Job.
21.
Agine Job abin-sogded: 
“Bemar nue an-sunmaked itomala, adi, bemar nabir gadi-gadi an-imakmaloed. 
An sunmaknaile, mer sulibinsa alled-itomalo. An sunmaked-bergusale, bemar allebier, allemaloed. 
”An-urwenaidi, dulemarbo an urwenaisulid. A-ulale, geg an san bargaed. 
Nue be an-dakmar. Geger be an-dakmaladba, gaya be gamaloed. 
We-ibmargi an binsaddibe an gwakiddaed, bela an-abaganmar iii naddaed. 
¿Ibiga dule-isganamar amba dula-gudinanae? Aka bur bule nasgumamaid, deyob seredgumamaid. 
Dule-isganamar e-mimmigan-nasgumai daked, e-waganmar-nasgumai daked. 
Dule-isganamar e-neguyagi neg-bogidikid-nika gudidamalad, dobedsuli gudidamalad, Bab-Dummadse gwen sabsur-odurdaklesurmalad. 
Dule-isgana-e-molimar-bebe-nikad e-dula-bakmalad sunsogmaladid. E-moli-omegandina, mimmigan-nikualile, gwen e-ibe mellesulid. 
Dule-isgana-e-mimmigan sibad-wawaadyob abarmakdidamalad, dodonaigusmalale, oallenagusdamalad. 
Gar-tambor-goledbali, gar-arpa-goledbali, namakdedamarbalid. Gar-gammu-goledbali, wergunaidamarbalid. 
Ar dule-isganamar-e-gudiidi, nueganbi gudidamalad. Burgwidmalale, nuedgi burgwiddamalad. 
Dule-isganamar Bab-Dummadga sogdedamalad: ‘Mer be anse gole, anmar Be-Igar-Maidba nanabisurmalad. 
Anmar e-nug-odummogega, Bab-Dummad-Bela-Gangued-Nikadde, ¿doasunna? Anmar ese gorye sogele, ¿ibu-nued egi amilesunna?’ 
Dule-isganamar na e-ibmar-nuegan-nika-guega egi sisulid. Bipisaale, amar-binsaed-isgana-ukedba an binsaed galegosulid. 
”Dule-isganamar geg burgwe gudimalad. Undar iba-suitii gudidamalad. Dule-isganamar boni-dummaganba-gar-itodii dasurmalad. 
Dule-isganamar, gagan-dinnagwadyob, burwa-dummadba-selemai dakledisulid. Dule-isganamar, burwa-ooredba gaganyob-selemai dakledisurbalid. 
Anga sogdamaloed, Bab-Dummad dule-isgana-e-mimmiganbi sabsur-odurdakoye, e-babgandi, odurdakosurye. Bab-Dummad bur bule e-babgan sabsur-odurdakena gadin, adi, magar na itomaloed. 
Dule-isgana e-wilegoed, e-ibyagwar na daksun. Dule-isgana, Bab-Dummad-Bela-Gangued-Nikad-sabsur-e-odurdaked itosun. 
Dule-isganamar bar undar-gudii guosulidbali, e-sorba-e-gwenadgan-beoedi, gwen bai dakosulid, gwen egi binsaosulid. 
”¿Doa Bab-Dummad binsaed-nuegan-nikuega odurdakosunna? Bab-Dummad bur emar-wilubdaked maid, nuga-nikamaladse-bakale, ese wilub-daklemalad. 
Abar-dulemar nuchukwagwadgi burgwemalad, nue yeer-neg-itodimaladgi burgwemalad, nue bogidikid-gudiidgi burgwiddamalad. 
Ibmar-bukidar-nikaa gudidamalanad, san-nuedi, bonisuli gudidamalanad, deyob burgwiddamalad. 
Abar-dule sulibinsa-isdar-itodii burgwiddabalid, gwen ibmar-nuedgi-wergudsuli burgwiddamalad. 
Bela we-dulemar napa-yaba-burgwarmamaile, emarbi gumalad. Napa-urba nusbiini mamai gumaloed. 
”Ar bemar-binsabukwadi an wisid, unnila bemar an-wiogedgi binsabukwad. 
Bemar-binsananaid an wisbalid. Bemar binsabukwad: ‘¿Bia we-dule-nuga-nikad-e-neg-dummad nade? ¿Bia we-dule-isgana-e-neg nade?’ 
¿Dule-bukidar-igarba-nanamaladse be egissurmarsi? ¿A-dulemar-sunmaked be nue-itosurmarsi? 
Dule-isgana bonigan-nonikile, akar-gusurdamalad. Sabsur-odurdakleged-ibagi, san-onosdamalad. 
¿Doa dule-isganaga e-gudiidgi akar sogosunna? ¿Doa ega asabinmakar ibmar sogosunna? ¿Doa dule-isgana sabsur-odurdakosunna? 
Dule-isgana-burgwisar, neg-uanse-selesdibe, e-neg-uangi dule-nakulemalad ogwichilesdaed. 
Neg-uanse-e-bardakmalad bukidar ainiardaed. Napa-nuedgi digles mesilesdaed, nuedgi bogidik mesilesdaed. 
”Degite, ¿igi bemar an-gwage gadi-gadi imakosunna? Yogasaar be anga sunmaknanaimalad, bemar anga ibmar-sognaid inniki anga sunmaknanaisurmalad.”