Job.
26.
Job Bildad-abin weyob sogded: 
“¿Weyob be dule-gegudiid-bendaksunde? ¿Weyob be dule-nollogudiid nue-bendakye be sogsunde? 
Ibiyobi dule-ibmar-wissulidga binsaed-nued-uke an be-dake. Ibiyobi nue-binsaed-nikaye na be san oyoge. 
¿Doa weyob-sunmakedgi be-odurdaksa? ¿Doa weyob sunmakega be-imaksa?” Bildad, Job-abin-sogdebalid: 
“Dule-burgwarmalad demar-wilad-urbali-mamaidi, Bab-Dummad-asabinni, wawanmakmaid. 
Burgwarmalad-meged-galumar bela Bab-Dummad-asabinni, magar daklemamaid. Burgwed-igar Bab-Dummad-asabinni, dukumaisulid. 
Bab-Dummadi, bela nibneg-naid neg-olloledgi nasiksad, napnegdi, ibmargi-akanaisuli nasiksabalid. 
Bab-Dummadi, mogirmargi dii nasiksabalid, Bab-Dummadi, mogir nabir dii-bargae imaksabalid. 
Bab-Dummadi, nii-dalunaid-eduegala, irwa mogir nasiked. 
Bab-Dummadi, magatibali demargi igar-maiyob imaksad, adi, nabir neg-ibgined, neg-mutikidgi bachiki-nai guegar. 
Bab-Dummad-urwed-abinni nibneg-bargamaladi, dobedbali wawanmakdedamalad. 
Bab-Dummadi, e-ganguedgi demar-uurmaked obogileged. Bab-Dummadi, e-ibmar-wisidbali ibdula-Rahabʼye-nugad ese ibitosad. 
Bab-Dummadi, e-bunnogedgi mogir oaisakied. E-argangine, ibdula-dummad-demargined oitoged. 
We-ibmar unnila-sikwas Bab-Dummad-e-gangued oyonaid. Anmar unnila-sikwas, Bab-Dummad-e-gangued itonaid. ¿Doa Bab-Dummad-e-gangued bela magar itogosunna? Dule gege magar itoged.”