Job.
34.
Eliú sogdebalid: 
“Bemar-binsaed-ibegan-gumalad, nue an-sunmaked be itomalo. Bemar-nue-ibmar-wismalad, nue be an-itomalo. 
Ar igi anmar-gwabin magasar yeer masgulleged-itoge, deyobi, uaya magasar gayaburba yeer itomogad. 
Degisoggu, anmar, we-igar bulakwaa daksunnodo, anmar igar-nuedse bulakwaa onogoed.” 
Eliú sogdebalid: “Ar Job weyob sogye: ‘An ibmar-oakalossurye, Bab-Dummaddina deyob an-daksurye. 
An dule-nued-gudi-inigwele, dule-gakansaedyob daklesunye. Amba an ibmar-akar-imaksasur-inigwele, Bab-Dummaddi nue-naibi an-imaknaiye.’ 
¿Ar bia be dule Jobʼyobid dakdimala? Ar we-dule unnila Bab-Dummadgi dododiid. 
”Ar Jobʼde, dule-isganaba akadigued bur yeer itodaed, dule-isganamarba bur gudii gubidaed. 
Job anmarga sogbalid, ‘Bab-Dummadba-ibsalegedi, dule gwen ibmar-nued egi amisurye.’ 
”Bemar dule-machergan-nue-binsaed-nikamalad, nue be an-itomalo: Anmar geg soged, Bab-Dummaddi, ibmar-isgana nabir-imakye, Bab-Dummad-Bela-Gangued-Nikaddi, sunna ibmar noar-imakye. 
Bab-Dummad dule-na-ibmar-imakedbali, dulega ibmar uked. Dule-daedbali dulega ibmar imaked. 
Geg anmar sogbalid, Bab-Dummad ibmar-isgana imakye. Bab-Dummad-Bela-Gangued-Nikadi, igar-inniki-maid oichobarye. 
Bab-Dummad we-napneg-seega, ¿doa ega gargangued uksa? ¿Doa Bab-Dummadga negseed-igar uksa? 
Ar Bab-Dummad anmargi burba-dula-maid gannar suye-sogele, anmar-bunnodiidi obeloye-sogele, 
bela dule-gudimaladi bergudmalaled, dulemar bela napaga binnidmalaled. 
”Job, be we-ibmar magasar-itodibe, an-ibmar-sogoed, nue be itogodo. 
¿Sunna dule ibmar-isgana-imakdiidi, nabir negseosi? Suli. Geg gue. Degisoggu, gege be Bab-Dummad-innikigwadgi, bela-gangued-nikadgi be yoleged. 
Reymar, degi, dule-dummagan isganamalale, ar Bab-Dummad gwen binsaosulid mer an oakalogodeeye. 
Bab-Dummad dule-negsemaidba nagusulid. Degi, dule-mani-ibedba nagusulid, dule-mani-satedba nagusurbalid, bela emarbi daked. Bab-Dummad bela emarbi amar-imaksad. 
Dulemar ukiagwar mutikidba burgwiddamalad. Dulemar oimakbukwadamalad, degi, berguddamalad. Dule-bulegan-negsedimaladi, negsediidgi dule-oakalossuli ukiagwar egwalleddamalad. 
”Bab-Dummad bela dulemar-gudiid dakmaid, bela dulemar-e-gudiidgi nakulediid. 
Dule-isganamarde negsichidgi, neg-guduregedgi dukuye-sogele, gege amba Bab-Dummadgi dukued. 
Bab-Dummad, dulega igar-nabogega dulega iba messulid. 
Bab-Dummad dule-bulegan-negsemamaid-onogegala, igar-amiegala, emarse idaksulid. Amar-muchub dule-baid omesed. 
Bab-Dummad dulemar-ibmar-imaked bela wisid, mutikidbali egi gwisgued, bela ese ibitomalad. 
Bab-Dummadi, bela dulemar dakmalaga, dule-e-isguedbali, dule-sabsur-odurdaked. 
Dulemar Bab-Dummadgi-banguddamaladbali, degi, eba ibsasurdamaladbali, deyob gunonidamarsunnad. 
Degine, wemar sabsur dule-wilemalad-obosmalad, sabsur dule-ibmar-abese-gudimalad-wiosmalad. Degidbali, Bab-Dummad dule-wilemalad-e-ogormaked itosad. 
Ar Bab-Dummad ibmar sogsulile, ¿doa ega akar sogosunna? Dule geg ega akar soged. Ar Bab-Dummad dule-idu wagar-odukuele, ¿doa e-wagar dakosunna? Bab-Dummadi, bela dulemargi nakulemaid, 
adi, dule-isganamar mer negsemalagar, degi, mer dulemar-yardakdii gumalagar. 
”Job, amba be Bab-Dummadga weyob sogele: ‘Nabirye, nue an nosye, bar an begi yolegosurye. 
Be an-odurdaksunye, magar-neg-itogedse be an-imakye. An ibmar-isgana-imaksadi, bar an imakosurye.’ 
Job, be deyob sogdibe, degite, be Bab-Dummad-obacha-inigwele, ¿Bab-Dummad bega be-ibmar-abeged uked abesunde? Sulirgebed. Andi be-ular sogosulid, ar bee be sogoedid. Degisoggu, na be-binsaedi be soge, igi na be binsae. 
”Bemar, an-itobukwadi dule-binsaed-ibeganad, be magar neg-itomaladid. Degisoggu, be anga sogmardo: 
‘Job yogasaar sunmakye, e-sunmakedi gwen binsaed-nika itolesurye.’ 
Ar Job-e-sunmakedi dule-isganayobi anmarga sunmaked. Degisoggu, bela-bela Job-gudiid nue-wisguleged abeleged. 
Job unnila dule-isganabisulid, uayasulidbalid. Ar anmar-wagab anmargi dododiid. Ar Bab-Dummadgi, bela-belad ise-yolegar sunmaksad.”