-dakmala! 
¿Ar ibiga Bab-Dummad-an-wionaidyob bemar an-imaknaimarmoga? ¿Ar bemar an-wionanaid baisur-itomala? 
”Bitigine an-sunmakedi gardagi narmaklegena yeerban, gardagi narmakar megisana yeerban. 
An-sunmakedi akwagi degisadegu narmakar megisana yeerban, esgoro-madaregedgi degisadegu narmakar megisana yeerban. 
An nue-wisid, an-Bab-Dummad-An-Ollor-Imaked dula maid. We-dule dummad-an-wilenaidgi an-ogwisguoed an nue-wisid. 
An-san bela bergussundibele, amba an-ibyagwar an Bab-Dummad-dakedsegad. 
Amba Bab-Dummad-dakoedi an nue-wisid, an-sunnagwad an dakoed, dule-baid dakosulid. We-ibagan an nue bela-bela edarbediid. 
”Bemar sogbalid: ‘Anmar egi yolegoe, ar a-dulegi isgued nue-maid.’ 
Nue salakarmalo, es-suidse ibitodamalar. We-es-suidgi Bab-Dummad dule-isgana obeloged. Bemar wisgumar, Bab-Dummad anmar-wilub-daked maid.”