Job.
33.
Eliú sogdebalid: “Job, wis be an-itomogo, an-sunmakoed nue be itogo, bela an bega ibmar-sogoed nue be itogo. 
Emiskwaa an bega sunmaksokalidi, bela an bega ibmar sogedsegad. 
An-sunmakoedi, an-gwagegi innikigwadba an bega sunmakoed. An-gwabinduku gakansaale bega ibmar sogosulid. 
Bab-Dummad-Burba an-obinnisad, Bab-Dummad-Bela-Gangued-Nikad burba anga uksad. 
Be nabir an-abin-imakele, be an-abin-imakodo. Sunmakega be guakwaa sigo. 
Bab-Dummad-asabinni, anmar anbogwa na emalad, anmar napsagi danikid. 
Degisoggu, mer be an-abin gwayo, an begi obinsurmogad. 
”Job, be-sunmaked an wis-itosad, weyob sognaiyob an be-itosad: 
‘An isgudisurye, isgued angi maisurye, an ibmar oakalodisurye. 
Emisgindi, Bab-Dummad, ibmar-oakalosadyob an-dakdeeye, e-isdaradyob emisgindi an-dakmaiye. 
Bab-Dummadi naggi esgoro-dubgi an-edichaye, bane-bane angi nakuledigussunye.’ ” 
Eliú sogdebalid: “Job, degiirdi nabir, an bega sogo. Be we-ibmar-sogsad, be noar soged. Ar Bab-Dummadi dulemarba bur dumma maid. 
¿Ibiga Bab-Dummadgi be deyob sunmake? ¿Bab-Dummad be-abin-imakergebye, be sogsunde? Degisuli, be dummad nodiid. 
Ar Bab-Dummad anmarga sunmaked, gusgu bane-bane anmarga sunmakmaid, degi-inigwele, dule itosurdaed. 
Imbagwena, anmar-ise-gabar-maidgine, yakumaksiidgine, Bab-Dummad gabdakedba anmarga sunmaked, negburgan-dakedgine anmarga sunmakdabalid. 
Bab-Dummad anmarga sunmaked, ibmar-danikidgi anmar-owisogedba dule-ogwayed. 
Bab-Dummad ibmar-isganagi-banguegala anmar-owisobalid, mer anmar san-dummarba-imakdiguegala, anmarga sunmaked. 
Mer burgwed-igar-itogegala, mer es-suidse-burgwegala, anmarga sunmaked. 
”Imbagwenale, Bab-Dummad anmar-odurdakegala, boniganba gala-itogega anmar-imaked anmarga abagan-nunmakedi uked. 
Degidbali, san-nuegan-gullemalad, isdarsunna be dakdoed, degisoggu, mas-gunbi bar be itogosulid. 
Anmar-abaganmar bela malemai gudoed, garmar-mamaid magar-daklege gudoed. 
Be-burba burwaga-gued-ibaganse warmakdanikid, neg-uangi-meged modanikid. 
”Baliwiturmar-miligwen-bukwad-abargine (1,000), baliwitur-gwensak dule-bendakegala gwisgunonisunnad. We-baliwiturde, ibu-imakoye ega sognonisunnad. 
We-baliwitur wile-dule-dakedbali, Bab-Dummadse weyob wilesakwaa egisdesunnad: ‘Bab-Dummadye, we-dule mer napa-urba-megega be imakye. Ar we-dulega ollor-gued-igar maiye.’ 
Agine geb, dule gannar nuchukwaa gunonikiled, bipigwaun-gudigusayob gunonikiled. 
Agine, geb dule Bab-Dummadse gotoed, geb Bab-Dummad na abinsaoed. Degidbali, dule Bab-Dummad-wagar nabir daknonikoed. Degi, weligwar-itogedba na binnasur-gornai gudoed. Geb Bab-Dummad ibmar-oakalossuliyob dule-daknonikoed. 
Deyob geb dule, dulemarga weyob sognai gudoed: ‘Amba an nue isgus-inigwele, an igar-inniki-maidgi yolenoni-inigwele, an sabsur-odurdaklegewilubbinye, degite, an deyob odurdaklessurye. 
Ar Bab-Dummad burgwedgi nue-an-bendaknonisoggua, emisgindi, an dula-gudiidi, an nabir neg-itodisunnad.’ ” 
Eliú sogdebalid: “Bela we-ibmarmar, Bab-Dummad imakmaid, ilabigwa dulemarga imakbie, Bab-Dummad na e-sogedba imakmaid. 
Burgwedgi anmar-bendakmaid, degine, nued-gudii anmar-imaked. 
”Job, nue be an-itoge. Mer be sunmake. Ani an sunmaknaid. 
Be ibmar-soged-nikamogale, be an-abin-imakmogodo. Be nabir sogele, an nuedgi be-itogoed. 
Degisulile, nue-bogimakale, be an-itoge. Nabir-binsaed-nued-nikuega an be-imakoed.”