Job.
37.
Eliú sogdebalid: “An we-ibmar-dakdedbali, an-gwage dik-dik-naded, ber an-gwage noebieyob an itoged. 
Be nue itomala, Bab-Dummad-e-sunmaked mar-gollomakeyob-sunmaked be itomala, binnasuli-sunmaked be itomala. 
Bab-Dummad e-mala-ibyedi, bela nibneg-gaed, e-ibyemaidi, bela napneg-ugakaasega ibyed. 
Bab-Dummad-e-sunmakedi, binnasur-itoleged, e-mala-ibyedi, galesulid. 
Bab-Dummad binnasuli-sunmakdele, ibmar-gegerdakleged oyoardaed. Anmar-ibmar-magar-itosulid oyoardaed. 
Bab-Dummadi, boo-batedga igar-ukdaed, ‘¡Napase batemaloye!’ ega sogdaed. Dii-wiedga igar-ukdabalid, ‘¡Be-gangued-oyomaloye!’ ega sogdaed. 
Bab-Dummad deyob ibmar-imakedbali, dulemar bar aineba ainidasurmalad, adi, Bab-Dummad-ibmar-imakmaid magasar dakdamalad. 
Ibmar-durgan na dukuegala, e-dukued-yaba na bukusdamalad, agine na dukubukusdamalad. 
Dad-nakwed-argan-nuedsik burwa-goledba, burwa-oored danidaed. Dad-nakwed-argan-sapiledsik burwa-goledba, neg-dambed danidaed. 
Bab-Dummad-bunnogedbali, dii gwamakleddaed. Bela dii-dummad-naidi negdammipegwadba dutusuli naddaed. 
Bab-Dummadi dii-wiedi mogirmargi urbed, degidbali, a-mogirmargi mar-ibyedi onoged. 
We-mogirmar napneg-naid ebirbukwad. Bab-Dummad-ega-igar-mesisadba iirmakbukwad. 
Bab-Dummad na e-sogedba dii owied, imbagwenale, dulemarga dii-wiedi ibnuedga gued, imbagwenale, dulemarga dii-wiedi dule-wiogega gued. 
”Job, nue be itogo, Bab-Dummad-ibmar-gegerdakle-imaksadgi be binsagwelena. 
¿Be wisi, igi Bab-Dummad mogirmar see? ¿Be wisi, Bab-Dummad mar-ogaega igi imake? 
Degite, be soged, bela an ibmar wisye. Be anga sogdo, ¿igi Bab-Dummad niba mogirmar-naguega imake? 
Emide, dad-nakwed-argan-nuedsik burwa-ued-danikidbali, mor-yoid be geger itodaed. 
Bab-Dummad nibneg-egasadgi, esgoro-gordikidiyob daarmakar-nasiksadgi, ¿be Bab-Dummad-bendaksasi? 
”Anmarga be soge, igi anmar Bab-Dummad-abin-saoe. Anmardi ibmar-wissursoggu, geg anmar Bab-Dummad-abin-imaked. 
Ar Bab-Dummadi an-ibmar-sogedi, ¿dule-baid-ega-soged abege? Suli. ¿Doa ega ibmar akala sogosunna? ¿Doa ese burgwebisunna? 
”Mogir dad-irwa-naid dadgi banguddibe, gege dule dad-ganaidgi ataked. 
Emide, dad-nakwed-argan-sapiledsiki neg dakarmakdanikid. Bab-Dummad danikid, bela-bela e-gargangued-yeerdaklegedba danikid. 
Anmar gege Bab-Dummad-Bela-Gangued-Nikadyob gued. E-gangued-maidi bipisuli maid. E-ibmar-inniki-imakedi, degine, e-igar-nabogedi yeer gangu maid, mesagwar emar-imaksulid. 
Bab-Dummad, dule-na-ibmar-wisirbaye-sogdiidi, gwen ibmar-wisi daksulid. A-ulale, dulemar Bab-Dummad-dobmalad.”