Job.
22.
Agine, Temán-neggweburgined-Elifaz, Job-abin sogded: 
“Dule-gwensak binsaed-nikarbadibe, ¿Bab-Dummadgala ibnuedga gue? Suli. Dule-deyobid na dukin ega ibnuedga gued. 
¿Be-innikidaedgi Bab-Dummad-Bela-Gangued-Nikad ibmar-nued amisi? Suli. Ar gwen ibmar-nued egi amisulid. ¿Be-nued-nanaedgi Bab-Dummad ibmar-nued amisi? Suli. Ar gwen ibmar-nued egi amisulid. 
”Ar Bab-Dummad sabsur bega ibmar-sognaile, degi, bega igar itonaile, ar be e-dobegudiidbarsulid. 
Ar be-isgued-doggus-merguedba, degi, be-isgued-bargalesulidba, deyob be-imaknaid. 
Be-gwenadgan bese ibmar-egisdanidibe, gwen be ibmar-abesulidgi, gandikidgi, e-ibe ibmar-anar, mor be susdaed. Dule-wilemalad-ibe mor bela be susdaed, uka-swana be metedaed. 
Dule-ukudmaad-gudimaladga, gwen gobed be ukdasurbalid. Dule-masbina-gudimaladga, be gwen mas ukdasurbalid. 
Be dule-buled megissoggu, dule-nainu-ibed be megissoggu, be binsasanad, ani an napa-ibedye. 
Omegan-ei-sui-burgwismaladga, gwen ibmar-uksasuli be barmiddaed. Sergan-satemalad-ibe be ibmar bela susdabalid. 
A-ulale, emisgindi galesnaiyob be itoged, ukiagwar nue-dobe be itoardaed. 
Negsichidgi-gudiiyob be itoged, a-ulale, ibmar-daksuli be-imaked. Diwar-dummadse-selemaiyob be itoged. 
”¿Bab-Dummadi nibneggi maisursi? ¡Be dakena! Niisgwamar-dikasurnanaid matusuli begi nanaid. 
Emide be soged: ‘Bab-Dummad, ¿ibi wissunna? ¿Bab-Dummad sunna negsichid-abalagi emar-wilubdaksi?’ 
Be sogbalid: ‘Mogirmar Bab-Dummad-idu bipirmaknaiye, mogir-gudureged ebirisnaiye. Agala, Bab-Dummad gege anmar-dakye.’ 
”Dule-isganamar-galagwensuli-nanasmaladba, ¿be nanamogode? 
Be ebinsao, we-dulemar nuchukwagwadgi burgwisgusmalad, diwar-dummadba ibmar-selegedyobi bergusmalad. 
Aka Bab-Dummadga sogdegusmalad: ‘Mer be anmarse gorye, Bab-Dummad-Bela-Gangued-Nikad, ¿ibu be anmarga imaksunnoye?’ 
Bab-Dummad ega ibmar-nuegan-ukdii gusanad. Andina, dule-isgana-e-binsaed-isganaba binsaed-galeged, sate. 
”Dule-nuegan, dule-isganamar-ibitonanaid-daksagua, yeer-itosmalad, dule-ibmar-oakalodisurmalad egi dododmalad, sogdemalad: 
‘Anmar-isdarmalad burgwismalad, e-ibmar-nikad soose bela ei-gummaksad.’ 
”Job, Bab-Dummad-urbaligwa be nanae, ebo be igar nudake, Bab-Dummad gannar ibmar-nikuega be-imakoed. 
Bab-Dummad-e-sunmakmaid be nue abingae, e-igar-durdakleged be-gwagegi nue-sedii be gue. 
Bab-Dummad-Bela-Gangued-Nikadse be gannar wilesakwaa atakdedibe, be-neguyagi ibmar-isgana be obangusbardibe, bela be nugunonikoed, weligwar be gunonikoed. 
Be or-nuegan-nikadi napagi be miele, Ofir-e-ormar diwar-akwamar-imbagi be miele, 
Bab-Dummad-Bela-Gangued-Nikad be-or-nuedga gunonikoed, Bab-Dummad be-mani-nuedga gunonikoed. 
Bab-Dummad-Bela-Gangued-Nikad yeer-ito be-imakoed. Bab-Dummad-asabinni bar be bingeguosulid. 
Bab-Dummadse be gotele, be-itogoed. Bedi ega ibmar-imakoye-sogsad be imakedsegad. 
Be ibmar-imaksokalile, bega ibmar-nueganbi gudoed. Be-iduale gwallu-ganaiyob bega neg-nagunonikoed. 
Bab-Dummadi, dule-san-dummarba-imakdiid, san-bipii imaked. Dule-na-san-bipi-imakdimalad-e-nugdi, odummoged. 
Bab-Dummadi, dule-ibmar-oakalodisurmalad bendaked. Be dule-innikidaedba Bab-Dummad be-bendakoed.”